സുഹൈൽ ഓൺ സ്ട്രൈക്ക്

എതിരാളിയെ സിക്സറിലേക്ക്​ പറത്തുമ്പോൾ ബാറ്റിൽ നിന്നുയരുന്ന 'ടിക്​' ശബ്​ദം ക്രിക്കറ്റിന്‍റെ സൗന്ദര്യങ്ങളിലൊന്നാണ്​. ബാറ്റും ബോളും ആക്ഷനും തമ്മിലുള്ള ടൈമിങ്​ ഏറ്റവും കൃത്യമായി വരുമ്പോഴാണ്​ ഏറ്റവും മികച്ച 'ടിക്​' ശബ്​ദവും ഷോട്ടും പിറക്കുന്നത്​. എന്നാൽ, സിക്സറുകളും ബൗണ്ടറികളും പറത്തുമ്പോഴും ഈ ശബ്​ദ സൗന്ദര്യം ആസ്വദിക്കാൻ കഴിയാത്തയാളാണ്​ പരപ്പനങ്ങാടി സ്വദേശി മുഹമ്മദ്​ സുഹൈൽ.

കേൾവി ശക്​തിയും സംസാര ശേഷിയുമില്ലെങ്കിലും, ടിക്​ ശബ്​ദം കേൾക്കാൻ കഴിയില്ലെങ്കിലും സുഹൈലിന്‍റെ ബാറ്റിൽ നിന്ന്​ ഒഴുകുന്ന റൺസിനും എറിഞ്ഞ്​ വീഴ്ത്തുന്ന വിക്കറ്റുകൾക്കും യാതൊരു കുറവുമില്ല. അജ്​മാനിൽ നടക്കുന്ന ബധിര ട്വന്‍റി-20 ചാമ്പ്യൻഷിപ്പ്​ ഇന്ന്​ സമാപിക്കുമ്പോൾ, ടൂർണമെന്‍റിൽ ഇന്ത്യൻ ടീമിനെ പ്രതിനിധീകരിക്കുന്ന ഏക മലയാളിയാണ്​ ഈ മലപ്പുറംകാരൻ.

മലപ്പുറം ജില്ലാ ടീമ അംഗമായ സഹോദരൻ മുഹമ്മദ്​ സാജിദിന്‍റെ വഴിയേയാണ്​ സുഹൈലും ക്രിക്കറ്റിലേക്ക്​ എത്തിയത്​. അല്ലെങ്കിൽ, സുഹൈലിലെ ക്രിക്കറ്ററുടെ താൽപര്യം അടുത്തറിഞ്ഞ സാജിദാണ്​ സുഹൈലിനെ ക്രിക്കറ്റിൽ സജീവമാക്കിയത്​​ എന്നും പറയാം. ഓൾ ഇടം കൈയൻ ബൗളറായ സുഹൈൽ ഒന്നാന്തരം ബാറ്റ്​സ്മാൻ കൂടിയാണ്​. ബധിര ടീമിലല്ല, സാധാരണ താരങ്ങൾക്കൊപ്പം ഇന്ത്യക്കായി കളിക്കണമെന്നായിരുന്നു സുഹൈലിന്‍റെ ആഗ്രഹം.

കോഴിക്കോട് റഹ്മാനിയ സ്കൂളിൽ പഠിക്കുമ്പോൾ ജില്ലാ ടീമിലും ഫാറൂഖ് കോളജിൽ പഠിക്കുമ്പോൾ കാലിക്കറ്റ് യൂനിവേഴ്സിറ്റി ടീമിലും അംഗമായിരുന്നു. മലപ്പുറം,കോഴിക്കോട് ജില്ലകൾക്ക്​ വേണ്ടിയും ജനറൽ ടീമിന്​ വേണ്ടി കളിച്ചു. ​കേരള ക്രിക്കറ്റ്​ ​അസോസിയേഷന്​ കീഴിൽ അണ്ടർ 17, 19, 22, 25 ടീമുകളിലും കളത്തിലിറങ്ങി. കേരള രഞ്ജി ടീമിൽ കളിക്കണമെന്ന്​ ആഗ്രഹമുണ്ടായിരുന്നെങ്കിലും ബധിരനായതിനാൽ വഴികളടഞ്ഞു. ഇതോടെയാണ്​ ഡെഫ്​ ടീമിന്‍റെ ഭാഗമായത്​. ബധിര ലോകകപ്പിൽ ഇന്ത്യക്കായി കളിച്ചിരുന്നു.

ബധിര അസോസിയേഷൻ നടത്തുന്ന പ്രീമിയർ ലീഗിൽ സൺറൈസേഴ്​സ്​ ഹൈദരാബാദിനെ നയിച്ചത്​ സുഹൈലാണ്​. ഈ ടൂർണമെന്‍റിൽ മികച്ച പ്രകടനം നടത്താൻ കഴിഞ്ഞിരുന്നു. ഈ വർഷം ഹൈദരാബാദിൽ നടന്ന നാഷനൽ ട്വന്‍റി-20യിൽ 25 റൺസും അഞ്ച്​ വിക്കറ്റും നേടി. കേരള ബധിര ടീം നായകനായിരുന്ന സുഹൈൽ കേരളത്തിനായി സൗത്ത്​ സോൺ ചാമ്പ്യൻഷിപ്പുകളിലും മിന്നും പ്രകടനം നടത്തി. പരപ്പനങ്ങാടി കോ ഓപറേറ്റീവ്​ ബാങ്ക്​ ക്ലർക്കായ സുഹൈലിന്​ സ്​ഥാപനവും മികച്ച പിന്തുണയാണ്​ നൽകുന്നത്​. അണ്ടർ 19 ക്രിക്കറ്റിൽ കാലിക്കറ്റ്​ സർവകലാശാലക്കായി പാഡണിഞ്ഞു. രണ്ട്​ വർഷമായി ഇന്ത്യൻ ടീമിൽ അംഗമാണ്​.

കളിയിൽ മാത്രമല്ല, പഠനത്തിലും മിടുക്കനാണ്​. എസ്​.എസ്​.എൽ.സി, പ്ലസ്​ ടു പരീക്ഷകളിൽ ബദിര വിഭാഗത്തിൽ കേരളത്തിൽ ഏറ്റവും കൂടുതൽ മാർക്ക്​ നേടിയത്​ സുഹൈലായിരുന്നു. ബദിര ക്രിക്കറ്റിന്​ മുൻ കാലങ്ങളിലേക്കാൾ സ്വീകാര്യത കിട്ടുന്നുണ്ടെന്ന്​ സുഹൈൽ പറയുന്നു. ഇന്ത്യൻ ക്രിക്കറ്റ്​ ബോർഡിന്‍റെ​ (ബി.സി.സി.ഐ) പിന്തുണയോടെയാണ്​ ബധിര ടീമും കളിക്കുന്നത്​. അജ്​മാനിൽ നടക്കുന്ന ടൂർണമെന്‍റിൽ ഇന്ത്യക്ക്​ പുറമെ ആസ്​ട്രേലിയ, ദക്ഷിണാഫ്രിക്ക, ബംഗ്ലാദേശ്​ ടീമുകളും പ​ങ്കെടുക്കുന്നുണ്ട്​. പരപ്പനങ്ങാടി പുത്തരിക്കൽ അബ്​ദുൽ റസാഖിന്‍റെയും ആസ്യയുടെയും മകനാണ്​ സുഹൈൽ. ഭാര്യ: ഫാത്തിമ ഷെറിൻ. മക്കൾ: അലൈഹ സൈനബ്​, ഇമാദ്​ അബ്​ദുല്ല.