ഹജ്ജ്: രണ്ടാം ഗഡു 24നകം അടക്കണം

കരിപ്പൂർ: ഈ വർഷം കേന്ദ്ര ഹജ്ജ്​ കമ്മിറ്റി മുഖേന തെരഞ്ഞെടുക്കപ്പെട്ടവരുടെ രണ്ടാം ഗഡുവായ 1,70,000 രൂപ ഏപ്രിൽ 24നകം അടക്കണം. ഹജ്ജ് കമ്മിറ്റി വെബ്സൈറ്റിൽ നിന്ന് ഓരോ കവറിനും പ്രത്യേകം ലഭിക്കുന്ന ബാങ്ക് റഫറൻസ് നമ്പറുള്ള പേ ഇൻ സ്ലിപ് ഡൗലോഡ് ചെയ്ത് എസ്​.ബി.ഐ, യൂനിയൻ ബാങ്ക് ഓഫ് ഇന്ത്യ എന്നിവയുടെ ബ്രാഞ്ചിൽ പണമടക്കാം.

പണമടച്ച ശേഷം രശീതിയുടെ ഹജ്ജ് കമ്മിറ്റിയുടെ കോപ്പി തപാൽ മാർഗം എക്സിക്യൂട്ടിവ് ഓഫിസർ, കേരള സംസ്ഥാന ഹജ്ജ് കമ്മിറ്റി, ഹജ്ജ് ഹൗസ്, കാലിക്കറ്റ്​ എയർപോർട്ട് പി.ഒ, മലപ്പുറം ജില്ല, പിൻ: 673 674 വിലാസത്തിൽ അയക്കണം.

ബാക്കി അടക്കേണ്ട തുക വിമാന നിരക്ക്​, സൗദിയിലെ ചെലവ് തുടങ്ങിയവ കണക്കാക്കിയ ശേഷം കേന്ദ്ര ഹജ്ജ് കമ്മിറ്റി അറിയിക്കുമെന്ന്​ സംസ്ഥാന ഹജ്ജ്​ കമ്മിറ്റി അധികൃതർ അറിയിച്ചു.