സുഹൃത്തുക്കൾ തമ്മിൽ വാക്കുതർക്കം: മാവേലിക്കരയിൽ യുവാവ്​ കുത്തേറ്റ്​ മരിച്ചു

മാവേലിക്കര: മുള്ളിക്കുളരങ്ങയിലെ അൻപൊലിയിൽ സുഹൃത്തുക്കൾ തമ്മിലുണ്ടായ വാർക്കുതർക്കത്തിൽ യുവാവ്​ കുത്തേറ്റ്​ മരിച്ചു. മാവേലിക്കര ഉമ്പർനാട് ചക്കാല കിഴക്കതിൽ സജേഷ് (37) ആണ് കൊല്ലപ്പെട്ടത്. തെക്കേക്കര പഞ്ചായത്ത് 19ാം വാർഡിൽ വില്ലേജ് ഓഫിസ് ജങ്ഷന് വടക്ക് കനാൽ പാലത്തിന് താഴെ അശ്വതി ജങ്ഷനിലെ അൻപൊലി കളത്തിൽ വെച്ച് വ്യാഴാഴ്ച രാത്രി 12നാണ്​ സംഭവം. പ്രതി ഉമ്പർനാട് വിഷ്ണു ഭവനം വിനോദ് (വെട്ടുകത്തി വിനോദ്-50) ഒളിവിലാണ്. കൃഷ്ണപുരം സ്വദേശിയായ സജേഷ് ഭാര്യവീടായ ചക്കാല കിഴക്കതിലായിരുന്നു താമസം.

പെയിന്റിങ് തൊഴിലാളിയാണ്. ഇടത് കൈയുടെ മസിലിൽ കുത്തേറ്റ സജേഷിന്‍റെ ഞരമ്പ് മുറിഞ്ഞിരുന്നു. മാവേലിക്കര ജില്ല ആശുപത്രിയിൽനിന്ന് കോട്ടയം മെഡിക്കൽ കോളേജിലേക്ക് കൊണ്ടുപോകും വഴി രക്തം വാർന്നായിരുന്നു മരണം. ഭാര്യ: സൗമ്യ