പണം കിട്ടിയില്ല; സപ്ലൈകോക്ക്​ നെല്ല് നല്‍കിയ കര്‍ഷകര്‍ വെട്ടിലായി

ആയഞ്ചേരി: സപ്ലൈകോക്ക് നെല്ല് നല്‍കിയ കര്‍ഷകര്‍ക്ക് മാസങ്ങളായിട്ടും പണം കിട്ടിയില്ല. തറോപ്പൊയില്‍ നെല്ലുല്‍പ ാദക സമിതിയുടെ കീഴിലുള്ള നൂറുകണക്കിന് കര്‍ഷകര്‍ക്കാണ് ആറുമാസമായിട്ടും പണം ലഭിക്കാത്തത്. പുതിയ സീസണില്‍ നെല്‍കൃഷിക്കുള്ള ഒരുക്കങ്ങള്‍ തുടങ്ങിയിട്ടും പണം ലഭിക്കാത്തതുകാരണം കര്‍ഷകര്‍ സാമ്പത്തിക പ്രതിസന്ധിയിലാണ്. മുന്‍വര്‍ഷങ്ങളില്‍ രണ്ടു മാസത്തിനുള്ളില്‍ പണം ലഭിക്കാറുണ്ടായിരുന്നു. ഇത് പ്രതീക്ഷിച്ച് നെല്ല് നല്‍കിയ കര്‍ഷകരാണ് വെട്ടിലായത്. നെല്ല് നല്‍കിയ കര്‍ഷകരോട്, കിട്ടാനുള്ള പണം ബാങ്കില്‍നിന്ന് കടം വാങ്ങാന്‍ അധികൃതര്‍ നിര്‍ദേശിച്ചിരുന്നു. ഇങ്ങനെയെടുക്കുന്ന പണത്തിൻെറ പലിശ സര്‍ക്കാര്‍ നല്‍കുമെന്നും പറഞ്ഞിരുന്നു. ചുരുക്കം കര്‍ഷകര്‍ മാത്രമാണ് ബാങ്കില്‍നിന്ന് പണം കടം വാങ്ങിയത്. ഭൂരിപക്ഷം കര്‍ഷകരും സര്‍ക്കാറില്‍നിന്ന് പണം കിട്ടുമെന്ന പ്രതീക്ഷയില്‍ കാത്തിരിക്കുകയാണ്. ഈ വര്‍ഷത്തെ മകരം, പുഞ്ച കൃഷിക്കുള്ള ഒരുക്കങ്ങള്‍ നടക്കുകയാണ്. നിലം ഒരുക്കാനും മറ്റ് കൃഷിജോലികള്‍ ചെയ്യാനും പണം ആവശ്യമുള്ളപ്പോഴാണ് കര്‍ഷകര്‍ നട്ടംതിരിയുന്നത്. നെല്ല് നല്‍കിയ കര്‍ഷകര്‍ക്ക് ഉടന്‍ പണം നല്‍കണമെന്ന് തറോപ്പൊയില്‍ നെല്ലുല്‍പാദക സമിതി ആവശ്യപ്പെട്ടു.