തീയിൽ കുരുത്ത നാദിയ

ദോഹയിലെ പഞ്ചന​ക്ഷത്ര ഹോട്ടലായ റിറ്റ്​സ്​ കാൾട്ടണിന്‍റെ ​വിശാലമായ ഇടനാഴിയിൽ കാൽപന്തുകളിയിലെ ഇതിഹാസം കഫുവിനെയും അർജന്‍റിന മുൻ സൂപ്പർ താരം ഹാവിയർ മഷറാനോയെയും കാത്തിരിക്കുകയാണ്​ മാധ്യമപ്പട. ലോകകപ്പ്​ വേദിയായ ഖത്തറിന്‍റെ മണ്ണിൽ വിശ്വമേളക്ക്​ വിളംബരമായി അരങ്ങേറിയ ഫിഫ അറബ്​ കപ്പിന്‍റെ നിമിഷങ്ങ​ൾ ഒപ്പിയെടുക്കാനെത്തിയ മാധ്യമങ്ങളുടെ വലിയ സംഘമുണ്ട്​. സൂപ്പർതാരങ്ങൾ മുന്നിലെത്തും മുമ്പേ മൈക്കും, കാമറയുമായി ഒരുക്കങ്ങൾ പൂർത്തിയാക്കാനുള്ള തിരിക്കിലാണ്​ എല്ലാവരും.

അതിനിടയിലാണ്​ മാധ്യമപ്പടക്ക്​ മുന്നിലേക്ക്​ പുഞ്ചിരിക്കുന്ന മുഖവുമായി പാന്‍റും ടീ ഷർട്ടുമണിഞ്ഞ്​ ഒരു യുവതിയുടെ വരവ്. പെരുമഴക്ക്​ കാത്തിരിക്കുന്നവർക്കിടയിലേക്ക്​ പെയ്തിറങ്ങിയ ചാറ്റൽ മഴപോലെ അവളെത്തി. ആർക്കും തിരക്കില്ല. ചിത്രം പകർത്താനുള്ള ബഹളങ്ങളില്ല. പലയിടങ്ങളിൽനിന്ന്​ പലഭാഷകളിലായി ചോദ്യങ്ങളുയർന്നു. സ്പാനിഷിലും അറബിയിലും ഇംഗ്ലീഷിലും ഹിന്ദിയിലുമായി മുഴങ്ങിയ ചോദ്യങ്ങൾക്ക്​ വിവർത്തകരുടെ സഹായമില്ലാതെ പലഭാഷകളിൽ മറുപടി നൽകി അവർ മുന്നേറുന്നു. രാഷ്ട്രീയവും ജീവിതവും ഫുട്​ബാളും ലോകകപ്പും മെഡിസിനുമെല്ലാം ഭംഗിയുള്ള വാക്കുകളിൽ ഒഴുകിപ്പരക്കുന്നു. പന്തുമായി മൈതാനത്ത്​ കുതിക്കുന്ന ഒരു ഫുട്​ബാളറുടെ മെയ്​വഴക്കത്തോടെ ചോദ്യങ്ങളെ അവർ ഡ്രിബ്​ൾ ചെയ്ത്​ മറികടന്നു.

ഇത്, പ്രചോദനത്തിന്‍റെ ഇത്തിരിവെട്ടം തേടുന്നവർക്ക്​ ജീവിതോർജത്തിന്‍റെ സൂര്യൻ തന്നെ സമ്മാനിക്കാൻ ശേഷിയുള്ള നാദിയ നദീം എന്ന അഫ്​ഗാൻ ഫുട്​ബാളർ. അഫ്​ഗാനിലെ സമകാലിക രാഷ്ട്രീയവും, താലിബാൻ ഭരണം പിടിച്ചതും അഭയാർഥി പ്രവാഹവുമെല്ലാം ചോദ്യമായപ്പോൾ, ജീവിതംകൊണ്ട്​ മറുപടി നൽകിയ നാദിയക്ക്​ പറയാനും ഏറെയുണ്ടായിരുന്നു. അനുഭവങ്ങളുടെ സർവവിജ്ഞാന കോശംപോലെ പടർന്നുപന്തലിച്ച നാദിയയുടെ ആ ജീവിതം ഇങ്ങനെയാണ്​.

