കടലാസുകൾകൊണ്ടുള്ള കരവിരുതുകളുമായി സുരേഷ് രാമല്ലൂർ

പേരാമ്പ്ര: കടലാസുകൾ ഉപയോഗിച്ചുകൊണ്ട് കൗതുകകരമായ കരകൗശല വസ്തുക്കൾ നിർമിച്ച് വിസ്മയം തീർക്കുകയാണ് രാമല്ലൂരില െ കരുവാങ്കണ്ടി സുരേഷ്. തെങ്ങുകയറ്റ തൊഴിലാളിയായ സുരേഷ് ഒഴിവു സമയങ്ങളുപയോഗിച്ചാണ് പാഴ്‌വസ്തുക്കൾ, കടലാസുകൾ എന്നിവയിൽനിന്ന് നിരവധി അലങ്കാരവസ്തുക്കൾ നിർമിച്ചു കൊണ്ടിരിക്കുന്നത്. പ്രകൃതിസൗഹൃദങ്ങളായ കുരുത്തോലക്കണ്ണികൾ, വർണാഭമായ കടലാസുകൾ, തുണികൾ എന്നിവ ഉപയോഗിച്ച് നിരവധി വേദികളും നഗരികളും സുരേഷ് അലങ്കരിച്ചിട്ടുണ്ട്. വിദ്യാലയം പ്രതിഭകളോടൊപ്പം പരിപാടികളുടെ ഭാഗമായി രാമല്ലൂർ ജി.എൽ.പി സ്കൂളിലെ വിദ്യാർഥികൾ കെ.കെ. സുരേഷിനെ വീട്ടിലെത്തി ആദരിച്ചു. തൻെറ കരവിരുതിൽ വിരിഞ്ഞ വിവിധങ്ങളായ അലങ്കാരനിർമാണ വസ്തുക്കൾ വിദ്യാർഥികൾക്ക് പരിചയപ്പെടുത്തി. സ്കൂൾ ലീഡർ സീതാലക്ഷ്മി പൊന്നാടയണിയിച്ചു. പ്രധാനാധ്യാപകൻ കെ. ബഷീർ, എം.പി.ടി.എ പ്രസിഡൻറ് ബിനിത ബിനീഷ്, പി.ടി.കെ പുഷ്പ, കെ. മധു, വി.പി. അബ്ദുൽ ബാരി എന്നിവർ നേതൃത്വം നൽകി.