ലോക അനിമേഷൻ മത്സരം: മലയാളികൾ അടങ്ങിയ ഐ.ഐ.ടി വിദ്യാർഥികൾ ഒന്നാമത്

ലണ്ടൻ: രാജ്യാന്തര പ്രശസ്തമായ 24-അവർ അനിമേഷൻ ചലഞ്ച് മത്സരത്തിൽ ഒന്നാമതെത്തി മലയാളികളടങ്ങിയ ഐ.ഐ.ടി ഗുവാഹതി വിദ്യാർഥികൾ.

കോഴിക്കോട് സ്വദേശി അസീൽ പാഷ, പത്തനംതിട്ട അടൂരുകാരനായ എസ്. ബാലശങ്കർ, കൊൽക്കത്ത സ്വദേശി അരിൻ ബന്ദോപാധ്യായ, മഹാരാഷ്ട്ര പു​ണെ സ്വദേശി ആദിത്യ പവാർ എന്നിവരാണ് വിജയിച്ച ടീമിലെ അംഗങ്ങൾ. 35 രാജ്യങ്ങളിലെ 755 ടീമുകളിലായി 3220 വിദ്യാർഥികളാണ് മത്സരത്തിൽ മാറ്റുരച്ചത്. ഇന്ത്യയിൽനിന്ന് ആദ്യമായാണ് ഒരു ടീം ജയിക്കുന്നത്.

വാൾട്ട് ഡിസ്നി, പിക്സർ, നെറ്റ്ഫ്ലിക്സ്, വാർണർ, സോണി പിക്ചേഴ്സ് തുടങ്ങി ഈ രംഗത്തെ വമ്പന്മാരുടെ പിന്തുണയോടെ നടക്കുന്ന മത്സരത്തിന്റെ ജഡ്ജിമാരായെത്തുന്നത് കുങ് ഫു പാണ്ട, ടോയ് സ്​റ്റോറി, ഫ്രോസൺ തുടങ്ങിയ നിർമിക്കുന്ന സ്റ്റുഡിയോകളിലെ പ്രഫഷനലുകളാണ്.