നാടെങ്ങും സ്വാതന്ത്ര്യദിനം ആഘോഷിച്ചു

ആലപ്പുഴ: വൈവിധ്യമാര്‍ന്ന പരിപാടികളോടെ നാടെങ്ങും സ്വാതന്ത്ര്യദിനം ആഘോഷിച്ചു. ആലപ്പുഴ പൊലീസ് പരേഡ് ഗ്രൗണ്ടില്‍ നടന്ന ചടങ്ങില്‍ മന്ത്രി വി.എസ്. ശിവകുമാര്‍ സ്വാതന്ത്ര്യദിന സന്ദേശം നല്‍കി. ദേശീയപതാക ഉയര്‍ത്തിയശേഷം വിവിധ ട്രൂപ്പുകളുടെ സ്വാതന്ത്ര്യദിന പരേഡ് പരിശോധിച്ച മന്ത്രി അഭിവാദ്യം സ്വീകരിച്ചു. പൊലീസിന്‍െറയും എക്സൈസിന്‍െറയും എന്‍.സി.സി, സ്റ്റുഡന്‍റ് പൊലീസ് കാഡറ്റ്, സ്കൗട്ട് ആന്‍ഡ് ഗൈഡ്, റെഡ് ക്രോസ്, കബ്-ബുള്‍ബുള്‍ എന്നിവയുടെയുമായി 37 പ്ളാറ്റൂണുകളും ആറ് ബാന്‍ഡ് പ്ളാറ്റൂണുകളും പരേഡില്‍ പങ്കെടുത്തു. റിപ്പബ്ളിക് ദിനത്തില്‍ പ്രഖ്യാപിച്ച മുഖ്യമന്ത്രിയുടെ പൊലീസ് മെഡലിന് അര്‍ഹരായ ആലപ്പുഴ നര്‍ക്കോട്ടിക് സെല്‍ സബ് ഇന്‍സ്പെക്ടര്‍ എസ്. അബ്ദുല്‍ നാസര്‍, അമ്പലപ്പുഴ എസ്.ഐ ജെ. രാധാകൃഷ്ണന്‍ എന്നിവര്‍ക്ക് മന്ത്രി പുരസ്കാരം നല്‍കി. പരേഡില്‍ മികച്ച പ്രകടനം കാഴ്ചവെച്ചവര്‍ക്ക് ട്രോഫിയും നല്‍കി. പരേഡിലെ പ്രകടനത്തിന് ട്രോഫി നേടിയവര്‍ (വിഭാഗം, പ്ളാറ്റൂണ്‍, സ്ഥാപനം എന്നീ ക്രമത്തില്‍): പൊലീസ് -ജില്ലാ സായുധസേന, എന്‍.സി.സി സീനിയര്‍ ബോയ്സ് -പുന്നപ്ര കാര്‍മല്‍ പോളിടെക്നിക്, എന്‍.സി.സി സീനിയര്‍ ഗേള്‍സ് -ആലപ്പുഴ എസ്.ഡി കോളജ്, സ്റ്റുഡന്‍റ് പൊലീസ് കാഡറ്റ് -പുന്നപ്ര അംബേദ്കര്‍ മെമ്മോറിയല്‍ മോഡല്‍ റെസിഡന്‍ഷ്യല്‍ സ്കൂള്‍, എന്‍.സി.സി ജൂനിയര്‍ ബോയ്സ് -ആലപ്പുഴ ലിയോ തേര്‍ട്ടീന്ത് എച്ച്.എസ്.എസ്, എന്‍.സി.സി ജൂനിയര്‍ ഗേള്‍സ് -തിരുവമ്പാടി എച്ച്.എസ്.എസ്, സ്കൗട്ട് -ആലപ്പുഴ ലിയോ തേര്‍ട്ടീന്ത് എച്ച്.എസ്.എസ്, റെഡ് ക്രോസ്, ഗൈഡ്-ആലപ്പുഴ സെന്‍റ് ജോസഫ്സ് ജി.എച്ച്.എസ്.എസ്. ഓവറോള്‍ പ്രകടനം -കാര്‍മല്‍ പോളിടെക്നിക്. ബാന്‍ഡ് -ആലപ്പുഴ ലിയോതേര്‍ട്ടീന്ത് ഇംഗ്ളീഷ് മീഡിയം സ്കൂള്‍ കാളാത്ത്. പൊതുവിദ്യാഭ്യസ വകുപ്പും നെഹ്റു യുവകേന്ദ്രയും സംഘടിപ്പിച്ച ദേശഭക്തി ഗാനാലാപന മത്സരത്തില്‍ ഒന്നാം സ്ഥാനം നേടിയ ആലപ്പുഴ സെന്‍റ് ആന്‍റണീസ് ഗേള്‍സ് എച്ച്.എസിനും ദേശീയഗാനാലാപന മത്സരത്തില്‍ ഒന്നാം സ്ഥാനം നേടിയ പുന്നപ്ര ജ്യോതിനികേതന്‍ സീനിയര്‍ സെക്കന്‍ഡറി സ്കൂളിനുമുള്ള സമ്മാനങ്ങളും ചടങ്ങില്‍ വിതരണം ചെയ്തു. സായുധസേനാ പതാകദിന നിധിയിലേക്ക് ഏറ്റവും കൂടുതല്‍ തുക സംഭാവന ചെയ്ത വിദ്യാഭ്യാസ സ്ഥാപനമായ ആലപ്പുഴ സെന്‍റ് ജോസഫ്സ് ജി.എച്ച്.എസ്.എസിനും സര്‍ക്കാര്‍ സ്ഥാപനമായ സഹകരണസംഘം ജോയന്‍റ് രജിസ്ട്രാര്‍ ഓഫിസിനുമുള്ള റോളിങ് ട്രോഫികളും സമ്മാനിച്ചു. കലക്ടര്‍ എന്‍. പത്മകുമാര്‍, ജില്ലാ പൊലീസ് മേധാവി വി. സുരേഷ് കുമാര്‍, നഗരസഭാ ചെയര്‍പേഴ്സണ്‍ മേഴ്സി ഡയാന മാസിഡോ, എ.ഡി.എം ടി.ആര്‍. ആസാദ്, സംസ്ഥാന ബാലസാഹിത്യ ഇന്‍സ്റ്റിറ്റ്യൂട്ട് ഡയറക്ടര്‍ പ്രഫ. നെടുമുടി ഹരികുമാര്‍, സബ് കലക്ടര്‍ ഡി. ബാലമുരളി, മുന്‍ എം.എല്‍.എ എ.എ. ഷുക്കൂര്‍, നഗരസഭാ വൈസ് ചെയര്‍മാന്‍ ബി. അന്‍സാരി തുടങ്ങിയവര്‍ പങ്കെടുത്തു.