ഗാര്‍ഹിക പീഡന നിരോധന നിയമപ്രകാരം ഭര്‍ത്താവും മാതാവും അറസ്റ്റില്‍

പൂച്ചാക്കല്‍: ഗാര്‍ഹിക പീഡന നിരോധന നിയമപ്രകാരം ഭര്‍ത്താവും മാതാവും അറസ്റ്റില്‍. പാണാവള്ളി പഞ്ചായത്ത് പന്ത്രണ്ടാം വാര്‍ഡ് പുതുശ്ശേരില്‍ സജിത്(42) മാതാവ് ചന്ദ്രമതി എന്നിവരെയാണ് പൂച്ചാക്കല്‍ എസ്.ഐ ജി. സുരേഷ്കുമാറിന്‍െറ നേതൃത്വത്തിലുള്ള പൊലീസ് സംഘം ഞായറാഴ്ച അറസ്റ്റ് ചെയ്തത്. സജിത്തിന്‍െറ ഭാര്യ ബീനയുടെ പരാതിയെ തടര്‍ന്നാണ് ഇരുവരെയും അറസ്റ്റ് ചെയ്തത്. വിവാഹ സമയത്ത് ഇരുപത് പവന്‍ സ്വര്‍ണവും രണ്ട് ലക്ഷം രൂപയും നല്‍കിയിരുന്നു. പിന്നീട് ഭാര്യയുടെ വീട്ടുകാരില്‍നിന്നും കുടുംബ ഓഹരിവിഹിതം ആവശ്യപ്പെട്ട് പതിനൊന്നര ലക്ഷം രൂപയും കൈക്കലാക്കി. വീണ്ടും പണം ആവശ്യപ്പെട്ട് പീഡിപ്പിക്കാറുണ്ടെന്ന് ഭാര്യ നല്‍കിയ പരാതിയില്‍ പറയുന്നു. നിര്‍ബന്ധിച്ച് ഗര്‍ഭഛിദ്രം നടത്തിയതിനെ തുടര്‍ന്നാണ് കഴിഞ്ഞ ദിവസം പൂച്ചാക്കല്‍ പൊലീസില്‍ പരാതി നല്‍കിയത്. ചേര്‍ത്തല സെക്കന്‍ഡ് ക്ളാസ് മജിസ്ട്രേറ്റ് കോടതിയില്‍ ഹാജരാക്കിയ ഇരുവരെയും റിമാന്‍ഡ് ചെയ്തു.