പ്രവാസത്തിലേക്ക്​ ആ കപ്പൽ നങ്കൂരമിട്ടിട്ട്​ അമ്പതാണ്ട്

ദുബൈ: മുംബൈയിൽനിന്ന്​ പുറപ്പെട്ട ‘മുഹമ്മദലി’ എന്ന കപ്പൽ നാലു ദിവസത്തിന്​ ശേഷം 1974 ജനുവരി 25ന്​ ദുബൈ തീരത്ത്​ യാത്ര അവസാനിപ്പിച്ചെങ്കിലും ലോകം അറിയപ്പെടുന്ന ബിസിനസ്​ സാമ്രാജ്യത്തിന്‍റെ അധിപനിലേക്കുള്ള ഒരു 22കാരന്‍റെ യാത്ര അവിടെ തുടങ്ങുകയായിരുന്നു.

നിശ്ചയദാർഢ്യവും ആത്മവിശ്വാസവും മാത്രം മൂലധനമാക്കി അദ്ദേഹം​ പടുത്തുയർത്തിയ സംരംഭങ്ങൾ അമ്പതാണ്ട്​ പിന്നിടുമ്പോൾ​​ കേരളവും മിഡിൽ ഈസ്റ്റും കടന്ന് മുന്നേറുകയാണ്​. പീവീസ്​ ഗ്രൂപ്പിന്‍റെ അധിപൻ പി.വി. അബ്​ദുൽ വഹാബ്​ ദുബൈയിൽ പ്രവാസം തുടങ്ങിയിട്ട്​ അമ്പത്​ വർഷം പൂർത്തിയാവുകയാണ്​​.

മറ്റേതൊരു പ്രവാസിയെയും പോലെ മെച്ചപ്പെട്ട ജീവിതസൗഭാഗ്യങ്ങൾ സ്വപ്നം കണ്ടാണ്​ പി.വി. അബ്​ദുൽ വഹാബും അരനൂറ്റാണ്ട് മുമ്പ്​ ദുബൈയിലേക്ക്​ കപ്പൽ കയറിയത്​.

പത്താം ക്ലാസിന്​ ശേഷം പോളിടെക്നിക്കിൽ ഓട്ടോമൊബൈൽ കോഴ്​സിന്​ ചേരാനായിരുന്നു ആഗ്രഹം. പക്ഷേ, പിതാവ്​ അലവിക്കുട്ടിയുടെ അപ്രതീക്ഷത മരണത്തോടെ എട്ട്​ സഹോദരങ്ങളും ഉമ്മയുമടങ്ങുന്ന കുടുംബത്തിന്‍റെ ഭാരം മൂത്ത മകനായ വഹാബിന്‍റെ ചുമലിലായി.

കുടുംബത്തിന്‍റെ സ്വപ്നങ്ങൾക്ക്​ നിറം പകരാൻ പ്രവാസം തെരഞ്ഞെടുക്കേണ്ടിവന്നു. അബൂദബിയിലെ ബന്ധുവിന്‍റെ പിന്തുണയിലായിരുന്നു തുടക്കം. സൗദി അതിർത്തിയിലെ സിലയിൽ പൊലീസ്​ ഔട്ട്​പോസ്റ്റ്​ നിർമാണ സ്ഥലത്തായിരുന്നു ആദ്യ ​ജോലി. അബൂദബിയിലെ ബന്ധു സ്വന്തമായി സംരംഭം തുടങ്ങിയപ്പോൾ അതിനൊപ്പം ചേർന്നു.

പിന്നീട്​ ടെക്നിക്കൽ ഗാരേജ്​ എക്യു​പ്​മെന്‍റ്​സ്​, ഇന്ധനവിതരണം, കിഡ്​സ്​ ഷോപ്പ്​ തുടങ്ങി വിവിധ മേഖലകളിൽ സംരംഭകനായി.

1991ൽ കേരളത്തിലും നിക്ഷേപം തുടങ്ങി. ഇന്ന്​ പീവീസ്​ ഗ്രൂപ്പിന്​ ഗൾഫ്​ രാഷ്ട്രങ്ങളിലും കേരളത്തിലെ വിവിധ ജില്ലകളിലുമായി ഒട്ടേറെ സംരംഭങ്ങളുണ്ട്​.

പാർലമെന്‍റ്​ അംഗം, സ്വന്തമായി ബിസിനസ്​ സാമ്രാജ്യം പടുത്തുയർത്തിയ സംരംഭകൻ, കേരളത്തിലെ അറിയപ്പെടുന്ന രാഷ്ട്രീയ നേതാവ്​. രാജ്യസഭാംഗവും മുസ്​ലിം ലീഗ്​ അഖിലേന്ത്യ ട്രഷററുമായ വ്യവസായിക്ക് ഇന്ന്​ വിലാസങ്ങൾ പലതുണ്ട്​. കേരളത്തിന്‍റെ രാഷ്ട്രീയ, സാംസ്കാരിക, സാമൂഹിക മണ്ഡലങ്ങളിൽ അറിയപ്പെടുന്ന വ്യക്തിത്വമാണിദ്ദേഹം.