വടയെന്ന്​ കരുതി സ്​ത്രീ ബസിൽ നിന്ന്​ വലിച്ചെറിഞ്ഞത്​ 12 പവൻ സ്വർണം

കോഴിക്കോട്​: ബസിൽ യാത്ര ചെയ്യവെ കഴിച്ച്​ ബാക്കിയായ വടയാണെന്ന ധാരണയിൽ സ്​ത്രീ പുറത്തേക്ക്​ വലിച്ചെറിഞ്ഞത്​ സ്വർണാഭരണം. വടയും സ്വർണാഭരണവും കൈയിൽ വെച്ചായിരുന്നു​ യാത്ര. പാതി കഴിച്ച വടയാണെന്ന ധാരണയിൽ പുറത്തേക്കെറിഞ്ഞതാവ​ട്ടെ​ 12 പവൻ തൂക്കമുള്ള സ്വർണാഭരണം. സുൽത്താൻ ബത്തേരി ചുള്ളിയോട്​ കൈതക്കുന്നം വീട്ടിൽ ഖൗലത്തിനാണ്​ അബദ്ധം പറ്റിയത്​.

ബാങ്കിൽ പണയം വെച്ച സ്വർണം എടുത്ത്​ വരികയായിരുന്നു​. കോട്ടയത്തു നിന്നുള്ള ബസ്​ രാത്രി ഒമ്പത്​ മണിയോടെ രാമനാട്ടുകര എത്തിയപ്പോഴായിരുന്നു സംഭവം. അധികം വൈകാതെ അമളി മനസ്സിലായ ഖൗലത്ത്​ ഉറക്കെ നിലവിളിച്ചു. തുടർന്ന്​ ബസ്​ നിർത്തി ഖൗലത്തും മറ്റൊരു യാത്രക്കാരനും പുറത്തിറങ്ങി തിരച്ചിൽ ആരംഭിച്ചു. ഇരുവരും തിരയുന്നത്​ കണ്ട ഓ​​ട്ടോ ​ൈഡ്രവർ കള്ളിത്തൊടി കണ്ണംപറമ്പ്​ ജാസിറും തിരയാൻ ഒപ്പം കൂടി.

ഏറെ നേരം തിരഞ്ഞിട്ടും ആഭരണം കണ്ടെത്താനാവാതിരുന്നതോടെ ഫറോഖ്​ പൊലീസിൻെറ സഹായം തേടി. തുടർന്ന്​ പൊലീസും തിരയാൻ കൂടി. ഒടുവിൽ പൂവന്നൂർ പള്ളിക്ക്​ സമീപമുള്ള ഡിവൈഡറിനരികിൽവെച്ച്​ ഓ​ട്ടോ ഡ്രൈവർ ജാസിറിന് ആഭരണം​ ലഭിച്ചു. പൊലീസിൻെറ സാന്നിധ്യത്തിൽ സ്വർണാഭരണം ഖൗലത്ത്​ ഏറ്റുവാങ്ങി.