വെള്ള സാരിയിൽ ചുവപ്പ്​ ബോർഡർ; ബംഗാളിനെ വീഴ്ത്താൻ ധനമന്ത്രി ധരിച്ച​ പരമ്പരാഗത സാരിയെക്കുറിച്ചറിയാം

ന്യൂഡൽഹി: ബംഗാളിലെ സ്​ത്രീകൾ ഉപയോഗിക്കുന്ന പരമ്പരാഗത സാരി അണിഞ്ഞായിരുന്നു ധനമന്ത്രി നിർമല സീതാരാമന്‍റെ ബജറ്റ്​ അവതരണം. നിർമല സീതാരാമൻ അവതരിപ്പിച്ച ബജറ്റിൽ കേരളത്തിനും ബംഗാളിനും തമിഴ്​നാടിനും വാരിക്കോരി നൽകിയ പ്രഖ്യാപനങ്ങൾ നിയമസഭ തെരഞ്ഞെടുപ്പിനെ ലക്ഷ്യം വെച്ചാണെന്ന ആരോപണങ്ങൾ ഉയരുന്നതിന്​ പിന്നാലെയാണ്​ ധനമന്ത്രിയുടെ വേഷവും ചർച്ചയാകുന്നത്​​. കൂടാതെ ബംഗാളിന്‍റെ വികാരമായ രവീന്ദ്രനാഥ ടാഗോറിന്‍റെ വരികൾ ധനമന്ത്രി ബജറ്റ്​ പ്രസംഗത്തിൽ പരാമർശിക്കുകയും ചെയ്​തു. ഇതിൽ പ്രധാന ചർച്ച​യായതാക​ട്ടെ ബംഗാൾ പ്രേമം അറിയിക്കുന്നതിന്​ ധനമന്ത്രി ധരിച്ച സാരിയായിരുന്നു.

സിൽക്കിൽ തീർത്ത വെളുത്ത സാരിയിൽ ചുവപ്പും സ്വർണനിറവും ബോർഡറാണ്​. ബംഗാളിലെ സ്​ത്രീകൾ പ്രത്യേക ദിവസങ്ങളിൽ ഉപയോഗിക്കുന്ന ഈ 'ലാൽ പാഡ്​' സാരി​ ബംഗാളിന്‍റെ ചരിത്രവുമായി ഇഴചേർന്നുകിടക്കുന്നു. ബംഗാളിൽ വെള്ളയും ചുവപ്പുമാണ്​ പരമ്പരാഗത നിറങ്ങളായി കണക്കാക്കുന്നത്​.

നവരാത്രി ദിനത്തിൽ വിവാഹിതരായ സ്​ത്രീകളാണ്​ ഈ സാരി ഉടുക്കുക. കൂടാ​തെ വിവാഹം, മറ്റു വിശേഷാവസരങ്ങൾ എന്നിവയിലും ഈ സാരി ധരിക്കും. ഇ​തിനൊപ്പം സിന്ദൂർ, ചുവന്ന ബിന്ദി, സ്വർണാഭരണങ്ങൾ എന്നിവയും അണിയും

ദുർഗ പൂജയിൽ ദുർഗയെ ആരാധിക്കുന്ന സമയമാണ്​ സ്​ത്രീകൾ ഈ സാരി ധരിക്കുക. ഭർത്താവിന്‍റെ ദീർഘായുസുമായി ബന്ധപ്പെട്ട വിശ്വാസമാണ്​ ഈ വസ്​ത്രം ധരിക്കാൻ അവരെ പ്രേരിപ്പിക്കുന്നത്​.

കോട്ടൺ, സിൽക്ക്​, ​ബനാറസ്​ തുടങ്ങിയവയിൽ ഈ സാരി ലഭ്യമാകും. ജാർഖണ്ഡിലെ സ്​ത്രീകളും ഈ സാരി പ്രത്യേക അവസരങ്ങളിൽ വിശ്വാസത്തിന്‍റെ ഭാഗമായി ധരിച്ചുപോരുന്നു. ബോളിവുഡ്​ ചിത്രങ്ങളിൽ ഉൾപ്പെടെ ബംഗാളിനെ ചിത്രീകരിക്കു​േമ്പാൾ ചുവപ്പും വെള്ളയും ചേർന്ന ഈ സാരിയും കാണിക്കാറുണ്ട്​.