ഇൻറർവ്യൂവിന്​ പോയി ചെന്നൈയിൽപെട്ട യുവാവ്​ എത്തി; സൈക്കിളിലും ലോറിയിലുമായി

കുമളി: ലോക്​ഡൗണിനെത്തുടർന്ന് ജോലി നഷ്​ടമായ യുവാവ് ദുരിതത്തിനിടെ നാട്ടിലെത്തിയത് സൈക്കിളിലും ചരക്കുലോറിയിലുമായി. അടൂർ മുളമുക്ക് ഷാരോൺ വില്ലയിൽ അനീഷ് ഷാജനാണ് (25) ചൊവ്വാഴ്ച രാത്രിയോടെ അടൂരിലെ വീട്ടിലെത്തിയത്.
മാർച്ച് മൂന്നിനാണ് സ്വകാര്യകമ്പനിയിലെ ഇൻറർവ്യൂവിന്​ അനീഷ് ചെന്നൈയിലെത്തിയത്. 23ന് അക്കൗണ്ടൻറായി ജോലിയിൽ പ്രവേശിക്കാനിരിക്കെയാണ് ലോക്ഡൗൺ പ്രഖ്യാപിച്ചത്. ഈ കാലയളവിൽ ചെന്നൈയി​െല സഹോദരനൊപ്പമായിരുന്നു താമസം. ജോലി നഷ്​ടമായെന്നുമാത്രമല്ല, ഇരുവർക്കും സാമ്പത്തികപ്രതിസന്ധിയും രൂക്ഷമായതോടെ അനീഷ് നാട്ടിലേക്ക് തിരിക്കുകയായിരുന്നു.

ചെന്നൈയിൽനിന്ന്​ വാങ്ങിയ സൈക്കിളിൽ തിങ്കളാഴ്ച രാവിലെ യാത്ര തുടങ്ങി. 80 കി.മീറ്റർ എത്തി അവിടെനിന്ന്​ കണ്ടെയ്നർ ലോറിയിൽ മധുരയിലേക്കും അവിടെനിന്ന് പൊലീസുകാരുടെ സഹായത്തോടെ മറ്റൊരു ചരക്കുലോറിയിൽ തേനിയിലും എത്തി. സൈക്കിളിൽ പൊലീസ് ചെക്ക്​​പോസ്​റ്റുകൾ താണ്ടി തേനിയിലും ലോവർ ക്യാമ്പിലും എത്തി. വീണ്ടും പച്ചക്കറിവണ്ടികളിൽ ചൊവ്വാഴ്ച രാത്രി കുമളിയിലെത്തി. പലഘട്ടത്തിലായി 150 കിലോമീറ്ററോളം പൊരിവെയിലിൽ സൈക്കിളിൽ യാത്ര ചെയ്തതായി അനീഷ് ‘മാധ്യമ’ത്തോട്​ പറഞ്ഞു. യാത്രക്കിടെ മറ്റുഭക്ഷണമൊന്നും ലഭിച്ചില്ല. കൈയിൽ കരുതിയ മൂന്ന്​ ലിറ്റർ വെള്ളവും റൊട്ടിയും മാത്രമായിരുന്നു ആശ്വാസം. ചൊവ്വാഴ്ച വൈകീട്ട് കുമളിയിലെത്തിയ അനീഷിനെ അധികൃതർ ഏർപ്പെടുത്തിയ വാഹനത്തിൽ അടൂരിലേക്ക് അയക്കുകയായിരുന്നു.