പ്രായപൂർത്തിയാകാത്ത പെൺകുട്ടിയെ ബലാത്സംഗം ചെയ്തയാൾക്ക് 50 വർഷം കഠിനതടവ്

കുന്നംകുളം: പ്രായപൂർത്തിയാകാത്ത പെൺകുട്ടിയെ ബലാത്സംഗം ചെയ്ത കേസിലെ പ്രതിക്ക് 50 വർഷം കഠിനതടവും 60,000 രൂപ പിഴയും. പോർക്കുളം പന്തായിൽ സായൂജിനെയാണ് ​(23) കുന്നംകുളം ഫാസ്റ്റ് ട്രാക്ക് സ്പെഷൽ പോക്സോ കോടതി ജഡ്ജി റീന എം. ദാസ് ശിക്ഷിച്ചത്.

2018 ഫെബ്രുവരി മുതൽ പെൺകുട്ടിയുടെ വീട്ടിൽ കയറി ബലാത്സംഗം ചെയ്യുകയും ഭീഷണിപ്പെടുത്തുകയും ചെയ്ത കേസിലാണ് ശിക്ഷ. വീട്ടിലേക്ക് പ്രതി തുടർച്ചയായി അതിക്രമിച്ചു കയറുകയും പീഡിപ്പിക്കുകയും ഭീഷണിപ്പെടുത്തുകയും ചെയ്തതോടെ പെൺകുട്ടി കൈഞരമ്പ് മുറിച്ച് ആത്മഹത്യക്ക് ശ്രമിച്ചിരുന്നു. തുടർന്നാണ് സംഭവം വീട്ടുകാർ അറിയുന്നത്. പിന്നീട് രക്ഷിതാക്കൾ കുന്നംകുളം പൊലീസിൽ പരാതി നൽകുകയായിരുന്നു.

പ്രോസിക്യൂഷനുവേണ്ടി സ്പെഷൽ പബ്ലിക് പ്രോസിക്യൂട്ടർ (പോക്സോ) കെ.എസ്. ബിനോയിയും പ്രോസിക്യൂഷൻ സഹായത്തിനായി അഡ്വ. അമൃതയും ഹാജരായി. 19 സാക്ഷികളെ വിസ്തരിക്കുകയും 20 രേഖകളും തൊണ്ടിമുതലുകളും ഹാജരാക്കുകയും ശാസ്ത്രീയ തെളിവുകൾ നിരത്തുകയും ചെയ്തു.

കുന്നംകുളം സബ് ഇൻസ്പെക്ടറും ഇപ്പോൾ ഗുരുവായൂർ എ.സി.പിയുമായ കെ.ജി. സുരേഷാണ് അറസ്റ്റ് ചെയ്ത് കുറ്റപത്രം സമർപ്പിച്ചത്. പ്രോസിക്യൂഷനെ സഹായിക്കുന്നതിന്​ കുന്നംകുളം സ്റ്റേഷനിലെ സിവിൽ പൊലീസ് ഓഫിസർ സുജിത്ത് കാട്ടിക്കുളവും പ്രവർത്തിച്ചു.