ഉളിയക്കോവിൽ യുവതി കുത്തേറ്റുമരിച്ച സംഭവം: കുടുംബത്തിന് നേരെ മുമ്പും ഭീഷണി

കൊല്ലം: മലിനജലം ഒഴുക്കുന്നതുമായി ബന്ധപ്പെട്ട തർക്കത്തിനിടെ കുത്തേറ്റുമരിച്ച അഭിരാമി(24)യുടെ സംസ്കാരം ഞായറാഴ്ച നടക്കും. വിദേശത്തായിരുന്ന പിതാവ് മോസസ് ദാമോദർ ഞായറാഴ്ച നാട്ടിലെത്തും.

അതേസമയം, കുത്തേറ്റ്​ ഗുരുതരാവസ്ഥയിൽ കഴിയുന്ന വീട്ടമ്മയെ പ്രതി മുമ്പും കൊല്ലുമെന്ന്​ ഭീഷണിപ്പെടുത്തിയിരുന്നതായി പൊലീസ് പറഞ്ഞു.

അഭിരാമിയുടെ അമ്മ ഉളിയക്കോവിൽ സ്നേഹനഗർ 23 ദമോദര മന്ദിരത്തിൽ ലീന മോസസ് (48) ചികിത്സയിലാണ്. അമ്മയെ ആക്രമിക്കുന്നത് തടയാനെത്തിയ അഭിരാമിക്ക് അടിവയറ്റിലാണ് കുത്തേറ്റത്. ഈസ്​റ്റ് പൊലീസ് അറസ്​റ്റ് ചെയ്ത പ്രതികളായ ഉളിയക്കോവിൽ ഫാമിലി നഗർ 9 പഴയത്ത് വീട്ടിൽ ഉമേഷ് ബാബു (62), ഭാര്യ ശകുന്തള (56), മകൾ സൗമ്യ (20) എന്നിവരെ റിമാൻഡ് ചെയ്തു.

ഉമേഷ് ബാബുവിനെ ജില്ല ജയിലിലേക്കും മറ്റു രണ്ടുപേരെയും അട്ടക്കുളങ്ങര വനിത ജയിലിലേക്കും മാറ്റി.