സൂംബ: ടി.കെ അഷ്റഫിനെ സർക്കാർ വേട്ടയാടുന്നു​ - വിസ്ഡം

കോഴിക്കോട്​: സമൂഹത്തിൽ ഛിദ്രതയുണ്ടാക്കുന്ന വർഗീയ പരാമർശവുമായി ‘കാഫിർ സ്ക്രീൻ ഷോട്ട്​’ നിർമിച്ച്​ പ്രചരിപ്പിച്ച അധ്യാപകനെതിരെ നടപടി എടുക്കാതിരിക്കുകയും സൂംബ വിഷയത്തിൽ അഭിപ്രായ പ്രകടനത്തിന്‍റെ പേരിൽ വിസ്​ഡം ജന. സെക്രട്ടറി ടി.കെ. അഷ്​റഫിനെതിരെ നടപടി സ്വീകരിക്കുകയും​ ചെയ്ത സർക്കാർ സമീപനം ഇരട്ടത്താപ്പാണെന്ന്​ വിസഡം​ ഇസ്​ലാമിക്​ ഓർഗനൈസേഷൻ സംസ്ഥാന ഭാരവാഹികൾ വാർത്തസമ്മേളനത്തിൽ പറഞ്ഞു.

കാരണം കാണിക്കൽ നോട്ടീസിനുള്ള അധ്യാപകന്‍റെ വിശദീകരണത്തിന്​ പോലും കാത്തിരിക്കാതെയാണ്​ അഷ്​റഫിനെ സസ്​പെൻഡ്​ ചെയ്തുള്ള സർക്കാർ ഉത്തരവുണ്ടായത്​. ഇത്​ ചട്ടങ്ങളും മര്യാദകളും കാറ്റിൽപറത്തിയുള്ള വേട്ടയാടലാണ്​. ഇത്തരത്തിലുള്ള അച്ചടക്ക നടപടി ജനാധിപത്യ സമൂഹത്തിന്​ ഭൂഷണ​മല്ലെന്നും പിൻവലിക്കണമെന്നും നേതാക്കൾ ആവശ്യപ്പെട്ടു.

പൊതുവിദ്യാലയങ്ങളിൽ ചർച്ചയും പഠനവുമില്ലാതെ നടപ്പാക്കിയ പരിഷ്കാരത്തോട്​ സാംസ്കാരികവും മതപരവുമായുള്ള വിയോജിപ്പ്​ രേഖപ്പെടുത്തുകയാണ്​ അഷ്​റഫ്​ ചെയ്തതത്​. വിദ്യാലയങ്ങളിൽ ജൻഡർ ന്യൂട്രാലിറ്റിയുടെ മറവിൽ മതനിരാസ ആശയങ്ങൾ കടത്തിക്കൂട്ടാനുള്ള ശ്രമങ്ങളുടെ തുടർച്ചയാണ്​ സൂംബ.

ഇതിനെതിരായ വിയോജിപ്പിനെ ഈ രൂപത്തിൽ കൈകാര്യം ചെയ്യുന്നത്​ സമാന ചിന്താഗതിയുള്ള എല്ലാവർക്കുമുള്ള സർക്കാരിന്‍റെ മുന്നറിയിപ്പാണ്​. അതുകൊണ്ടുതന്നെ സമാന ആശയമുള്ളവരുമായി കൂടിയാലോചിച്ച്​ ഭാവി പരിപാടികൾ ആസൂത്രണം ചെയ്യും. അധ്യാപ​കനെതിരായ നടപടിക്കെതിരെ നിയമവഴി തേടുമെന്നും നേതാക്കൾ പറഞ്ഞു. വിസ്​ഡം സംസ്ഥാന പ്രസിഡന്‍റ്​ പി.എൻ. അബ്​ദുല്ലത്തീഫ്​ മദനി, സെ​ക്രട്ടറിമാരായ നാസിർ ബാലുശ്ശേരി, ഫൈസൽ മൗലവി, അബ്​ദുൽ മാലിക്​ സലഫി, ട്രഷറർ കെ. സജ്ജാദ്​, സിനാജുദ്ദീൻ, ഡോ. സി.പി. അബ്​ദുല്ല ബാസിൽ, സഫ്​വാൻ ബറാമി അൽ ഹികമി എന്നിവർ വാർത്തസമ്മേളനത്തിൽ പ​ങ്കെടുത്തു.