സൂംബ വിവാദം: ടി.കെ. അഷ്​റഫിന്‍റെ സസ്​പെൻഷൻ ഹൈകോടതി റദ്ദാക്കി

കൊച്ചി: സ്‌കൂളുകളില്‍ സൂംബ ഡാൻസ്​ പദ്ധതി നടപ്പാക്കുന്നതിനെതിരെ ഫേസ്ബുക്ക് പോസ്റ്റിട്ട അധ്യാപകനും വിസ്ഡം ഇസ്‌ലാമിക് ഓര്‍ഗനൈസേഷന്‍ ജനറല്‍ സെക്രട്ടറിയുമായ ടി.കെ. അഷ്‌റഫിനെ സസ്‌പെന്‍ഡ് ചെയ്ത നടപടി ഹൈകോടതി റദ്ദാക്കി.

മൂന്ന്​ ദിവസത്തിനകം മറുപടി ആവശ്യപ്പെട്ട്​ മെമോ നൽകിയതിന്‍റെ പിറ്റേ ദിവസംതന്നെ സസ്​പെൻഡ്​ ചെയ്തത്​ നിയമവിരുദ്ധമാണെന്ന്​ കാട്ടി അഷ്​റഫ്​ സമർപ്പിച്ച ഹരജി പരിഗണിച്ചാണ്​ ജസ്റ്റിസ്​ ഡി.കെ. സിങ്ങിന്‍റെ ഉത്തരവ്​. വിദ്യാഭ്യാസ വകുപ്പിനെ അപകീര്‍ത്തിപ്പെടുത്തുന്ന വിധം ഫേസ്ബുക്ക് പോസ്റ്റ് ഇട്ടതിന് ഇദ്ദേഹത്തിനെതിരെ നടപടി സ്വീകരിക്കാൻ ഹരജിക്കാരൻ അധ്യാപകനായ പാലക്കാട്​ എടത്തനാട്ടുകര ടി.എ.എം യു.പി സ്കൂൾ മാനേജ്​മെന്‍റിനോട്​​ വിദ്യാഭ്യാസ വകുപ്പ് ആവശ്യപ്പെട്ടിരുന്നു. ഇതിനെ തുടർന്നാണ്​ നടപടിയെടുത്തത്​. സസ്​പെൻഷൻ മാനേജർ പുനഃപരിശോധിക്കണമെന്നും കാരണം കാണിക്കൽ നോട്ടീസിന്​​ ഹരജിക്കാരന്‍റെ മറുപടി കൂടി പരിഗണിക്കണമെന്നും കോടതി നിർദേശിച്ചു.

അപകീർത്തികരമോ ദോഷകരമോ ആയ യാതൊന്നും ഫേസ്​ബുക്ക്​ പോസ്റ്റിലുണ്ടായിരുന്നില്ലെന്ന്​ ഹരജിയിൽ പറയുന്നു. ​സൂംബ പദ്ധതി നടപ്പാക്കുന്നതിലെ അപാകത ചൂണ്ടിക്കാട്ടുകയാണ്​ ചെയ്തത്​. എഫ്​.ബി പോസ്റ്റിന്‍റെ പേരിൽ നടപടിയെടുക്കാതിരിക്കാൻ മൂന്ന്​ ദിവസത്തിനകം മറുപടി നൽകണമെന്നാവശ്യപ്പെട്ടാണ്​​ ജൂലൈ രണ്ടിന്​ സ്കൂൾ മാനേജർ മെമോ തന്നത്​. ഏതെങ്കിലും ചട്ടമോ നിയമമോ ലംഘിച്ചതായോ സ്വഭാവദൂഷ്യം കാട്ടിയതായോ അതിലുണ്ടായിരുന്നില്ല. മറുപടിക്ക്​ ജൂലൈ അഞ്ച്​ വരെ സമയമുണ്ടായിട്ടും മൂന്നിനുതന്നെ​ സസ്​പെൻഡ്​ ചെയ്ത്​ ഉത്തരവിട്ടു. സ്വാഭാവിക നീതിയുടെ ലംഘനമാണിതെന്നും ​ഹരജിക്കാരൻ വാദിച്ചു.

തിടുക്കപ്പെട്ട്​ സസ്​പെൻഡ്​ ചെയ്തതിന്​ വിശദീകരണം നൽകാൻ സർക്കാറിനടക്കം എതിർകക്ഷികൾക്ക്​ കഴിയാതെ വന്നതോടെ​ നടപടി കോടതി റദ്ദാക്കുകയായിരുന്നു.