പൊലീസ്​ വിരട്ടി​േയാടിച്ച യുവാവ്​ കിണറ്റിൽ മരിച്ചനിലയിൽ

ചേലക്കര (തൃശ്ശൂർ): ബാറിലെ അടിപിടിക്കിടെ പൊലീസ് വിരട്ടി​േയാടിച്ച യുവാവിനെ അടുത്ത പറമ്പിലെ കിണറ്റിൽ മരിച്ചനിലയിൽ കണ്ടെത്തി. നാട്യൻചിറ കൂർക്കപറമ്പിൽ ദേവദാസി​​​​െൻറ മകൻ പ്രജീഷിനെയാണ്​ (31) തിങ്കളാഴ്ച വൈകീട്ട് മേപ്പാടത്തെ ബാറിന് സമീപത്തെ  ഉപയോഗശൂന്യമായ കിണറ്റിൽ കണ്ടെത്തിയത്.

ഞായറാഴ്ച വൈകീട്ട് ബാറിൽ മദ്യപിച്ചവർ തമ്മിൽ അടിപിടി ഉണ്ടായതിനെ തുടർന്ന് പൊലീസെത്തി ലാത്തിവീശി പ്രശ്​നക്കാരെ ഒാടിച്ചിരുന്നു. ഇതിനിടെ ഇറങ്ങിയോടിയ പ്രജീഷ് അബദ്ധത്തിൽ തൊട്ടടുത്തെ കിണറ്റിൽ വീണിരിക്കാമെന്നാണ്​ പൊലീസ്​ നിഗമനം.

പ്രജീഷിനെ കാണാതെ വീട്ടുകാർ തിരച്ചിൽ നടത്തിയിരുന്നു. ഇതിനിടെയാണ്​ തിങ്കളാഴ്​ച രാത്രി മൃതദേഹം കിണറ്റിൽ പൊങ്ങിയത്. ഫയർഫോഴ്‌സ് എത്തി മൃതദേഹം പുറത്തെടുത്തു. സംഭവത്തിൽ ബന്ധുക്കളും നാട്ടുകാരും പൊലീസിനെതിരെ പ്രതിഷേധവുമായി രംഗത്തെത്തി. പോസ്​റ്റ്​മോർട്ടത്തിനായി മൃതദേഹം തൃശൂർ മെഡിക്കൽ കോളജ് മോർച്ചറിയിലേക്ക് മാറ്റി. മാതാവ്​: പുഷ്‌പ. ഭാര്യ: സൗമ്യ. മക്കൾ: അമൃത, അമൽനാഥ്.