മുസ്ലിം ന്യൂനപക്ഷ മെഡിക്കല്‍ കോളജുകളോട് വിവേചനം കാണിക്കരുത് –എം.ഇ.എസ് യുവജന വിഭാഗം

ആലപ്പുഴ: മെഡിക്കല്‍ കോളജ് പ്രവേശത്തില്‍ ന്യൂനപക്ഷ പദവിയിലുള്ള ക്രിസ്ത്യന്‍, മുസ്ലിം സ്വാശ്രയ മെഡിക്കല്‍ കോളജുകളോട് രണ്ട് നയം മുഖ്യമന്ത്രി സ്വീകരിക്കുന്നത് സാമൂഹിക നീതിക്ക് വിരുദ്ധമാണെന്ന് എം.ഇ.എസ് യുവജന വിഭാഗം ജില്ലാകമ്മിറ്റി അഭിപ്രായപ്പെട്ടു. ന്യൂനപക്ഷ പദവിയുള്ള എം.ഇ.എസ് മെഡിക്കല്‍ കോളജ് സര്‍ക്കാര്‍ സീറ്റ് വിട്ടുകൊടുക്കുന്നില്ളെന്നും ക്രിസ്ത്യന്‍ മാനേജ്മെന്‍റ് നല്‍കിയെന്നുമുള്ള ചര്‍ച്ച സത്യത്തിന് നിരക്കാത്തതാണ്. 13 വര്‍ഷമായി 50 ശതമാനം സീറ്റില്‍ സര്‍ക്കാര്‍ നിശ്ചയിച്ച ഫീസ് നിരക്കിലാണ് എം.ഇ.എസ് മെഡിക്കല്‍ കോളജില്‍ പ്രവേശം നല്‍കിയത്. ക്രിസ്ത്യന്‍ സ്വാശ്രയ മെഡിക്കല്‍ കോളജുമായി സര്‍ക്കാര്‍ ഉണ്ടാക്കിയ കരാര്‍ സാമൂഹികനീതിക്ക് വിരുദ്ധമാണ്. സര്‍ക്കാര്‍ മെറിറ്റില്‍ അഡ്മിഷന്‍ നേടുന്ന സമര്‍ഥരും സാമ്പത്തിക പരാധീനതയുമുള്ള വിദ്യാര്‍ഥികള്‍ക്കും കുറഞ്ഞ ഫീസില്‍ പഠിക്കാനുള്ള അവസരം നല്‍കാന്‍ മുഖ്യമന്ത്രി തയാറാകണം. യോഗത്തില്‍ എം.എസ്. ഷാനവാസ് അധ്യക്ഷത വഹിച്ചു. എ. ഹബീബ് മുഹമ്മദ്, ഇ. അബ്ദുല്‍ അസീസ്, ഡോ. ഫിറോസ് മുഹമ്മദ്, എ.എം. റഷീദ്, എ. നൗഷാദ്, മുബാറക് ഹാജി എന്നിവര്‍ സംസാരിച്ചു.