ഗുണ്ടാ ആക്രമണത്തില്‍ യുവാവിന് ഗുരുതര പരിക്ക്

ആലപ്പുഴ: ഗുണ്ടാ ആക്രമണത്തില്‍ യുവാവിന് ഗുരുതര പരിക്കേറ്റു. ആലപ്പുഴ പഴവീട് ഉണ്ണിയാന്തറ വീട്ടില്‍ പ്രദീപിന്‍െറ മകന്‍ പ്രണവിനാണ്(20) വെട്ടേറ്റത്. തിങ്കളാഴ്ച ഉച്ചയോടെ കൈതവനക്ക് കിഴക്കായിരുന്നു സംഭവം. പ്രണവിനെ എറണാകുളത്തെ സ്വകാര്യ ആശുപത്രിയില്‍ പ്രവേശിപ്പിച്ചു. ആറംഗ സംഘമാണ് ആക്രമണം നടത്തിയത്. കൈകള്‍ക്കും കാലിനുമാണ് വെട്ടേറ്റത്. രണ്ട് ബൈക്കുകളിലത്തെിയ സംഘം ആക്രമണം നടത്തിയശേഷം രക്ഷപ്പെട്ടു. നാട്ടുകാരും മറ്റും ചേര്‍ന്നാണ് ആലപ്പുഴ മെഡിക്കല്‍ കോളജ് ആശുപത്രിയില്‍ എത്തിച്ചത്. പിന്നീട് എറണാകുളത്തെ സ്വകാര്യ ആശുപത്രിയിലേക്ക് കൊണ്ടുപോയി. തിരുവമ്പാടി സ്വദേശിയായ ഒരാളെ മര്‍ദിച്ചതിന്‍െറ പ്രതികാരമാണ് ഇതെന്ന് സൗത് പൊലീസ് പറഞ്ഞു. പ്രണവിന്‍െറ മൊഴിയുടെ അടിസ്ഥാനത്തില്‍ തിരുവമ്പാടി സ്വദേശികളായ ആറുപേര്‍ക്കെതിരെ പൊലീസ് കേസെടുത്തു.