സകാത്തുൽ ഫിത്വർ

ഈദുൽ ഫിത്വറിനോടനുബന്ധിച്ച് മുസ്‍ലിംകൾ നൽകുന്ന നിർബന്ധ ദാനമാണ് സകാത്തുൽ ഫിത്വർ. നോമ്പവസാനിപ്പിക്കുക മുഖേന നിർബന്ധമാകുന്ന സകാത്ത് എന്നാണ് സകാത്തുൽ ഫിത്വർ എന്ന വാക്കിനർഥം. പെരുന്നാൾ ദിവസത്തെ ചെലവ് കഴിഞ്ഞ് സകാത്തുൽ ഫിത്വർ നൽകാൻ സാമ്പത്തിക ശേഷിയുള്ള എല്ലാവരും അത് നൽകൽ നിർബന്ധമാകുന്നു.

സ്ത്രീ പുരുഷ ഭേദമന്യേ കുട്ടികൾക്കും വലിയവർക്കുമൊപ്പം അത് നൽകണം. സാധാരണ സകാത്തും സകാത്തുൽ ഫിത്വറും തമ്മിൽ വ്യത്യാസമുണ്ട്. സകാത്ത് നിർബന്ധമാകുന്നത് ഒരാളുടെ സാമ്പത്തിക ശേഷി പരിഗണിച്ചാണെങ്കൽ സകാത്തുൽ ഫിത്വർ ആളുകളുടെ എണ്ണമനുസരിച്ചാണ് നൽകേണ്ടത്.

സാധാരണ സകാത്തിൽ നിന്ന് വ്യത്യസ്തമായ ഒരു ലക്ഷ്യം കൂടി സകാത്തുൽ ഫിത്വറിനുണ്ട്. നോമ്പുകാരന്‍റെ നോമ്പ് വേളയിൽ സംഭവിച്ചേക്കാവുന്ന വീഴ്ചകൾക്ക് പരിഹാരമാവുക എന്നതാണത്. ‘നോമ്പുകാരന് അനാവശ്യങ്ങളിൽ നിന്നും മ്ലേഛവൃത്തികളിൽ നിന്നുമുള്ള പരിശുദ്ധിയായും അഗതികൾക്ക് ആഹാരമായും റസൂൽ (സ) സകാത്തുൽ ഫിത്വർ നിർബന്ധമാക്കി’.

മുസ്‍ലി​മാ​യ ഒ​രു വ്യ​ക്തി ത​നി​ക്ക് വേ​ണ്ടി​യും താ​ൻ ചെ​ല​വി​ന് കൊ​ടു​ക്ക​ൽ നി​ർ​ബ​ന്ധ​മാ​യ എ​ല്ലാ​വ​ർ​ക്കു​വേ​ണ്ടി​യും സ​കാ​ത്തു​ൽ ഫി​ത്വ​ർ ന​ൽ​കേ​ണ്ട​താ​ണ്. ഓ​രോ നാ​ട്ടി​ലെ​യും പ്ര​ധാ​ന ഭ​ക്ഷ്യ വ​സ്തു​വാ​ണ് ന​ൽ​കേ​ണ്ട​ത്.. ‘പെ​രു​ന്നാ​ൾ ദി​വ​സം പാ​വ​ങ്ങ​ളു​ടെ പ​ട്ടി​ണി​യ​ക​റ്റു​ക’ എ​ന്ന​താ​ണ് ഇ​തി​ന്‍റെ ഉ​ദ്ദേ​ശ്യം. ഭ​ക്ഷ​ണ സാ​ധ​നം ന​ൽ​കു​ന്ന​തു​പോ​ലെ അ​തി​ന്‍റെ വി​ല ന​ൽ​കി​യാ​ലും അ​ത് സാ​ധി​ക്കു​ന്ന​താ​ണ്. മാ​ത്ര​മ​ല്ല, ചി​ല​പ്പോ​ൾ ദ​രി​ദ്ര​​രെ സം​ബ​ന്ധി​ച്ചേ​ട​ത്തോ​ളം പ​ണം ല​ഭി​ക്കു​ന്ന​താ​യി​രി​ക്കും അ​വ​ർ​ക്ക് കൂ​ടു​ത​ൽ സൗ​ക​ര്യം.

റമദാനിലെ അവസാന നോമ്പ് പൂർത്തിയായതിന് ശേഷമാണ് സകാത്തുൽ ഫിത്വർ നിർബന്ധമാകുന്നത്. പെരുന്നാൾ നമസ്കാരത്തിന് മുമ്പാണ് അത് നൽകേണ്ടത്. പെരുന്നാൾ നമസ്കാരത്തേക്കാൾ പിന്തിക്കുകയാണെങ്കിൽ അതൊരു സാധാരണ ദാനമായാണ് പരിഗണിക്കുക.

സകാത്തും ഫിത്വർ സകാത്തും മഹല്ലടിസ്ഥാനത്തിൽ സംഘടിതമായി വിതരണം ചെയ്യുകയാണ് അത് രണ്ടിന്‍റെയും പൂർണ ലക്ഷ്യം സാക്ഷാത്കരിക്കാൻ സഹായകമാവുക. സമ്പന്നരുടെ വീടുകൾക്ക് മുന്നിൽ കൈനീട്ടി നിന്ന് അവർ നൽകുന്ന നാണയത്തുട്ടുകൾ ദരിദ്രർ വാങ്ങുന്ന സമ്പ്രദായമല്ല ഇസ്‍ലാമിലെ സകാത്ത് സംവിധാനം.

വർഷങ്ങളായി ചില മഹല്ലുകളിൽ സകാത്ത് ശേഖരിച്ച് അർഹരായവരുടെ വീടുകളിൽ എത്തിച്ചു കൊടുക്കുന്ന സമ്പ്രദായം നിലനിൽക്കുന്നു എന്നത് ശുഭോദർക്കമായ കാര്യമാണ്. സകാത്തുൽ ഫിത്വർ മഹല്ലടിസ്ഥാനത്തിൽ ശേഖരിച്ച് അർഹർക്കെത്തിച്ചു കൊടുക്കുകയാണെങ്കിൽ പട്ടിണി കിടക്കുന്ന ഒരാളും തങ്ങളുടെ സമൂഹത്തിലില്ല എന്ന് ഉറപ്പാക്കാൻ സാധിക്കും.