യൂത്ത് കോണ്‍ഗ്രസ് പാറമട വാഹനങ്ങള്‍ തടഞ്ഞു

ആലക്കോട്: ടണ്‍ കണക്കിന് ലോഡുമായി ചീറിപ്പായുന്ന ടിപ്പര്‍, ടോറസ് വാഹനങ്ങള്‍ മൂലം പാലവും റോഡും തകരുന്നതായി ആരോപിച്ച് യൂത്ത് കോണ്‍ഗ്രസ് ആലക്കോട് മണ്ഡലം കമ്മിറ്റിയുടെ നേതൃത്വത്തില്‍ അഞ്ചിരിയിലെ പാറമടയില്‍നിന്നുള്ള വാഹനങ്ങള്‍ തടഞ്ഞു. ഈ വാഹനങ്ങളുടെ സഞ്ചാരം മൂലം റോഡുകളും പാലങ്ങളും തകരുന്നതായി കാണിച്ച് വില്ളേജ് ഓഫിസര്‍, തഹസീല്‍ദാര്‍, മലിനീകരണ നിയന്ത്രണ ബോര്‍ഡ്, മൈനിങ് ആന്‍ഡ് ജിയോളജി വകുപ്പ്, കലക്ടര്‍ തുടങ്ങിയവര്‍ക്ക് പരാതി നല്‍കിയിരുന്നു. എന്നാല്‍, ഒരു നടപടിയുമുണ്ടാകാത്ത സാഹചര്യത്തിലാണ് തിങ്കളാഴ്ച വാഹനങ്ങള്‍ തടഞ്ഞത്. രാവിലെ ആരംഭിച്ച സമരം ചൊവ്വാഴ്ച തൊടുപുഴ സി.ഐയുടെ സാന്നിധ്യത്തില്‍ ചര്‍ച്ച നടത്തി പ്രശ്നം പരിഹരിക്കാമെന്ന ഉറപ്പില്‍ വൈകീട്ടോടെ അവസാനിപ്പിച്ചു. അതുവരെ പാറമടയുടെ പ്രവര്‍ത്തനം നിര്‍ത്താനും പൊലീസ് നിര്‍ദേശിച്ചു. യൂത്ത് കോണ്‍ഗ്രസ് മണ്ഡലം പ്രസിഡന്‍റ് ലിജോ ജോസ് മഞ്ചപ്പള്ളി, ഡി.സി.സി സെക്രട്ടറി ചാര്‍ളി ആന്‍റണി, മണ്ഡലം സെക്രട്ടറി ഡിയോണ്‍ തോമസ്, ടിജോ പുന്നന്താനം, ജിമ്മി വെട്ടുകാട്ടില്‍, സിജോ കോട്ടൂര്‍ എന്നിവര്‍ നേതൃത്വം നല്‍കി.