തുലാം പത്തിന് കാത്തുനിന്നില്ല കളിയാട്ടത്തിന് തുടക്കം

ശ്രീകണ്ഠപുരം: തുലാം പത്തിന് കാത്തുനിൽക്കാതെ ഇവിടെ മറ്റൊരു തെയ്യക്കാലത്തിന് തുടക്കമായി. ശ്രീകണ്ഠപുരം നിടിയേങ്ങ മേലാളിക്കാവിലാണ് കാലവും കണക്കുംതെറ്റിച്ചുള്ള കളിയാട്ടം നടന്നത്. ഉത്തരമലബാറിൽ തുലാം പത്തിന് കൊളച്ചേരി ചാത്തമ്പള്ളിക്കാവിൽ വിഷകണ്ഠൻ തെയ്യം കെട്ടിയാടുന്നതോടെയാണ് കളിയാട്ടക്കാലത്തിന് തുടക്കമാവുന്നത്.

ഈ പതിവ് തെറ്റിച്ചുകൊണ്ടാണ് നിടിയേങ്ങ മേലാളിക്കാവിൽ ബുധനാഴ്ച തെയ്യങ്ങൾ കെട്ടിയാടിയത്. ചിങ്ങം 25നാണ് മേലാളിക്കാവിൽ തെയ്യങ്ങൾ കെട്ടിയാടേണ്ടതെന്നും ഇത്തവണ ശുദ്ധി കാരണങ്ങളാലാണ് ഒരുമാസം വൈകി കന്നിയിൽ കളിയാട്ടം നടത്തിയതെന്നും ബന്ധപ്പെട്ടവർ പറഞ്ഞു.

നൂറ്റാണ്ടുകൾക്കുശേഷം കുറച്ച് വർഷങ്ങൾക്ക് മുമ്പാണ് ഈ കാവിൽ ചടങ്ങുകൾ ആരംഭിച്ചിരുന്നത്. ശംഭോങ്ങ്യാർ, തെയ്യത്താർ തുടങ്ങിയ തെയ്യക്കോലങ്ങളാണ് ഇവിടെ കെട്ടിയാടിയത്. കാടിന്റെ സൗന്ദര്യമുള്ള ഈ കാവിലെ ചടങ്ങുകളും വേറിട്ടതാണ്.

നാഗപൂജയും തേങ്ങയുടക്കലും ഇവിടത്തെ പ്രധാന ചടങ്ങാണ്. ഒട്ടേറെ ജൈവവൈവിധ്യമുള്ള മേലാളിക്കാവിൽ തുലാം പത്തിന് മുന്നേയെത്തിയ കളിയാട്ടം കാണാനും അനുഗ്രഹം വാങ്ങാനും നിരവധി പേരാണ് എത്തിയത്.