വൈറലാകാനിറങ്ങി വലയിലായി-ലൈസൻസില്ലാ​തെ, ഹെൽമറ്റും മാസ്​കും ഉടുപ്പും ധരിക്കാതെ, രൂപമാറ്റം വരുത്തിയ ​ബൈക്കോടിച്ച യുവാവ്​ പിടിയിൽ

കൊച്ചി: പറ്റുന്ന നിയമലംഘനങ്ങളെല്ലാം ചെയ്​തിട്ടുണ്ട്​​. ലൈസൻസ്​ ഇല്ല, ഹെൽമറ്റും മാസ്​കും ഉടുപ്പും ധരിച്ചിട്ടില്ല... ഓടിക്കുന്നതോ രൂപമാറ്റം വരുത്തിയ ബൈക്കും. സമൂഹ മാധ്യമങ്ങളിൽ വൈറലാകാൻ നിയമങ്ങൾ കാറ്റിൽ പറത്തി ബൈക്കിൽ യാ​ത്ര ചെയ്​ത യുവാവിനെ പൊലീസ്​ വലയിലാക്കുകയും ചെയ്​തു.

ചെറായി സ്വദേശി റിച്ചൽ സെബാസ്റ്റ്യനെയാണ്​ പൊലീസ് പിടികൂടിയത്. നിയമലംഘനം നടത്തി റിച്ചൽ ബൈക്കോടിക്കുന്ന വീഡിയോ സമൂഹ മാധ്യമങ്ങളിൽ വൈറലായതോടെ പൊലീസ്​ അന്വേഷണം നടത്തുകയായിരുന്നു. ഇയാളുടെ സുഹൃത്തുക്കളാണ്​ മറ്റൊരു ബൈക്കിൽ യാത്ര ചെയ്ത് ദൃശ്യങ്ങൾ പകർത്തിയത്​. വീഡിയോ പരിശോധിച്ച സൈബർ​ പൊലീസ്​ എറണാകുളം മുനമ്പത്തുനിന്നുള്ള വീഡിയോ ആണ്​ ഇതെന്ന്​ കണ്ടെത്തി. തുടർന്നു നടത്തിയ അന്വേഷണത്തിലാണ്​ റിച്ചൽ പിടിയിലായത്. മാസ്ക് ധരിക്കാത്തതിനും കോവിഡ് മാനദണ്ഡങ്ങൾ ലംഘിച്ചു യാത്ര ചെയ്തതിനും ലൈസൻസില്ലാതെയും ഹെൽമറ്റില്ലാതെയും വാഹനമോടിച്ചതിനുമാണ്​ പൊലീസ് കേസെടുത്തിരിക്കുന്നത്​.

മോ​ട്ടോര്‍ വാഹന വകുപ്പ് നിയമം, കോവിഡ് പ്രോട്ടോക്കോള്‍ ലംഘനം എന്നിവയുള്‍പ്പെടെ ആറ് വകുപ്പുകളാണ് ചുമത്തിയിരിക്കുന്നത്. റിച്ചലിന്‍റെ സുഹൃത്തിന്‍റെയാണ്​ ബൈക്ക്​. അനുമതിയില്ലാതെ ബൈക്കിൽ രൂപമാറ്റം വരുത്തിയതിനും കേസുണ്ട്. റിച്ചലിനെ സ്റ്റേഷൻ ജാമ്യത്തിൽ വിട്ടയച്ചെങ്കിലും ബൈക്ക് പൊലീസ് കസ്റ്റഡിയിലെടുത്തു. ഇത് കോടതിയിൽ ഹാജരാക്കുമെന്നു മുനമ്പം എസ്.ഐ പറഞ്ഞു. ബൈക്ക് രൂപമാറ്റം വരുത്തിയതിന് സുഹൃത്തിനെതിരെയും നടപടിയുണ്ടാകും. മോ​ട്ടോർ വെഹിക്കിൾ ഡിപാർട്മെന്‍റിനു ഇതുസംബന്ധിച്ച വിവരം കൈമാറും.