കൊലപാതകം, പലായനം

താലിബാൻ വീണ്ടും അഫ്​ഗാന്‍റെ ഭരണചക്രം കൈപ്പിടിയിലൊതുക്കിയ ഈ കാലത്ത്​ നാദിയയുടെ ഓർമകൾ പിന്നിലേക്ക്​ പോകും. ക്രോസ്​ ബാറിൽ തട്ടി മടങ്ങുന്ന ഒരു പന്തുപോലെ ആ ഓർമകൾ പിച്ച്​ ചെയ്യുന്നത്​ രണ്ടുപതിറ്റാണ്ട്​ പിറകിലേക്കാണ്​. കൃത്യമായി പറഞ്ഞാൽ സഹസ്രാബ്​ദത്തിന്‍റെ തുടക്കമായ 2000​. അഫ്​ഗാനെ രാഷ്ട്രീയമായും സാമൂഹികമായും നിലംപരിശാക്കിയ ഒന്നാം താലിബാൻ ഭരണകൂടത്തിന്‍റെ അവസാന നാളുകളായിരുന്നു അത്​.

പുരാതന സംസ്കാരങ്ങളും പാരമ്പര്യങ്ങളുമായി സഹസ്രനൂറ്റാണ്ടുകളുടെ സമ്പന്നമായ പശ്ചാത്തലങ്ങളുള്ള പരോപമിസസ്​ പർവതങ്ങളോട്​ ചേർന്ന ഹെരാത്​ പട്ടണത്തിൽ 1988ലായിരുന്നു നാദിയയുടെ ജനനം. അഫ്​ഗാൻ നാഷനൽ ആർമിയിൽ ജനറലായിരുന്നു പിതാവ്​ റബാൻ നദീം ഖാൻ. ഉമ്മയും അഞ്ചു​ പെൺമക്കളും അടങ്ങുന്ന സന്തുഷ്ട കുടുംബം. അഫ്​ഗാനിലെ കലങ്ങിമറിയുന്ന രാഷ്ട്രീയ സാഹചര്യങ്ങൾക്കൊപ്പം അവരുടെ ജീവിതവും മാറിമറിഞ്ഞു. അങ്ങനെ, 1996ൽ താലിബാൻ അധികാരത്തിലെത്തിയതോടെ സൈനിക ജനറലായ റബാൻ ഖാന്‍റെ കുടുംബവും നോട്ടപ്പുള്ളികളായി.

ബന്ധുക്കൾ ഏറെയും വിവിധ രാജ്യങ്ങളിലേക്ക്​ പലായനം ചെയ്​തെങ്കിലും സൈനികന്‍റെ ധൈര്യവും മനോബലവും പ്രകടിപ്പിച്ച റബാൻ ഖാൻ ജന്മനാട്ടിൽ തന്നെ തുടരുകയായിരുന്നു. അങ്ങനെയിരിക്കെ 2000ത്തിൽ ഒരു ദിനം ജോലി ആവശ്യാർഥം പുറ​ത്തുപോയ പിതാവിനെ ദിവസങ്ങൾ കഴിഞ്ഞിട്ടും കാണാനില്ല. കുടുംബത്തിൽ ആധിയായി. ഒടുവിലെത്തിയ ആ വേദനിപ്പിക്കുന്ന സത്യത്തിനുമുന്നിൽ മാതാവ്​ ഹാമിദ തളർന്നുപോയി. കരുത്തനായ ആ സൈനിക ജനറലിനെ താലിബാൻ വെടിവെച്ച്​ കൊലപ്പെടുത്തിയിരിക്കുന്നു. അപ്പോഴും നാദിയ ഉൾപ്പെടെ മക്കളാരും പിതാവ്​ ഇനിയി​ല്ലെന്ന്​ വിശ്വസിക്കാനൊരുക്കമല്ലായിരുന്നു.

