ക്രിമിനൽ സംഘങ്ങൾ തമ്മിലെ ഒത്തുതീർപ്പ്​ ചർച്ചക്കിടെ യുവാവിന്​ വെ​ട്ടേറ്റു

കൊടുങ്ങല്ലൂർ: ക്രിമിനൽ സംഘങ്ങൾ തമ്മിലെ ഒത്തുതീർപ്പ് ചർച്ചക്കിടെ നടന്ന ആക്രമണത്തിൽ യുവാവിന് വെട്ടേറ്റു. എസ്.എൻ.പുരം ചെന്തെങ്ങ് ബസാറിലാണ് സംഭവം. കൈക്ക് വെട്ടേറ്റതിനെ തുടർന്ന് ഞരമ്പ് അറ്റ മുള്ളൻ ബസാർ തലക്കാട്ട് ഷാനവാസിനെ (33) എറണാകുളം മെഡിക്കൽ ട്രസ്​റ്റ്​ ആശുപതിയിൽ പ്രവേശിപ്പിച്ചു. 

ഇയാളെ ആക്രമിച്ച ശാന്തിപുരം ഊളക്കൽ സിദ്ദീഖിനെതിരെ (24) മതിലകം പൊലീസ് കേസെടുത്തു. ഇയാൾ ഒളിവിലാണ്. ഈയിടെ കട്ടൻ ബസാറിൽ നിന്ന് പൊലീസ് ശീട്ടുകളി പിടിച്ചിരുന്നു. ഇത് ഷാനവാസിൻെറ ഒറ്റാണെന്നാണ് സിദ്ദീഖും സംഘവും കരുതുന്നത്. 

ഈ തർക്കം മുത്തതോടെയാണ് ഒത്തുതീർപ്പ് ചർച്ചവെച്ചത്. ഇരുവരും മതിലകം സ്​റ്റേഷനിലെ ക്രിമിനൽ കേസുകളിൽ പ്രതികളാണെന്നും സീനിയർ, ജൂനിയർ എന്നിങ്ങനെ അറിയപ്പെടുന സംഘങ്ങളെ നയിക്കുന്നവരാണെന്നും പൊലീസ് പറഞ്ഞു.