റിജില്‍ മാക്കുറ്റി, ഡോ.സരിൻ, വീണ, റിയാസ്​ മുക്കോളി... 20 അംഗ സ്ഥാനാർഥി പട്ടികയുമായി യൂത്ത്​ കോൺഗ്രസ്​ ഹൈകമാൻഡിനടുത്തേക്ക്​

പാലക്കാട്​: നിയമസഭ തെരഞ്ഞെടുപ്പിൽ പരിഗണിക്കാൻ സ്വന്തം സ്ഥാനാർഥി പട്ടികയുമായി യൂത്ത്​ കോൺഗ്രസ്​ നേതൃത്വം ഹൈകമാൻഡിനെ സമീപിക്കാനൊരുങ്ങുന്നു. മലമ്പുഴയിൽ നടന്ന സംസ്ഥാന ക്യാമ്പി​ൽ എടുത്ത തീരുമാനപ്രകാരം പട്ടിക അഖിലേന്ത്യ യൂത്ത്​ കോൺ​ഗ്രസ്​ നേതൃത്വത്തിന്​ കൈമാറി.

ഇതില്‍ സംസ്ഥാന, ജില്ല നേതാക്കളായ ഇരുപതോളം പേരുണ്ട്​. സംസ്ഥാന വൈസ് പ്രസിഡൻറുമാരായ റിജില്‍ മാക്കുറ്റി (കണ്ണൂര്‍ അല്ലെങ്കില്‍ ഇരിക്കൂര്‍), റിയാസ് മുക്കോളി (തവനൂര്‍ അല്ലെങ്കില്‍ പട്ടാമ്പി), എസ്.എം. ബാലു (ആറ്റിങ്ങല്‍), എന്‍.എസ്. നൂസൂര്‍ (നെടുമങ്ങാട് അല്ലെങ്കില്‍ നേമം), പത്തനംതിട്ട ജില്ല പ്രസിഡൻറ്​ എം.ജി. കണ്ണന്‍ (അടൂര്‍), ആലപ്പുഴ ജില്ല പ്രസിഡൻറ്​ റ്റിജിന്‍ ജോസഫ് (കുട്ടനാട്), കൊല്ലം ജില്ല പ്രസിഡൻറ്​ അരുണ്‍ രാജ് (ചടയമംഗലം അല്ലെങ്കില്‍ പത്തനാപുരം), കോട്ടയം ജില്ല പ്രസിഡൻറ്​ ചിന്തു കുര്യന്‍ ജോയ് (കാഞ്ഞിരപ്പള്ളി), പാലക്കാട് ജില്ല പ്രസിഡൻറ്​ ഫിറോസ് ബാബു (ഷൊര്‍ണൂര്‍), ദേശീയ സെക്രട്ടറി വിദ്യ ബാലകൃഷ്ണന്‍ (കോഴിക്കോട് നോര്‍ത്​ അല്ലെങ്കില്‍ ബേപ്പൂര്‍), മഹിള കോണ്‍ഗ്രസ് നേതാവ് കൂടിയായ വീണ എസ്. നായര്‍ (വട്ടിയൂര്‍ക്കാവ്), യൂത്ത് കോണ്‍ഗ്രസ് സംസ്ഥാന സെക്രട്ടറിമാരായ ഡോ. സരിന്‍ (ഒറ്റപ്പാലം), ശോഭ സുബിന്‍ (കൈപ്പമംഗലം), എ.എം. രോഹിത് (പൊന്നാനി), കെ.എസ്​. അരുണ്‍ (ഉടുമ്പൻചോല), എം.പി. പ്രവീണ്‍ (അമ്പലപ്പുഴ), വിഷ്ണു സുനില്‍ (കൊല്ലം), ജോബിന്‍ ജേക്കബ് (ഏറ്റുമാനൂര്‍), ഫൈസല്‍ കുളപ്പാടം (കുണ്ടറ) എന്നിവരാണ് യൂത്ത് കോണ്‍ഗ്രസി​െൻറ പട്ടികയില്‍ ഇടംപിടിച്ചിരിക്കുന്നത്​.

'സ്ഥിരം നാടകകളരിയിലെ അഭിനേതാക്കളെ' തന്നെയാണ് തെരഞ്ഞെടുപ്പിൽ കളത്തിലിറക്കുന്നതെങ്കിൽ യൂത്ത്​ കോൺ​ഗ്രസിന്​ സ്വന്തംനിലയിൽ സ്ഥാനാർഥികളെ പ്രഖ്യാപിക്കേണ്ടിവരുമെന്ന്​ സംസ്ഥാന ക്യാമ്പ്​ എക്​സിക്യൂട്ടിവ്​ അംഗീകരിച്ച പ്രമേയത്തിൽ വ്യക്തമാക്കിയിരുന്നു. സംസ്ഥാന വൈസ്​ പ്രസിഡൻറ്​ റിജിൻ മാക്കുറ്റി അവതരിപ്പിച്ച പ്രമേയം വിവാദമായതിന്​ പിന്നാലെയാണ്​ സ്വന്തം പട്ടിക ഹൈകമാൻഡ്​ മുമ്പാകെ അവതരിപ്പിക്കാൻ ​നീക്കമാരംഭിച്ചത്​.