പതിവായി ഹോക്കി കളിക്കുന്ന, ഒരു സൈനികന്‍റെ ആരോഗ്യമുള്ള അദ്ദേഹത്തെ ആർക്കും കീഴടക്കാനാവില്ലെന്ന വിശ്വാസത്തിലായിരുന്നു മക്കൾ. പക്ഷേ, പിതാവില്ലാത്ത വീട്ടിൽ, അഞ്ചു​ പെൺമക്കളുമായി ഇനി ജീവിതം സാധ്യമല്ലെന്നു​ തിരിച്ചറിഞ്ഞ ഹാമിദ അധികം വൈകാതെ രാജ്യം വിടാൻ തീരുമാനിച്ചു. ഏതാനും വസ്ത്രങ്ങളുമെടുത്ത്​ ഒരു രാത്രിയുടെ മറവിൽ ട്രക്കിൽ കയറി അഫ്​ഗാൻ വിട്ട് അവർ​ പാകിസ്താനി​ലെ പെഷാവറിലെത്തി. ബന്ധുക്കളുള്ള ലണ്ടനായിരുന്നു ലക്ഷ്യം. ഏതാനും മാസം പാകിസ്താനിൽ കഴിഞ്ഞ​ശേഷം, വ്യാജ പാസ്​പോർട്ട്​ സംഘടിപ്പിച്ച്​ പെഷാവറിൽനിന്നും ഇറ്റലിയിലെ മിലാനിലേക്ക്​ വിമാനം കയറി.

അവിടെനിന്നും ഏജന്‍റിന്‍റെ സഹായത്തോടെ ട്രക്കിൽ ലണ്ടനിലേക്ക്​. ദിവസങ്ങൾ പിന്നിട്ട യാത്രക്കിടയിൽ ഒരിടത്തെത്തിയപ്പോൾ ട്രക്ക്​ ഡ്രൈവർ പുറത്തിറങ്ങാൻ പറഞ്ഞു. ലണ്ടൻ എത്തിയെന്നുംപറഞ്ഞ്​ വിജനമായ പാതയിൽ ഞങ്ങളെ ഉപേക്ഷിച്ച്​ ട്രക്ക്​ കടന്നു. ​കുഞ്ഞുനാളിൽ കേട്ടുപതിഞ്ഞ 'ബിഗ്​ ബെൻ' ആയിരുന്നു ഞാൻ നോക്കിയത്​. പക്ഷേ, മരങ്ങൾ മാത്രം. വഴിയിൽ കണ്ട ഒരാളോട്​ ഇതേതാണ്​ സ്ഥലമെന്ന്​ ചോദിച്ചു. അദ്ദേഹം കേൾക്കാത്തൊരു പേരു പറഞ്ഞു. ഡെന്മാർക്​ എന്ന യൂറോപ്പിലെ കൊച്ചുരാജ്യമായിരുന്നു അത്​. അധികം വൈകാതെ അഭയാർഥി ക്യാമ്പിലെ വേലിപ്പടർപ്പുകൾക്കുള്ളിലായി ജീവിതം. മാസങ്ങളുടെ ഇടവേളയിൽ ഇത്രയും സംഭവിക്കുമ്പോൾ 11 വയസ്സായിരുന്നു നാദിയക്ക്​.

