കവിത പുള്ളിക്കുട

ഓട്ടവീഴാത്തൊരു കുട വാങ്ങണം

എത്ര വര്‍ഷം നനഞ്ഞതാണ്...

അത്രയും നീരിറങ്ങിക്കിടപ്പുണ്ട് തലയില്‍

ഇനിയൊരു തുള്ളിപോലും വയ്യ

എന്നാലും

ആകാശപ്പുള്ളികള്‍ വാരിയെറിഞ്ഞ ആ പഴയ കുട

ആര്‍ക്കും കൊടുക്കില്ല

കുറെ നനയാതെ കാത്തതല്ലേ?

കുറെ നനച്ചതുമല്ലേ?

പെട്ടിയില്‍ ഇരുന്നോട്ടെ.

ആരും കാണാതെ ചൂടി

പുലരുമ്പോഴത്തെ മഴയില്‍

തൊടിയിലൂടെ ഓടാനുള്ളതാണ്.

വെളിച്ചമാകും മുന്‍പേ തിരിച്ചെത്തണം .

കാറുംകോളുമായി ഇന്ന് രാത്രി മഴപെയ്യും!

പെട്ടിയില്‍ നിന്നിറങ്ങാന്‍വെമ്പി

പുള്ളിക്കുട കാത്തിരിക്കുമ്പോള്‍

പെയ്യാതിരിക്കില്ല...

(കടപ്പാട്: ശബരീഷിന്‍െറ ഫെയിസ് ബുക്ക് വാള്‍)