അലി മണിക്​ഫാൻ- വിജ്​ഞാനസാഗരത്തിലെ വേറി​ട്ടൊരു മീൻ

കടലിലൊരു മീനുണ്ട്​. പേര്​ അബു ദഫ്ദഫ് മണിക്​ഫാനി. അത്ര പെട്ടന്നൊന്നും വലയിൽ കുടുങ്ങാത്ത വേറി​ട്ടൊരു മീൻ. ആ പേരിന്​ കാരണക്കാരനായ ആളും അങ്ങിനെ തന്നെ. നടപ്പ് ജീവിതശീലങ്ങളുടെ വലയിൽ കുടുങ്ങാതെ വിജ്​ഞാന സാഗരത്തിൽ നീന്തിത്തുടിക്കുന്ന വേറി​ട്ടൊരു മീൻ- എം. അലി മണിക്​ഫാൻ. കടലാഴങ്ങളും അറിവാഴങ്ങളും ഒരുപോലെ ഇഷ്​ടപ്പെടുന്ന, കടലിനെയും കരയെയും ആകാശത്തേയും ഒരുപോലെ തൊട്ടറിഞ്ഞ ഈ ജീവിതത്തെ എന്തുപറഞ്ഞ്​ വിശേഷിപ്പിക്കുമെന്ന്​ ആരുമൊന്ന്​ ആശയക്കുഴപ്പത്തിലാകും.

സമുദ്ര ശാസ്ത്രജ്ഞൻ, ജ്യോതി ശാസ്ത്രജ്ഞൻ, ഭൂമി ശാസ്ത്രജ്ഞൻ, സാമൂഹിക ശാസ്ത്രജ്ഞൻ, സാങ്കേതിക വിദഗ്‌ധൻ, പരിസ്ഥിതി പ്രവർത്തകൻ, കാർഷിക വിദഗ്‌ധൻ, പ്രകൃതി നിരീക്ഷകൻ, മുസ്‌ലിം പണ്ഡിതൻ, ബഹുഭാഷ പണ്ഡിതൻ എന്നിങ്ങനെ നീളുന്നു മണിക്​ഫാന്‍റെ വിശേഷണങ്ങൾ. മലയാളം, സംസ്കൃതം, ഹിന്ദി, തമിഴ്, ലക്ഷദ്വീപിലെ മഹൽ, അറബി, ഉർദു, ഇംഗ്ലീഷ്, ലാറ്റിൻ, ഫ്രഞ്ച്, റഷ്യൻ, ജർമൻ, പേർഷ്യൻ തുടങ്ങി 14ൽ പരം ഭാഷകൾ എഴുതാനും വായിക്കാനും സംസാരിക്കാനുമറിയുന്ന ഏഴാം ക്ലാസുകാരൻ. മൂന്ന്​ വർഷം മാത്രം ഭൗതിക വിദ്യാഭ്യാസം നേടിയ ആൾക്ക്​ എങ്ങിനെ ഇതെല്ലാം സാധിക്കുന്നുവെന്ന ചോദ്യത്തിന്‍റെ മറുപടി സ്വന്തം ജീവിതം കൊണ്ട്​ തന്നെ മണിക്​ഫാൻ കാണിച്ചുതന്നിട്ടുണ്ട്​ -'മനസ്സ്​ വെച്ചാൽ നമുക്ക്​ എന്തും പഠിക്കാം'.

ജീവിതരീതിയിലും വേഷത്തിൽ പോലും ലാളിത്യം കാത്തുസൂക്ഷിച്ചു വന്ന മണിക്​ഫാന്​ ഇപ്പോൾ രാജ്യം പത്​മശ്രീ നൽകി ആദരിക്കു​േമ്പാഴും ആ ശൈലിയിൽ മാറ്റമില്ല. പുരസ്​കാരത്തിന്‍റെ വിവരമറിഞ്ഞ്​ അടുപ്പമുള്ളവർ വിളിച്ചപ്പോൾ ഫോണെടുത്തത്​ ഭാര്യയാണ്​. 'അദ്ദേഹം ഉറങ്ങാൻ കിടന്നു' എന്ന മറുപടിയാണ്​ ലഭിച്ചത്​. പണ്ടേ അദ്ദേഹം അങ്ങിനെയാണ്​. അഭിനന്ദനങ്ങൾക്കായി കാത്തുനിൽക്കാറില്ല. ഇത്രയും നേട്ടങ്ങൾ കൈവരിച്ചിട്ടും വേണ്ടത്ര അംഗീകാരങ്ങൾ ലഭിച്ചില്ലല്ലോ ആളുകൾ തിരിച്ചറിയുന്നില്ലല്ലോ എന്നൊക്കെ ഒരിക്കൽ ചോദിച്ചപ്പോൾ അദ്ദേഹത്തിന്‍റെ മറുപടി ഇതായിരുന്നു- 'മരുഭൂമിയിൽ എ​ത്രയോ തരം പൂക്കൾ ആരുമറിയാതെ വിരിയുന്നു, കൊഴിയുന്നു. അതുപോലെയാണ്​ എന്‍റെ ജീവിതവും...'.