ആദ്യമായി കണ്ട ഫുട്​ബാൾ

യുദ്ധഭൂമിയിൽനിന്നും ഓടിയെത്തിയവരായതിനാൽ അഭയാർഥി ക്യാമ്പും ഒരു തടവുജീവിതമായിരുന്നു. ക്യാമ്പിനോട്​ ചേർന്നായിരുന്നു പ്രാദേശിക ഫുട്​ബാൾ ക്ലബായ ഗുഗ്​ ബോൾഡിന്‍റെ ഗ്രൗണ്ടും ഓഫിസും. കുറ്റിക്കാടിനും മരങ്ങൾക്കും അപ്പുറത്തെ ക്ലബിൽ നിന്നും കുട്ടികളും മുതിർന്നവരും പരിശീലിക്കുന്നതിന്‍റെയും കളിക്കുന്നതിന്‍റെയും ശബ്​ദങ്ങൾ മാത്രം കേൾക്കാം. ഇക്കാലത്ത്​ ക്യാമ്പിൽ രാവിലെ ഒമ്പതുമുതൽ ഒരുമണിവരെ ഭാഷാ പഠനമുണ്ടായിരുന്നു. അതുകഴിഞ്ഞാൽ ഒഴിവുസമയമാണ്​. പക്ഷേ, ഞങ്ങൾക്ക്​ പുറത്തേക്കു പോകാനോ മറ്റോ അനുവാദമില്ലായിരുന്നു.

അങ്ങനെ ഒരു ദിവസം സഹോദരിമാർക്കൊപ്പം കുറ്റിച്ചെടിയുടെ പടർപ്പുകളിൽ ഒളിച്ച്​ വേലിക്കരികിലെത്തി. അവിടെ ഇരുന്ന്​ അകലത്തെ ഫുട്​ബാൾ ക്യാമ്പിൽ കുട്ടികൾ പരിശീലിക്കുന്നത്​ നോക്കിയിരുന്നു. പെൺകുട്ടികൾ ഫുട്​ബാൾ കളിക്കുന്നത് അന്ന്​​ ആദ്യമായാണ്​ കാണുന്നത്​. 'പോണി ടെയ്​ൽ' മാതൃകയിൽ മുടികെട്ടിയ പെൺകുട്ടി പന്തിനെ മെരുക്കുന്നതും നോക്കി മണിക്കൂറുകൾ ഇരുന്നു. ഒരു നാൾ അവളെ പോ​ലെ കളിക്കാൻ കൊതിച്ചു. ഈ കാഴ്ചകൾ പതിവായി. ദൂരെനിന്നും നോക്കിക്കാണുന്നത്​ ക്യാമ്പിൽ സഹോദരിമാർക്കൊപ്പം പരിശീലിച്ചു. പുരുഷ ടീമിന്‍റെ കളിയും പരിശീലനവും കണ്ടിരുന്നു. രണ്ടുമൂന്നു മാസം ഈ പതിവ്​ തുടർന്നു. അങ്ങനെ ഒരു ദിനം കോച്ചിനെ കണ്ട്​ പരിശീലനത്തിന്​ കൂട്ടുമോ എന്നു ചോദിക്കാൻ തീരുമാനിച്ചു. പക്ഷേ, ഭാഷ വശമില്ലായിരുന്നു. അല്ലെങ്കിലും ഫുട്​ബാളിന്​ എന്ത്​ ഭാഷ... ആംഗ്യത്തിലൂടെ ആവശ്യം ബോധിപ്പിച്ചു. ഒരു നിമിഷം എന്നെയും അദ്​ഭുതപ്പെടുത്തുന്നതായി പ്രതികരണം. കടന്നുവരാൻ പറഞ്ഞു. പറഞ്ഞറിയിക്കാനാവാത്ത സന്തോഷം. ജീവിതത്തി​ന്​ ടേണിങ്​ പോയന്‍റായി കോച്ചിന്‍റെ ആ 'വിളി'.

