താരരാവിന് നക്ഷത്രത്തിളക്കം

നൂറ്റാണ്ടോളം പഴക്കമുണ്ട്​ ഇന്ത്യയും ഖത്തറും തമ്മിലെ ഇഴയടുപ്പത്തിന്​. പായ് വഞ്ചിയും കപ്പലും കയറിവന്ന പൂർവികരിലൂടെ തുടങ്ങിയ ബന്ധം, 60 വർഷം മുമ്പ്​ സജീവമായ പ്രവാസത്തിലൂടെ ഊഷ്മളമായി. നാട്ടിലുള്ള കുടുംബത്തിന്‍റെ പട്ടിണിമാറ്റി, ​നല്ലൊരു ജീവിതം സ്വപ്നം​കണ്ടെത്തിയവർക്ക്​ പിന്നെ ഈ നാട്​ പിറന്നമണ്ണോളം തന്നെ പ്രിയപ്പെട്ടതായി. ഒറ്റയാൻ പ്രവാസത്തിൽനിന്നും കാലക്രമേണ കുടുംബവും പ്രവാസത്തിൽ ഒന്നിച്ചായി. ​ബാച്‍ലർ മുറിയുടെ വിരസതയിൽനിന്നും കുടുംബ ജീവിതത്തിന്‍റെ ഊഷ്മളതയിലേക്ക്​ അധികം വൈകാതെ തന്നെ വലിയൊരു പങ്കും മാറി.

ഭാര്യയും മക്കളും മാതാപിതാക്കളുമെല്ലാമായി മരുഭൂമിയെ അവർ തങ്ങളുടെ പ്രിയപ്പെട്ട മരുപ്പച്ചയാക്കി മാറ്റി. സ്കൂൾ പഠനവും സർവകലാശാല വിദ്യാഭ്യസവും ഇവിടത്തന്നെ, ജീവിതപങ്കാളികളായെത്തിയവർ ജോലിക്കാരും പ്രഫഷനലുകളുമായി. ജീവിതം തേടിയെത്തിയവർ ഇവിടെ വളർന്നു പന്തലിച്ചു. വിത്തെറിഞ്ഞ്​ നല്ല കൃഷിക്കാരായും അറിവ്​ പകർന്നുനൽകി മികച്ച അധ്യാപകരായും ആതുരശുശ്രൂഷകൊണ്ട്​ സാന്ത്വനം പകർന്നും അങ്ങനെയങ്ങനെ തൊട്ടതെല്ലാം പൊന്നാക്കി അവർ അറേബ്യൻ മണലാരണ്യത്തിൽ വജ്രങ്ങളായി മാറി.

ഖത്തറിന്‍റെ മണ്ണിൽ തിളങ്ങിയ ഇന്ത്യൻ വനിതാരത്നങ്ങളാണ്​ ഈ ദിനങ്ങളിലെ താരം. അവർക്കുള്ള ആദരവാണ്​ 'ഗൾഫ്​ മാധ്യമം' പ്രഥമ ഷി ക്യൂ പുരസ്കാരം. എട്ടു വിഭാഗങ്ങളിലായി സമ്മാനിക്കുന്ന പുരസ്കാരത്തിന്​ നാനാതുറകളിൽനിന്നായി 700ഓളം അപേക്ഷകളാണ്​ ലഭിച്ചത്​. സാമൂഹിക സേവനം, കൃഷി, ആരോഗ്യം, കല-സാഹിത്യം, അധ്യാപനം, സംരംഭക, കായികം, സോഷ്യൽ ഇൻഫ്ലുവൻസർ തുടങ്ങി എട്ടു വിഭാഗങ്ങളിൽ വ്യക്​തിമുദ്ര പതിപ്പിച്ചവരുടെ പങ്കാളിത്തം. ഏറെ ദുഷ്കരമായ ദൗത്യത്തിനൊടുവിലാണ്​ വിദഗ്​ധസമിതി അവരിൽനിന്നും 26 പേരെ ഫൈനൽ റൗണ്ടിലേക്ക്​ തെരഞ്ഞെടുത്തത്​.