കടലും കരയും പഠിപ്പിച്ച പാഠങ്ങൾ

1938 മാർച്ച് 16ന് ബി. മൂസ മണിക്ഫാനിന്‍റെയും ഫാത്തിമ മണിക്കയുടെയും മകനായി ലക്ഷദ്വീപിലെ മിനിക്കോയ് ദ്വീപിലായിരുന്നു അദ്ദേഹത്തിന്‍റെ ജനനം. പിതാവ് കോടതി ആമീൻ ആയിരുന്നു. അക്കാലത്ത്​ ജുഡീഷ്യൽ പദവിയായിരുന്നു ആമീൻ എന്നതിനാൽ നല്ല അധികാരവും സ്വാധീനവുമുള്ള കുടുംബത്തിലായിരുന്നു ജനനം. ഉപ്പ കോഴിക്കോട്ട് ഹജൂർ കച്ചേരിയിലേക്കും സ്വന്തമായി ചരക്കുകപ്പൽ ഉണ്ടായിരുന്ന ഉപ്പാപ്പ ദ്വം മാണിക്​ഫാൻ വ്യാപാരത്തിനായി കേരളത്തിലേക്കും തമിഴ്‌നാട്ടിലേക്കും മംഗലാപുരത്തേക്കുമൊക്കെ യാത്ര തിരിക്കുമ്പോൾ കുഞ്ഞു മണിക്ഫാനെയും ഒപ്പം കൂട്ടാറുണ്ടായിരുന്നു. കടൽത്തീരത്തും കടലിലെ ലഗൂണിലുമായി ചെലവഴിച്ചിരുന്ന ബാല്യകാലം. പഠനത്തെ കുറിച്ച്​ പറഞ്ഞാൽ നാലാംക്ലാസ്​ വരെ എന്നുപറയുന്നത് സാ​ങ്കേതികം മാത്രമാകും. കരയിൽനിന്നും കടലിൽനിന്നുമുള്ള അനുഭവങ്ങളിൽ നിന്നായിരുന്നു ആ പഠനം.​

പിതാവിന്‍റെ ഗുമസ്തനായ കണ്ണൂർ സ്വദേശി കല്ലിവളപ്പിൽ ഹസ്സൻ കുഞ്ഞിൽനിന്നാണ് കണക്കും ഇംഗ്ലീഷും മലയാളവും കുട്ടിക്കാലത്തേ പഠിച്ചത്. പത്താം വയസ്സിൽ ഹസ്സൻ കുഞ്ഞിനൊപ്പം കണ്ണൂരിലേക്ക് സ്കൂൾ പഠനത്തിനെത്തി. അഞ്ചാം ക്ലാസ്​ മുതൽ മൂന്ന് വർഷം അദ്ദേഹത്തിന്‍റെ വീട്ടിൽ താമസിച്ചു പഠിച്ചത്​ മാത്രമാണ്​ ഭൗതികമായി നേടിയ വിദ്യാഭ്യാസം. കണ്ണൂർ ഹയർ എലിമെന്‍ററി സ്കൂളിൽ നിന്ന്​ പാതിവഴിയിൽ ഏഴാം ക്ലാസ് പഠനമുപേക്ഷിച്ച് ലക്ഷദ്വീപിലേക്ക് മടങ്ങി. 'സ്കൂൾ പഠനം മുഷിപ്പായി തോന്നിയിരുന്നു. ഞാൻ ചിന്തിച്ച് കൂട്ടുന്നതൊക്കെ പ്രായോഗികമാക്കാനും സ്വന്തം പരീക്ഷണങ്ങൾക്കും സമയം കിട്ടിയിരുന്നില്ല'- അക്കാലത്തെ കുറിച്ച്​ മണിക്​ഫാൻ ഓർത്തെടുക്കുന്നത്​ ഇങ്ങനെ. സ്​കൂൾ വിദ്യാഭ്യാസത്തോടുള്ള ഈ 'അലർജി' മക്കളുടെ കാര്യത്തിലും കാട്ടി. നാലുമക്കളെയും സ്​കൂളിൽ വിട്ടില്ല. പക്ഷേ, ഈ തീരുമാനം തെറ്റിയതുമില്ല. മകന്‍ മര്‍ച്ചന്‍റ്​ നേവിയിലാണ്​. പെണ്മക്കള്‍ മൂന്നുപേരും അധ്യാപകരും.

