കെട്ടിട ഉടമ പുറത്താക്കി; മഹാരാഷ്​ട്രയിൽനിന്ന്​ ലോറിയിലും ബൈക്കിലുമായി യുവാവ് കേരളത്തിൽ

മറയൂർ (ഇടുക്കി): ലോക്​ഡൗണിൽ അകപ്പെട്ട് മഹാരാഷ്​ട്രയിൽ ഒറ്റപ്പെട്ട യുവാവ്​ സാഹസികമായി സ്വന്തം നാട്ടിലെത്തി. മറയൂർ പയസ്​നഗർ സ്വദേശി മണികണ്ഠനാണ്​ നടന്നും ലോറിയിൽ കയറിയും ബൈക്കിലുമായി കേരളത്തിൽ എത്തിച്ചേർന്നത്. വിവിധ സംസ്​ഥാന അതിർത്തികൾ താണ്ടി എത്തിയ യുവാവിനെ കാന്തല്ലൂരിൽ ക്വാറൻറീൻ ചെയ്തു.

കഴിഞ്ഞ നവംബർ മുതൽ മഹാരാഷ്​ട്ര അ രോണയിലെ സ്വകാര്യ കമ്പനിയിലാണ് ജോലി ചെയ്തിരുന്നത്. കമ്പനിയാണ് ഭക്ഷണവും താമസസൗകര്യവും ഒരുക്കിയിരുന്നത്. ലോക്​ഡൗൺ ആയപ്പോൾ കമ്പനി വിവിധ സംസ്ഥാനങ്ങളിൽനിന്നെത്തിയ യുവാക്കളെ കൈയൊഴിയുകയായിരുന്നു. ആദ്യ ആഴ്​ച പിന്നിട്ടതോടെ ഭക്ഷണം ലഭിക്കാതെയായി.

ദിവസങ്ങൾ പിന്നിട്ടതോടെ കെട്ടിടഉടമ വാടക ആവശ്യപ്പെട്ടു. നൽകേണ്ടതി​െല്ലന്ന്​ സർക്കാർ ഉത്തരവിട്ടകാര്യം ചൂണ്ടിക്കാട്ടിയതിനു​ മർദനവുമേറ്റു. പൊലീസ്​ സഹായമോ ഭക്ഷണമോ ലഭിക്കാതെ വന്നതോടെ പട്ടിണികിടന്ന് മരിക്കേണ്ടി വരു​െമന്ന ഘട്ടത്തിലാണ് സ്വന്തം നാടുകളിലേക്ക് പുറപ്പെട്ടതെന്ന്​ മണികണ്​ഠൻ പറഞ്ഞു.

താമസസ്ഥലത്തുനിന്ന്​ നടന്ന് മാർക്കറ്റിൽ എത്തി തമിഴ്നാട്ടിലേക്ക് ചരക്കുമായി വരുന്ന ലോറി കണ്ടുപിടിച്ച് സഹായം അഭ്യർഥിച്ചു. 2000 രൂപ വാങ്ങി ഈറോഡിലെത്തിച്ചു. ചൊവ്വാഴ്ച പുലർച്ച കോയമ്പത്തൂരിലേക്ക് മറ്റൊരു ലോറിയിൽ കയറ്റി വിട്ടു. കോയമ്പത്തൂരിലെ ബന്ധുവി​​െൻറ ബൈക്ക്​ തരപ്പെടുത്തി മറയൂരിലേക്ക് വരുകയായിരുന്നു.

അതിർത്തിയിൽ എത്തിയപ്പോൾ യുവാവിനെ തടഞ്ഞു മടക്കി അയക്കാനായിരുന്നു നിർദേശം. ബന്ധുക്കൾ അറിയിച്ചതിനെ തുടർന്ന് എസ്.​ രാജേന്ദ്രൻ എം.എൽ.എ ബന്ധപ്പെട്ട്​ ഇവിടെ നിരീക്ഷണത്തിലാക്കാൻ അനുമതി വാങ്ങുകയായിരുന്നു.