പാലത്തിന്‍െറ വശങ്ങളില്‍ സ്ളാബ് നിര്‍മിച്ച് വീതികൂട്ടാനുള്ള നീക്കത്തില്‍ പ്രതിഷേധം

തുറവൂര്‍: പാലം പുനര്‍ നിര്‍മി ക്കാതെ വശങ്ങളില്‍ സ്ളാബ് നിര്‍മിച്ച് വീതികൂട്ടാനുള്ള നീക്കത്തില്‍ പ്രതിഷേധം ശക്തമാകുന്നു. തുറവൂര്‍- കുമ്പളങ്ങി റോഡില്‍ ചങ്ങരം കലുങ്ക് പാലത്തിന്‍െറ വശങ്ങളില്‍ സ്ളാബ് നിര്‍മിച്ച് വീതി കൂട്ടുന്നതിനെതിരെയാണ് പ്രതിഷേധം. നൂറോളം വര്‍ഷം പഴക്കമുള്ള പാലമാണിത്. ഇതിനൊപ്പം നിര്‍മിച്ച വല്ളേത്തോട് പാലം 15 വര്‍ഷം മുമ്പ് പുനര്‍ നിര്‍മിച്ചിരുന്നു. അപകടാവസ്ഥയിലുള്ള ചങ്ങരം കലുങ്ക് പാലം പൊളിച്ച് വീതികൂട്ടി നിര്‍മിക്കണമെന്നാണ് യാത്രക്കാരുടെ ആവശ്യം. പാലത്തിന്‍െറ ഇരുവശത്തുമുണ്ടായിരുന്ന കലുങ്കുകള്‍ പലപ്പോഴായി വാഹനമിടിച്ച് ഇല്ലാതായി. രാത്രി വാഹനം നിയന്ത്രണംവിട്ട് തോട്ടില്‍ വീഴുകയുമുണ്ടായിട്ടുണ്ട്. പാലത്തിന്‍െറ അടിഭാഗത്ത് പൊട്ടലും വിള്ളലുമുണ്ട്. പുനര്‍ മിര്‍മാണത്തിന് അടിയന്തര നടപടി സ്വീകരിക്കണമെന്ന് നാട്ടുകാരും വാഹനയാത്രക്കാരും ആവശ്യപ്പെട്ടു.