മതേതരത്വ നിലപാടില്‍ വെളളം ചേര്‍ക്കരുത്; കോണ്‍ഗ്രസിന്‍റെ പ്രവര്‍ത്തന ശൈലി മാറണം -കെ.മുരളീധരന്‍

കോഴിക്കോട്: കോണ്‍ഗ്രസിന്‍റെ പ്രവര്‍ത്തന ശൈലിയും ഘടനയും മാറണമെന്ന് കെ. മുരളീധരന്‍ എം.പി. മതേതരത്വ നിലപാടിൽ വെള്ളം ചേർക്കരുത്. ബി.ജെ.പിയാണ് കോൺ​ഗ്രസിന്റെ മുഖ്യ ശത്രു. കേരളത്തിൽ ശത്രുക്കൾ സി.പി.എമ്മും ബി.ജെ.പിയുമാണെന്നും മുരളീധരൻ മാധ്യമങ്ങളോട് പറഞ്ഞു.

2001ന് ശേഷം കോൺഗ്രസ് കക്ഷി നിലയിൽ ഒന്നാം സ്ഥാനത്ത് എത്തിയിട്ടില്ല. കോൺഗ്രസിനെ ഒന്നാം സ്ഥാനത്തേക്ക് എത്തിക്കുക എന്ന പ്രതിജ്ഞയാണ് കരുണാകരന്റെ ഈ അനുസ്മരണ വേളയിൽ എടുക്കേണ്ടത്. എന്തു കൊണ്ട് തോറ്റു എന്നതല്ല, എങ്ങനെ ജയിക്കുമെന്നതിനെക്കുറിച്ചാണ് ആലോചിക്കേണ്ടത് -മുരളീധരൻ പറഞ്ഞു.

കേരളത്തിൽ സി.പി.എം ശത്രുവാകുന്നത് അവർ കേരളത്തിൽ സ്വീകരിക്കുന്ന ശൈലി കേന്ദ്രത്തിൽ ബി.ജെ.പിയുടെ കാർബൺ പതിപ്പാണ് എന്നതിനാലാണ്. കേന്ദ്രത്തിൽ ബിജെപി സ്വീകരിക്കുന്ന ശൈലിയാണ് കേരളത്തിൽ സി.പി.എമ്മിന്റേത്. തെരഞ്ഞെടുപ്പിൽ ഒമ്പതിടത്ത് ബി.ജെ.പി രണ്ടാം സ്ഥാനത്ത് വന്നത് നിസാരമായി തള്ളരുതെന്നും അദ്ദേഹം പറഞ്ഞു.