ദിവസവും പരിശീലനമായി. ക്യാമ്പിലെ ​ഓരോ കുട്ടിയെക്കാളും മികച്ചവൾ ആവ​ണമെന്നായിരുന്നു ലക്ഷ്യം. 11ാം വയസ്സിൽ ആറുമുതൽ എട്ടുമണിക്കൂർ വരെ പരിശീലനമായി. ഒാരോ ദിവസവും മെച്ചപ്പെട്ടുവന്നു. പന്തിനെ അനുസരിപ്പിച്ച്​ നാദിയ വിജയംകണ്ടുതുടങ്ങി. അങ്ങനെ യൂത്ത്​ ടീമിൽ ഇടം ലഭിച്ചു. അവിടെ നിന്നും കളി ശ്രദ്ധയിൽ പതിഞ്ഞതോടെ ബി52 ആൽബർഗ്​ എന്ന പ്രദേശത്തെ പ്രമുഖ ക്ലബിലെത്തി. അവിടെയായിരുന്നു പ്രഫഷനൽ ഫുട്​ബാളിലേക്കുള്ള തുടക്കം.

അഭയാർഥി ക്യാമ്പിൽനിന്നും തിരക്കേറിയ ലീഗ്​ ഫുട്​ബാളിന്‍റെ ഭാഗമായി ജീവിതം മാറി. അഫ്​ഗാനിലെ യുദ്ധഭൂമിയിൽനിന്നും പലായനം ചെയ്​തെത്തിയ കൗമാരക്കാരി ഡെന്മാർക്കിലെ ശ്രദ്ധേയ താരമായി വളർന്നു. അധികം വൈകാതെ പൗരത്വം നേടി 2009ൽ ദേശീയ ടീമിലും ഇടംപിടിച്ചു. രണ്ടാം ഡിവിഷൻ ക്ലബായ സ്​കോവ്​ബാകനിലും ഒന്നാം ഡിവിഷൻ ടീമായ ഫോർച്യുണയിലും കളിച്ച്​, ​യൂറോപ്പിലെ മുൻനിരക്കാരായ മാഞ്ചസ്​റ്റർ സിറ്റിയിലും, പാരിസ്​ സെന്‍റ്​ ജർമനിലും എത്തി നാദിയ നദീമിന്‍റെ പോരാട്ട ജീവിതം.

അന്താരാഷ്ട്ര ഫുട്ബാളിൽ 99 മത്സരങ്ങളിൽ നിന്ന് ഇതിനോടകം 38 ഗോളുകൾ നേടി ഡെന്മാർക്കിന്‍റെ 'ലേഡി പെലെ' ആയി മാറി. ഫ്രഞ്ച്​ ക്ലബായ പി.എസ്​.ജിയുടെ നായക വേഷത്തിലെത്തി ടീമിനെ ലീഗ് ചാമ്പ്യന്മാരാക്കി സൂപ്പർതാരമായി. യുദ്ധവും സംഘർഷവും എല്ലാം നഷ്ടപ്പെടുത്തിയ നാട്ടിൽനിന്നും ഒളിച്ചോടി, ശേഷം അവൾ കീഴടക്കിയത്​ ലോകഫുട്​ബാളിന്‍റെ സ്വപ്നകിരീടങ്ങൾ. ഗോളടിച്ചുകൂട്ടിയും കിരീടങ്ങൾ വെട്ടിപ്പിടിച്ചും നടത്തിയ കുതിപ്പിൽ കളിക്കളവും പുറംലോകവും അവൾ കാൽക്കീഴിലാക്കി. ഡെന്മാർക്​ ഫുട്​ബാളർ പുരസ്കാരം, നിരവധി രാജ്യാന്തര ബ്രാൻഡുകളുടെ അംബാസഡർ പദവി, സ്പോർട്സിനും ലിംഗസമത്വത്തിനും നൽകിയ സംഭാവനകൾക്ക്​ യുനെസ്കോയുടെ ആദരം, കായികലോകത്തെ ഏറ്റവും കരുത്തയായ വനിതകളിൽ ഒരാളായി ഫോബ്​സിന്‍റെ അംഗീകാരം... അങ്ങനെ നേട്ടങ്ങളായി ഓ​രോന്നും വെട്ടിപ്പിടിച്ചു.