കണ്ണൂരിൽ നിന്ന്​ ലക്ഷദ്വീപിലേക്ക് തിരിച്ചുവന്ന ശേഷം മിനിക്കോയിലെ ഇംപീരിയൽ ലൈറ്റ് ഓഫിസർമാരായ എൻജിനീയർമാരിൽനിന്ന് ലൈറ്റ് ഹൗസ് സംവിധാനങ്ങൾ, സിഗ്നൽ എന്നിവ പഠിച്ചു. സിലോണിൽ നിന്നുള്ള ആ ഉദ്യോഗസ്​ഥർക്കൊപ്പം കൂടി കാലാവസ്ഥ സംബന്ധിച്ച കാര്യങ്ങളിലും ഉപഗ്രഹങ്ങളെ കുറിച്ചുമൊക്കെ അറിവ് നേടി. കുറച്ച് കാലം മിനിക്കോയിയിൽ അധ്യാപകനായും ജോലി ചെയ്​തു. കപ്പലിൽ ചേരാനായി കൊൽക്കത്തക്ക്​ പോയെങ്കിലും ചിക്കൻ പോക്​സ്​ വില്ലനായി. പിന്നെയും കുറേക്കാലം അധ്യാപകനായും ആമീന്‍റെ ഗുമസ്തനായും മിനിക്കോയിയിൽ തുടർന്നു.

സ്വന്തമായി വൈദ്യുതി, ഫ്രിഡ്​ജ്​, മോ​ട്ടോർ പിടിപ്പിച്ച സൈക്കിൾ

കുട്ടിക്കാലം മുതലേ ഉപ്പുവെള്ളത്തിലും ശുദ്ധജലത്തിലും ജീവിക്കുന്ന മത്സ്യങ്ങളെ തിരിച്ചറിയാനുള്ള കഴിവ്​ മണിക്​ഫാൻ സ്വായത്തമാക്കി. ചിറക്, അവയുടെ നിറം, ചിറകിലെ മുള്ളുകൾ, അവയുടെ എണ്ണം എന്നിവ നോക്കി മനസ്സിലാക്കി തിരിച്ചറിയുമായിരുന്നു. 400 മത്സ്യ ഇനങ്ങളെ തിരിച്ചറിയാൻ കഴിയുമായിരുന്നു മണിക്ഫാന്. പല സമുദ്രശാസ്ത്രജ്ഞരും മത്സ്യങ്ങളുടെ വ്യത്യസ്ത വർഗങ്ങളെ തിരിച്ചറിയാൻ അദ്ദേഹത്തിന്‍റെ സഹായവും തേടിയിരുന്നു.

മണിക്‌ഫാന്‍റെ ഈ കഴിവുകളെ തിരിച്ചറിഞ്ഞ സെൻട്രൽ മറൈൻ ഫിഷറീസ് ഡയറക്ടർ ഡോ.എസ്. ജോൺസ് അദ്ദേഹത്തെ കേന്ദ്ര ഫിഷറീസ് വകുപ്പിലേക്ക് ശുപാർശ ചെയ്​തു. അങ്ങിനെയാണ്​ തമിഴ്​നാട്ടിലേക്ക്​ താമസം മാറ്റുന്നത്​. 1960 മുതൽ 1980 വരെ അവിടെ ജീവനക്കാരനായി. ഡോ. ജോൺസ്​ വിരമിച്ചതോടെ മണിക്ഫാനും അവിടെ നിന്നിറങ്ങി. അദ്ദേഹം തിരിച്ചറിഞ്ഞ പുതിയ ഒരിനം മത്സ്യത്തിന് സെൻട്രൽ മറൈൻ വകുപ്പ് 'അബു ദഫ് ദഫ് മണിക് ഫാനി' എന്ന് പേരുമിട്ടു.

