താമരശ്ശേരി ചുരം നവീകരണ പ്രവൃത്തികൾക്ക് 33 കോടി രൂപയുടെ അംഗീകാരം

ഈങ്ങാപ്പുഴ: ദേശീയപാത വകുപ്പിൻെറ 2019-20 വാർഷിക പദ്ധതിയിൽ ഉൾപ്പെടുത്തി എൻ.എച്ച് 766ൽ ഉൾപ്പെട്ട താമരശ്ശേരി ചുരം ഉൾപ്പെടുന്ന ഭാഗത്തിൻെറ നവീകരണപ്രവൃത്തിക്ക് 33 കോടി രൂപയുടെ അനുമതി. അടിവാരം മുതൽ ചുണ്ടേൽ വരെയുള്ള ഭാഗമാണ് പ്രവൃത്തി നടക്കുക. വീതികൂട്ടൽ, സൈഡ് കെട്ടൽ, ആവശ്യമായ ഇടങ്ങളിൽ റോഡിൻെറ ലെവൽ ഉയർത്തൽ തുടങ്ങിയ പ്രവൃത്തികളാണ് നടക്കുക. ബി.എം ആൻഡ് ബി.സി നിലവാരത്തിൽ റോഡ് ടാർ ചെയ്യും. എസ്റ്റിമേറ്റ് തയാറാക്കി വരികയാണ്. എസ്റ്റിമേറ്റ് സമർപ്പിക്കുന്ന മുറക്ക് സാങ്കേതികാനുമതി ലഭിച്ച് ടെൻഡർ ചെയ്ത് പ്രവൃത്തി ആരംഭിക്കുമെന്ന് ജോർജ് എം. തോമസ് എം.എൽ.എ അറിയിച്ചു.