ഇടുക്കി റവന്യൂ ജില്ലാ സ്കൂള്‍ കായികമേള : തൊടുപുഴക്ക് ഓവറോള്‍ കിരീടം

അറക്കുളം: വണ്ണപ്പുറത്തിന്‍െറ കരുത്തില്‍ തുടര്‍ച്ചയായി ഏഴാം തവണയും തൊടുപുഴ വിദ്യാഭ്യാസ ഉപജില്ലക്ക് ഓവറോള്‍ കിരീടം. രണ്ടു ദിവസങ്ങളിലായി അറക്കുളം സെന്‍റ് മേരീസ് സ്കൂള്‍ ഗ്രൗണ്ടില്‍ നടന്ന റവന്യൂ ജില്ലാ കായികമേളക്ക് തിരശ്ശീല വീണപ്പോള്‍ 286 പോയന്‍റ് നേടിയാണ് തൊടുപുഴ കിരീടം നിലനിര്‍ത്തിയത്. 30 സ്വര്‍ണവും 32 വെള്ളിയും 17 വെങ്കലവും തൊടുപുഴ നേടി. രണ്ടാം സ്ഥാനത്തുള്ള കട്ടപ്പന 228, മൂന്നാം സ്ഥാനക്കാരായ അടിമാലി 137 എന്നിങ്ങനെ പോയന്‍റുകള്‍ നേടി. കട്ടപ്പനയുടെ മെഡല്‍ പട്ടികയില്‍ 24 സ്വര്‍ണം, 23 വെള്ളി, 19 വെങ്കലവും ഉള്ളപ്പോള്‍ അടിമാലിക്ക് 16 സ്വര്‍ണവും 50 വെള്ളിയും ലഭിച്ചു. നെടുങ്കണ്ടം -52 പോയന്‍റ് (സ്വര്‍ണം -4, വെള്ളി -7, വെങ്കലം -9), അറക്കുളം -23 പോയന്‍റ് (സ്വര്‍ണം -1, വെള്ളി -4, വെങ്കലം -5), പീരുമേട് -23 (സ്വര്‍ണം -1, വെള്ളി -3, വെങ്കലം -7), മൂന്നാര്‍ -11 പോയന്‍റ് (സ്വര്‍ണം -1, വെള്ളി -2, വെങ്കലം -0). സ്കൂള്‍ തലത്തില്‍ ദ്രോണാചാര്യ തോമസ് മാഷ് പരിശീലകനായ വണ്ണപ്പുറം എസ്.എന്‍.എം വി.എച്ച്.എസ്.എസ് തുടര്‍ച്ചയായി ഏഴാം വര്‍ഷവും ചാമ്പ്യന്‍പട്ടം നിലനിര്‍ത്തി. 21 സ്വര്‍ണവും 23 വെള്ളിയും 13 വെങ്കലവും അടക്കം 182 പോയന്‍റാണ് ഇവര്‍ നേടിയത്. എന്‍.ആര്‍ സിറ്റി എസ്.എന്‍.വി.എച്ച്.എസ്.എസിനാണ് രണ്ടാം സ്ഥാനം. 86 പോയന്‍റുള്ള ഇവര്‍ക്ക് 12 സ്വര്‍ണവും അഞ്ചു വെള്ളിയും 11 വെങ്കലവും നേടാനായി. ഇരട്ടയാര്‍ എസ്.ടി.എച്ച്.എസ്.എസിനാണ് മൂന്നാം സ്ഥാനം. 9 സ്വര്‍ണം, 9 വെള്ളി, 8 വെങ്കലം അടക്കം 75 പോയന്‍റ് ഇവര്‍ക്കുണ്ട്.