എഴുത്തുകാരി ദേവകി നിലയങ്ങോട് അന്തരിച്ചു

മലപ്പുറം: സാമൂഹിക പരിഷ്‌കർത്താവും എഴുത്തുകാരിയുമായ ദേവകി നിലയങ്ങോട് അന്തരിച്ചു. 95 വയസായിരുന്നു. തൃശൂരിലെ വസതിയിൽ വ്യാഴാഴ്ച ഉച്ചക്ക് 12.15നായിരുന്നു അന്ത്യം.

ബ്രാഹ്മണ സമുദായത്തിലെ സ്ത്രീകളുടെ ഉന്നമനത്തിനായി പ്രവർത്തിച്ച വ്യക്തിയായിരുന്നു.1928ൽ മലപ്പുറം ജില്ലയിലെ മുക്കുതല പകരാവൂർ മനയിലാണ് ജനനം. 75ാം വയസിൽ പുറത്തിറക്കിയ 'നഷ്ടബോധങ്ങളില്ലാതെ -ഒരു അന്തർജനത്തിന്റെ ആത്മകഥ', 'കാലപ്പകർച്ചകൾ', 'യാത്ര: കാട്ടിലും നാട്ടിലും' എന്നിവയാണ് പ്രധാന കൃതികൾ.

അടുത്തിടെ അന്തരിച്ച പ്രമുഖ വിദ്യാഭ്യാസ വിചക്ഷണനും എഴുത്തുകാരനുമായ പി. ചിത്രൻ നമ്പൂതിരിപ്പാടിന്റെ സഹോദരിയാണ്. ഏറെ നാളായി വാർധക്യസഹജമായ അസുഖത്തെ തുടർന്ന് കിടപ്പിലായിരുന്നു. ഭർത്താവ് പരേതനായ രവി നമ്പൂതിരി. സംസ്കാരം വെള്ളിയാഴ്ച നടക്കും.