സിനിമക്കൊപ്പം 30ലേറെ വൻകിട ബ്രാൻഡുകളുടെ പരസ്യ മുഖം, ലിറ്റിൽ സ്റ്റാർ അവ്​നി തിരക്കിലാണ്...

അവ്​നി സ്കൂളിലും നാട്ടിലും താരമാണ്​. പരസ്യ ചിത്രങ്ങളിലും സിനിമയിലും കണ്ട്​ ആർക്കും പരിചിതമായ മുഖം. കുഞ്ഞുനാൾ മുതൽ നി​റയെ സംസാരിച്ചും മുഖം നിറയെ ഭാവങ്ങൾ നിറച്ചും കുസൃതി കാണിച്ചു നടന്ന കുട്ടിയുടെ ടാലന്‍റ്​ മനസ്സിലാക്കിയിരുന്നു അമ്മ വി.എൽ. രഞ്ജിനി. ഇന്ന്​ 30ലേറെ വൻകിട ബ്രാൻഡുകളുടെ പരസ്യ മുഖമാണ്​ അവ്​നി എം. അയ്യർ. ആക്ടിങ്​, ഡാൻസിങ്​, പാട്ട്​ എന്നിവയാണ്​ അവ്​നിയുടെ ഇഷ്ടങ്ങൾ.

അഞ്ചു വയസ്സു മുതൽ അഭിനയ രംഗത്ത്​

അഞ്ചു വയസ്സു മുതൽ അവ്​നി പരസ്യങ്ങളിൽ അഭിനയിക്കുന്നുണ്ട്​. പരസ്യ മേഖലയിൽ ജോലിചെയ്യുന്ന അമ്മ രഞ്ജിനി നൃത്താധ്യാപികകൂടിയാണ്​. അമ്മയുടെ ഒരു സുഹൃത്ത്​ കാസ്റ്റിങ്​ ഏജൻസി ​തുടങ്ങിയപ്പോൾ അവരുടെ ആദ്യത്തെ പ്രൊഫൈലായി നൽകിയത്​ മകളുടേതായിരുന്നു. അങ്ങനെയാണ്​ ആദ്യമായി പരസ്യത്തിൽ മുഖം കാണിക്കുന്നത്​.

‘‘ആദ്യം ത്രിവേണി അഗർബത്തീസ്​ എന്ന ബ്രാൻഡിനു​ വേണ്ടിയാണ്​ അഭിനയിച്ചത്​. അതിനുശേഷം 30ലേറെ വൻകിട ബ്രാൻഡുകളുടെ പരസ്യ ചിത്രങ്ങളിൽ അവ്​നി എത്തി. യാർഡ്​ലി, ഹ്യുണ്ടായ്​, ആംസ്റ്റാഡ്​, പോത്തീസ്​, ബിഗ്​ബസാർ, കല്യാൺ സിൽക്സ്​, കല്യാൺ ജ്വല്ലേഴ്സ്​, മലബാർ ഗോൾഡ്​, ജോയ്​ ആലുക്കാസ്​, ജോസ്​ ആലുക്കാസ്​ തുടങ്ങിയവയാണ്​ അവ്​നിയെ തേടിയെത്തിയത്​’’ -അമ്മ പറയുന്നു.

സിനിമയിലും താരം

അഞ്ചു സിനിമകളിലും അവ്​നി അഭിനയിച്ചു. ആദ്യത്തേത്​ ലൂക്ക. പിന്നെ അയ്യപ്പനും കോശിയും സിനിമയിൽ പൃഥ്വിരാജിന്‍റെ മകളായി. മമ്മൂട്ടിയുടെ ‘പുഴു’വിലും അഭിനയിച്ചു. ഷോർട്ട്​ ഫിലിം ‘ഷെയ്​ഡ്​സ്​ ഓഫ്​ ദ കൈറ്റ്​സി’ന്​ ഒട്ടേറെ അവാർഡുകൾ ലഭിച്ചു. കന്നട നടി ശ്രുതി ഹരിഹരന്‍റെ മകളായിട്ടാണ് അതിൽ​ അഭിനയിച്ചത്. ‘ശേഷം മൈക്കിൾ ഫാത്തിമ’ എന്ന കല്യാണി പ്രിയദർശന്‍റെ സിനിമ റിലീസിങ്ങിന്​ ഒരുങ്ങുന്നു. മിഥുൻ മാനുവലിന്‍റെ തിരക്കഥയിൽ ഇറങ്ങുന്ന മറ്റൊരു ചിത്രത്തിലേക്കും ക്ഷണമുണ്ട്​. ഇതുകൂടാതെ ഒട്ടേറെ സംഗീത ആൽബങ്ങളിലും അവ്​നിയെ കാണാം.

ടാലന്‍റ്​ മനസ്സിലാക്കി പരിശീലനം

കുഞ്ഞായിരുന്നപ്പോൾതന്നെ ഏറെ സംസാരിക്കുന്ന ആക്ടിവായ കുട്ടിയാണ്​ അവ്​നിയെന്ന്​ അമ്മ ഓർമിക്കുന്നു. ‘‘സംസാരിക്കുമ്പോൾ കൂടുതൽ ഭാവങ്ങൾ മുഖത്ത്​ തെളിയും. ഞാൻ നൃത്ത ക്ലാസ്​ എടുക്കുമ്പോൾ അതിനൊപ്പം അവ്​നിയും കൂടും. ഡബ്​സ്​ സ്മാഷ്​ എന്ന ആപ്പിൽ ചെറിയ വിഡിയോകളും ചെയ്തിരുന്നു. അതെല്ലാം കണ്ടപ്പോഴാണ്​ കുട്ടിയെ അഭിനയമേഖലയിലേക്ക്​ കൊണ്ടുവരാൻ ശ്രദ്ധ നൽകാമെന്ന്​ ഉറപ്പിച്ചത്’​’ -അമ്മ വിവരിച്ചു.

പിന്തുണയേകി സ്കൂളും

പതിനൊന്നുകാരിയായ അവ്​നി എറണാകുളം വൈറ്റില ടോക്​എച്ച്​ സ്കൂളിൽ ആറാം ക്ലാസിൽ​ പഠിക്കുന്നു. കലാപ്രവർത്തനങ്ങൾക്ക്​ സ്കൂളിൽനിന്ന്​ മികച്ച പിന്തുണയാണ്​ ലഭിക്കുന്നത്. ഈ അഭിരുചികൾ പഠനത്തെ ദോഷകരമായി ബാധിക്കുന്നില്ല. അഭിനയിക്കുന്നതിനായി ഒരുപാട്​ അവധികൾ എടുക്കാറില്ല. സ്കൂളിലെ ഷോർട്ട്​ഫിലിം മേക്കിങ്ങിൽ എല്ലാം അവ്​നിയാണ്​ മുന്നിൽ നിൽക്കുകയെന്നും അമ്മ പറയുന്നു.

ഡി ഫോർ ഡാൻസ്​ കൊറിയോഗ്രാഫർ ദിലീപിന്‍റെ കീഴിലാണ്​ അവ്​നി കണ്ടംപററി ഡാൻസ്​ പഠിക്കുന്നത്. ഇതിനൊപ്പം സംഗീതവും പഠിക്കുന്നു. നാടക ശില്പശാലകളിലും പ​ങ്കെടുക്കുന്നു.

●