അധ്യാപക ദ്രോഹം അവസാനിപ്പിക്കണമെന്ന്; ഉപവാസവും പ്രതിഷേധ സമരവും നാളെ

തൊടുപുഴ: കട്ടപ്പന സ്വരാജിലെ സയണ്‍ പബ്ളിക് സ്കൂളിലെ അധ്യാപക ദ്രോഹം അവസാനിപ്പിക്കണമെന്നാവശ്യപ്പെട്ട് കേരള അണ്‍ എയ്ഡഡ് സ്കൂള്‍ ടീച്ചേഴ്സ് ഓര്‍ഗനൈസേഷന്‍െറ ആഭിമുഖ്യത്തില്‍ ഏകദിന ഉപവാസവും പ്രതിഷേധ സമ്മേളനവും നടത്തുന്നു. തിങ്കളാഴ്ച രാവിലെ ഒമ്പതിന് സ്കൂളിന് മുന്നില്‍ സംസ്ഥാന വൈസ് പ്രസിഡന്‍റ് എം. ഷാജര്‍ഖാന്‍ സമരം ഉദ്ഘാടനം ചെയ്യും. വൈകീട്ട് അഞ്ചിന് ലബ്ബക്കടയില്‍ പ്രതിഷേധ സമ്മേളനം നടക്കും. കേന്ദ്ര മാനവവിഭവ ശേഷി മന്ത്രിയില്‍നിന്ന് അധ്യാപന മികവിന് പുരസ്കാരം നേടിയ സന്ധ്യാ വി. നായരെന്ന അധ്യാപികയുടെ ശമ്പളം വെട്ടിക്കുറക്കുകയും ഡീഗ്രേഡ് ചെയ്യുകയും ചെയ്ത നടപടി പിന്‍വലിക്കണമെന്ന് ഓര്‍ഗനൈസേഷന്‍ സംസ്ഥാന സെക്രട്ടറി വിദ്യാ ആര്‍. ശേഖര്‍ വാര്‍ത്താസമ്മേളനത്തില്‍ ആവശ്യപ്പെട്ടു. ബാങ്കിലിടുന്ന ശമ്പളത്തില്‍നിന്ന് മാനേജ്മെന്‍റ് പണം തിരികെ വാങ്ങരുതെന്ന സര്‍ക്കാര്‍ ഉത്തരവ് ലംഘിച്ചതിനെ ചോദ്യം ചെയ്തതാണ് അധ്യാപികക്കെതിരെയുള്ള പ്രതികാര നടപടിക്ക് പിന്നിലെന്ന് ഓര്‍ഗനൈസേഷന്‍ ചൂണ്ടിക്കാട്ടി. സ്വയം പിരിഞ്ഞുപോകണമെന്നാവശ്യപ്പെട്ട് മാനേജ്മെന്‍റ് നിരന്തരം മാനസികമായി പീഡിപ്പിക്കുകയാണെന്ന് അധ്യാപിക സന്ധ്യാ വി. നായര്‍ പറഞ്ഞു. വാര്‍ത്താസമ്മേളനത്തില്‍ ഓര്‍ഗനൈസേഷന്‍ ഇടുക്കി ജില്ലാസെക്രട്ടറി സിജു രാജക്കാടും ജനകീയ പ്രതിരോധ സമിതി ജില്ലാ സെക്രട്ടറി സിബി സി. മാത്യുവും പങ്കെടുത്തു.