വിരമിച്ച ശേഷമാണ്​ തമിഴ്‌നാട്ടിൽ വേതാളൈ എന്ന സ്ഥലത്ത് കടൽക്കരയിൽ മൂന്ന് ഏക്കർ ഭൂമി വാങ്ങി താമസമാക്കിയത്​. വൈദ്യുതി കണക്ഷന് അപേക്ഷിച്ച് കാലമേറെ കഴിഞ്ഞിട്ടും കിട്ടാതെ വന്നപ്പോള്‍ സ്വന്തമായി വൈദ്യുതി ഉത്പാദിപ്പിച്ച് വീട്ടില്‍ വെളിച്ചമെത്തിച്ചു. കടൽക്കരയിൽ കാറ്റ് കൂടിയതിനാൽ കാറ്റാടിയന്ത്രം ഉപയോഗിച്ചാണ്​ വൈദ്യുതി ഉത്‌പാദിപ്പിച്ചത്​. വീട്ടിലെ ഫ്രിഡ്​ജും സ്വന്തം നിർമിതിയാണ്​. ഈ തരിശുഭൂമിയെ സ്വപ്രയത്​നം കൊണ്ട്​ ഹരിതാഭവുമാക്കി. മോട്ടോര്‍ പിടിപ്പിച്ച് ഒരു സൈക്കിള്‍ നിര്‍മ്മിച്ചതായിരുന്നു മറ്റൊരു കണ്ടുപിടിത്തം. മണിക്കൂറില്‍ 25 കി.മീ. വേഗതയില്‍ പോകുന്ന ആ സൈക്കിളില്‍ 1982ൽ മകനെയും കൂട്ടി ഡൽഹി വരെ പോയ്​ വന്നും അദ്ദേഹം ഞെട്ടിച്ചു. വേതാളൈയിൽ നിന്ന്​ 45 ദിവസം കൊണ്ടാണ്​ ഡൽഹിയിൽ പോയി വന്നത്​. ഈ സൈക്കിളിന് അദ്ദേഹം പേറ്റന്‍റും എടുത്തിട്ടുണ്ട്​.

കയറും മരവും മാത്രമുപയോഗിച്ച്​ സിൻബാദിന്‍റെ കപ്പൽ

സിൻബാദ്​ ഉപയോഗിച്ചതുപോലെയുള്ള പരമ്പരാഗതമായ ഒരു അറബിക്കപ്പൽ ഉണ്ടാക്കാൻ ആരെങ്കിലുമുണ്ടോയെന്ന ഐറിഷ് സമുദ്രസാഹസിക സഞ്ചാരിയ ടിം സെവറിന്‍റെ അന്വേഷണം എത്തിയതും മറ്റാരിലുമല്ല. അങ്ങിനെയാണ്​ കയറും അയനി മരവും മാത്രമുപയോഗിച്ച്​ സൊഹാർ എന്ന പേരിൽ അറബികളുടെ പാരമ്പര്യ ചരക്കുകപ്പൽ രൂപകൽപന ചെയ്യുന്നത്​. പെരുമ്പാവൂരിൽ നിന്നുള്ള മരം ഒമാനിലെ സൂറിലെത്തിച്ചായിരുന്നു കപ്പൽ നിർമാണം. കപ്പലിനുള്ള മരം ഒമാനിലേക്ക് കൊണ്ടുപോയത്. ഒമാനിലാണ് കപ്പൽനിർമാണം പൂർത്തിയാക്കിയതും.

ടീം സെവറിനും സംഘവും ഒമാനിൽനിന്ന് ചൈന വരെ ഈ കപ്പലിൽ യാത്ര ചെയ്​തു. തിരികെ ഒമാനിലെത്തിച്ച ഈ കപ്പൽ ഒമാൻ രാജാവിന്‍റെ കൊട്ടാരത്തിനടുത്ത് പ്രദർശിപ്പിച്ചിട്ടുണ്ട്​. ലോകം മുഴുവൻ ഏകീകരിച്ച ഒരു ഹിജ്‌റ കലണ്ടറും ഏറെ പഠനത്തിന് ശേഷം ഉണ്ടാക്കിയിട്ടുണ്ട് മണിക്​ഫാൻ. ഇത്​ അംഗീകരിക്കപ്പെടാത്തതിലുള്ള സങ്കടം അദ്ദേഹം മറച്ചുവെക്കുന്നില്ല.

പെരുന്നാളും മറ്റും പല നാടുകളിൽ പല ദിവസങ്ങളിൽ ആഘോഷിക്കുന്ന സാഹചര്യമൊഴിവാക്കാൻ തന്‍റെ കലണ്ടർ പിന്തുടർന്നാൽ കഴിയുമെന്നാണ്​ മണിക്​ഫാൻ അവകാശപ്പെടുന്നത്​. ജ്യോതിശാസ്ത്രവും ജ്യോതിഷവും ഒന്നാണെന്ന തെറ്റിദ്ധാരണയാണ്​ തന്‍റെ കലണ്ടർ അംഗീകരിക്കപ്പെടാതിരിക്കുന്നതിനുള്ള കാരണമെന്ന്​ മണിക്​ഫാൻ ചൂണ്ടിക്കാട്ടുന്നു. അതേസമയം, ഇതുസംബന്ധിച്ച വിവാദങ്ങളിൽ പ്രതികരിക്കാറുമില്ല. അങ്ങിനെ ഉപയോഗശൂന്യമാക്കി കളയാൻ തന്‍റെ പക്കൽ സമയമില്ലെന്ന്​ പറയുന്നു, കള്ളിമുണ്ടും നീളൻ കുപ്പായവും തലേക്കെട്ടുമൊക്കെയായുള്ള ലാളിത്യത്തിന്‍റെ ഈ ദ്വീപുകാരൻ.