ബാബരി കേസ്​: ഇടപെടൽ ഹരജി നൽകുമെന്ന്​ ഐ.എൻ.എൽ

കോഴിക്കോട്: ബാബരി കേസിൽ സുപ്രീംകോടതി വിധിക്കെതിരെ പാർട്ടി ദേശീയ നേതൃത്വവുമായി ആലോചിച്ച് 'ഇൻറർവീനിങ് പെറ്റീഷൻ' (ഇടപെടൽ ഹരജി) നൽകാൻ ഐ.എൻ.എൽ സംസ്ഥാന പ്രവർത്തക സമിതി യോഗം തീരുമാനിച്ചു. ബാബരി കേസിൻെറ വിധി സംബന്ധിച്ച് തിരുവനന്തപുരം, എറണാകുളം, കണ്ണൂർ എന്നിവിടങ്ങളിൽ ചർച്ചാസമ്മേളനം സംഘടിപ്പിക്കും. ബാബരി, ശബരിമല വിഷയങ്ങളിൽ സുപ്രീംകോടതിയുടെ ഏറ്റവും ഒടുവിലത്തെ വിധികൾ, ഭരണഘടന വിഭാവനം ചെയ്യുന്ന ജനാധിപത്യ-മതേതര മൂല്യങ്ങൾ അട്ടിമറിക്കുന്നതും ജുഡീഷ്യറിയുടെ വിശ്വാസ്യതക്ക് കോട്ടം തട്ടിക്കുന്നതുമാണ്. ശബരിമല വിഷയത്തിൽ റിവ്യൂ ഹരജി തീർപ്പാക്കുന്നതിനുപകരം പുതിയ ഏഴു വിഷയങ്ങളിൽ വിപുലമായ ബെഞ്ച് തീർപ്പുകൽപിക്കാൻ വിട്ടത് വിഷയം കൂടുതൽ സങ്കീർണമാക്കുകയാണ് ചെയ്യുകയെന്നും യോഗം വിലയിരുത്തി. സംസ്ഥാന പ്രസിഡൻറ് പ്രഫ. എ.പി. അബ്ദുൽ വഹാബ് അധ്യക്ഷത വഹിച്ചു. ദേശീയ ജന. സെക്രട്ടറി അഹമ്മദ് ദേവർകോവിൽ, ദേശീയ ട്രഷറർ ഡോ. എ.എ. അമീൻ തുടങ്ങിയവർ സംസാരിച്ചു. ജനറൽ സെക്രട്ടറി കാസിം ഇരിക്കൂർ സ്വാഗതവും സെക്രട്ടറി നാസർ കോയ തങ്ങൾ നന്ദിയും പറഞ്ഞു.