'മൈ സ്​റ്റോറി'

ഫിഫ അറബ്​ കപ്പിൽ അതിഥിയായാണ്​ നാദിയ നദീം ഖത്തറിലെത്തിയത്​. വിവിധ പ്രചാരണ പരിപാടികളിൽ പ​ങ്കെടുത്ത അവർ ഖത്തർ അഭയംനൽകിയ അഫ്​ഗാനികളുടെ ക്യാമ്പിലുമെത്തി. 20 വർഷം മുമ്പ്​ സമാനമായ സാഹചര്യത്തിൽ രാജ്യം വിട്ട്​ ഓടി, സ്വപ്നങ്ങൾക്ക്​ പിറകെ തളരാതെ സഞ്ചരിച്ച്​ ലോകത്തെ ഏറ്റവും മികച്ച വനിത ഫുട്​ബാളർമാരിൽ ഒരാളായി മാറിയ തന്‍റെ കഥ അവരുമായി പങ്കുവെച്ചു. സുപ്രീം കമ്മിറ്റി സംഘടിപ്പിച്ച ചടങ്ങിന്‍റെ ഭാഗമായി ദോഹയിലെ അഫ്​ഗാൻ ക്യാമ്പിലെത്തിയ അവർ അനുഭവത്തിന്‍റെ വെളിച്ചത്തിൽ അവർക്ക്​ ഊർജം പകർന്നു. 'വീടും നാടും വിട്ട്​ വരുന്നത്​ ഒരിക്കലും എളുപ്പമല്ല. പ്രത്യേകിച്ച്​ എല്ലാം ഉപേ​ക്ഷിച്ച്​ വരാൻ നിർബന്ധിക്കപ്പെടുന്ന സാഹചര്യത്തിൽ. ​ഈ​പ്രതിസന്ധിയിൽ ലക്ഷ്യം എളുപ്പമല്ല. പക്ഷേ സാധ്യമാണ്. ലക്ഷ്യം നേടാൻ നിങ്ങൾ പ്രയത്നിക്കുന്നുവെങ്കിൽ ഒരുനാൾ അത്​ നിങ്ങളുടേതാവും. ഒരിക്കലും പ്രതീക്ഷ നഷ്ടപ്പെടരുത്. ചുറ്റിലും ഇരുട്ടായി തോന്നുമെങ്കിലും, നിങ്ങൾ വെളിച്ചത്തിനായി പരതുക. അതിശയകരമായ ജീവിതം മുന്നിലുണ്ട്​' -എല്ലാം നഷ്ടപ്പെട്ടവർക്ക്​ മുന്നിലിരുന്ന്​ നാദിയ ഇതു പറയുമ്പോൾ കൗമാരക്കാരുടെ കണ്ണിൽ പ്രതീക്ഷയുടെ തീജ്വാല മിന്നിമറിയുകയായിരുന്നു.

തന്‍റെ മാതൃമണ്ണിൽ സംഘർഷങ്ങളൊന്നുമില്ലാത്ത നല്ലനാളുകൾ തിരികെയെത്തും, തന്നെപ്പോലെ പുതുതലമുറയിലെ പെൺകുട്ടികൾ ആ മണ്ണിൽ പന്തുതട്ടും, എല്ലാം നഷ്ടപ്പെട്ട്​ ഓടിയ മണ്ണിലേക്ക്​ സമാധാനത്തോടെ തിരികെയെത്താൻ കഴിയും.... അഫ്​ഗാനിലെ സമകാലിക രാഷ്ട്രീയവുമായി ബന്ധപ്പെട്ട ചോദ്യങ്ങളോട്​ ശുഭാപ്തി വിശ്വാസത്തോടെ നാദിയയുടെ പ്രതികരണങ്ങൾ ഇങ്ങനെയായിരുന്നു. കളത്തിന്​ പുറത്തും ഇവർ ഉരുക്കുവനിതയാണ്​. ഡാനിഷ്​, ഇംഗ്ലീഷ്, ജർമൻ, പേർഷ്യൻ, ദാരി, ഉർദു, ഹിന്ദി, അറബിക്​, ഫ്രഞ്ച്​ എന്നീ ഒമ്പതു​ ഭാഷകൾ അനായാസം സംസാരിക്കുന്ന നാദിയ 33ാം വയസ്സിലും സജീവം.

