മലപ്പുറം ജില്ലയിൽ രണ്ടു പേർ വെള്ളക്കെട്ടിൽ മുങ്ങി മരിച്ചു

തിരൂരങ്ങാടി: കൊടിഞ്ഞി മച്ചിങ്ങത്താഴത്ത് യുവാവും മൂന്നിയൂര്‍ കളിയാട്ടമുക്ക് കാര്യാട് കടവില്‍ പുരയിടത്തിലെ വെള്ളക്കെട്ടില്‍ വീണ്​ ബാലനുമടക്കം മലപ്പുറം ജില്ലയിൽ രണ്ടുപേർ മുങ്ങി മരിച്ചു. 

നന്നമ്പ്ര ദുബൈ പീടിക സ്വദേശിയും കൊടിഞ്ഞി മങ്കടക്കുറ്റിയില്‍ താമസക്കാരനുമായ പൂക്കയില്‍ സത്താറി​​​െൻറ മകന്‍ ഫസലുറഹ്മാന്‍ (22), കളിയാട്ടമുക്ക് സ്വദേശി കോയിപറമ്പത്ത് മൊയ്തീന്‍കുട്ടിയുടെ മകന്‍ മുഹമ്മദ് ഹനാൻ​ (ആറ്) എന്നിവരാണ്​ മരിച്ചത്. വെള്ളിയാഴ്ച വൈകീട്ട് ആറരയോടെ കുണ്ടൂര്‍ പാടത്ത് സുഹൃത്തുമൊത്ത് നടക്കുന്നതിനിടെ ഫസലുറഹ്മാന്‍ ഒഴുക്കില്‍പെടുകയായിരുന്നു.

സുഹൃത്ത് രക്ഷിക്കാന്‍ ശ്രമിച്ചെങ്കിലും ഫസല്‍ മുങ്ങിത്താഴുകയായിരുന്നു. ഉടൻ സമീപത്തുള്ളവരെ അറിയിച്ച് തിരച്ചില്‍ നടത്തിയെങ്കിലും കണ്ടെത്താനായില്ല. ശനിയാഴ്​ച രാവിലെ ആറോടെ സംഭവസ്ഥലത്ത് തന്നെ മൃതദേഹം പൊങ്ങുകയായിരുന്നു. തിരൂരങ്ങാടി താലൂക്ക് ആശുപത്രിയില്‍ പോസ്​റ്റ്​മോര്‍ട്ടത്തിന് ശേഷം ഉച്ചക്ക് രണ്ടോടെ കൊടിഞ്ഞി പള്ളി ഖബർസ്ഥാനില്‍ മറവ് ചെയ്തു. മാതാവ്: മൈമൂന. സഹോദരങ്ങള്‍: ജംഷീദ്, ഫര്‍സാന, മിന്നു.

ശനിയാഴ്​ച രാവിലെ പത്തോടെ പുരയിടത്തില്‍ കളിക്കുകയായിരുന്ന ഹനാന്‍ ഒഴുക്കില്‍പ്പെടുകയായിരുന്നു. തിരൂരങ്ങാടി താലൂക്ക് ആശുപത്രിയില്‍ പോസ്​റ്റ്​മോര്‍ട്ടത്തിന് ശേഷം വൈകിട്ടോടെ കളിയാട്ടമുക്ക് പെരിയത്ത് കടവ് ജുമാമസ്ജിദില്‍ ഖബറടക്കി. മാതാവ്: നസീറ. സഹോദരങ്ങള്‍: നിഹാല, അന്‍ഷിദ.