കഅ്​ബ കഴുകി; ചടങ്ങിൽ സൗദി കിരീടാവകാശി പങ്കാളിയായി

ജിദ്ദ: ഭക്തിസാന്ദ്രമായ അന്തരീക്ഷത്തിൽ കഅ്​ബ കഴുകി. സൗദി ഭരണാധികാരി സൽമാൻ രാജാവി​നു വേണ്ടി കിരീടാവകാശി അമീർ മുഹമ്മദ്​ ബിൻ സൽമാൻ ചടങ്ങിൽ ​പങ്കെടുത്തു. കായിക മന്ത്രി അമീർ അബ്​ദുൽ അസീസ്​ ബിൻ തുർക്കിയോടൊപ്പം ഹറമിലെത്തിയ​ കിരീടാവകാശിയെ ഇരുഹറം കാര്യാലയ മേധാവി ഡോ. അബ്​ദുറഹ്​മാൻ അൽസുദൈസ്​ സ്വീകരിച്ചു.

ഹറമിലെത്തിയ ഉടനെ കിരീടാവകാശി കഅ്​ബ പ്രദക്ഷിണം ചെയ്​തു. ത്വവാഫിന്റെ രണ്ട്​ റക്​അത്ത്​ നമസ്​കരിച്ചു. ശേഷം കഅ്​ബക്കുള്ളിൽ പ്രവേശിച്ചു. കഅ്​ബ കഴുകുന്നതിൽ പങ്കാളിയായി.

ത്വാഇഫ് ഗവർണർ അമീർ സഊദ് ബിൻ നഹാർ, ജിദ്ദ ഗവർണർ സഊദ് ബിൻ അബ്​ദുല്ല ബിൻജലാവി, പണ്ഡിത സഭാംഗങ്ങളായ​ ശൈഖ്​ സാലിഹ് ബിൻ അബ്​ദുല്ല ബിൻ ഹുമൈദ്, ശൈഖ്​ അബ്​ദുല്ല ബിൻ മുഹമ്മദ് അൽമുത്‌ലഖ്, ശൈഖ്​ സഅദ് ബിൻ നാസിർ അൽശത്​രി, ശൈഖ്​ ബന്ദർ ബിൻ അബ്​ദുൽ അസീസ് ബലില, കഅ്​ബയുടെ പരിചാരകൻ എന്നിവരും ചടങ്ങിൽ പങ്കാളികളായി.