അമേരിക്കൻ ക്ലബായ റേസിങ്​ ലൂസിവില്ലെയുടെ കളിക്കാരിയായി, ജീവിതപ്രചോദനം പകരുന്ന പ്രഭാഷകയായി, യുനെസ്​കോ ഗുഡ്​വിൽ അംബാസഡറായി, ​​ഖത്തർ ലോകകപ്പ്​ ഉൾപ്പെടെയുള്ള വലിയ മാമാങ്കങ്ങളുടെ പ്രചാരകയായി അങ്ങനെ നീളുന്ന തിരക്കുകൾ. ഫുട്​ബാളർ എന്ന കരിയറിനൊപ്പം പഠനവും കൈവിട്ടില്ല. കളിക്കൊപ്പം ജീവിതലക്ഷ്യമായി താലോലിച്ച ആതുരസേവകയുടെ കുപ്പായത്തിലും യോഗ്യതനേടി. ഖത്തറിലെ സന്ദർശനവും കഴിഞ്ഞ് അവർ​ നേരെ പറന്നത്​ ആർഹസ്​ സർവകലാശാലയിലെ മെഡിക്കൽ കോഴ്​സിന്‍റെ അവസാന വർഷ പരീക്ഷകൾക്കായിരുന്നു. ജനുവരിയോടെ ഡോക്ടർ ബിരുദവും ആ തലപ്പാവിൽ മറ്റൊരു പൊൻതൂവലായി ചേർക്കപ്പെടുന്നു. സജീവ ഫുട്​ബാളിന്‍റെ പടിയിറങ്ങുമ്പോൾ, ജനങ്ങളുടെ വേദന അരികെനിന്ന്​ ഒപ്പിയെടുക്കാൻ ഡോക്ടറുടെ വേഷമാണ്​ ഏറ്റവും നല്ലതെന്ന്​ നാദിയ പറയുന്നു.

ഹോളിവുഡിലെ ത്രില്ലർ സിനിമയുടെ കഥയെ പോലും വെല്ലുന്ന നാദിയയുടെ ജീവിത കഥ 'മൈ സ്​റ്റോറി' എന്ന പേരിൽ ആത്മകഥയായും, ഡോക്യൂമെന്‍ററി ഫിലിമായും ഇതിനകം ആസ്വാദകരിലെത്തി.

●

തീയിൽ കുരുത്ത പെണ്ണിന്‍റെ ജീവിതം വായിച്ച ഒരാൾ ട്വിറ്ററിൽ കുറിച്ചതിങ്ങനെ...'11ാം വയസ്സിൽ താലിബാന്‍റെ കരങ്ങളാൽ പിതാവിനെ നഷ്ടപ്പെട്ട ബാലിക, ഡെന്മാർക്കിലേക്ക്​ പലായനം ചെയ്ത കൗമാരം. ദേശീയ ടീമിനും ലോകപ്രശസ്ത ക്ലബുകൾക്കുമായി ഫുട്​ബാൾ കളിച്ച യൗവനം. പഠിച്ചു നേടിയ ഡോക്ടർ ബിരുദം, സംസാരിക്കുന്നത്​ ഒമ്പതു ഭാഷകൾ, ഫോബ്​സ്​ പട്ടികയിൽ ഇടം... നിങ്ങളുടെ മക്കൾ ഒരു റോൾമോഡലിനെ തേടുന്നുവെങ്കിൽ നാദിയ നദീമിനെ കാണിച്ചുകൊടുക്കുക...'