കെ.എസ്.ആർ.ടി.സി ബസിന്‍റെ ഹെഡ്​ലൈറ്റ്​ അടിച്ചുതകർത്ത കേസിൽ യുവതിക്ക് ജാമ്യം

കോട്ടയം: കെ.എസ്.ആർ.ടി.സി ബസിന്‍റെ ഹെഡ്​ലൈറ്റ്​ അടിച്ചുതകർത്ത കേസിൽ അറസ്റ്റിലായ യുവതിക്ക്​ ജാമ്യം. നഷ്ടപരിഹാരമായി 46,000 രൂപ കെട്ടിവെച്ചതോടെയാണ്​ പൊൻകുന്നം ചിറക്കടവ് പുളിക്കൽ വീട്ടിൽ സുലു ഇബ്രാഹിമിന് ​​(26) ചങ്ങനാശ്ശേരി ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ്​ കോടതി ജാമ്യം അനുവദിച്ചത്. ചൊവ്വാഴ്ച രാത്രിയാണ്​ പൊതുമുതൽ നശിപ്പിച്ചത് അടക്കം ജാമ്യമില്ലാ വകുപ്പുകൾ ചുമത്തി സുലുവിനെ ചിങ്ങവനം പൊലീസ്​ അറസ്റ്റ്​ ചെയ്തത്​.

അതേസമയം, തന്‍റെ കാറില്‍ ഇടിച്ചശേഷം കെ.എസ്.ആര്‍.ടി.സി ബസ് നിര്‍ത്താതെ പോവുകയായിരുന്നെന്ന് സുലു ആരോപിച്ചു. ഇത്​ ചോദ്യം ചെയ്ത തന്നെ ഡ്രൈവർ അസഭ്യം പറഞ്ഞു. രൂക്ഷമായായിരുന്നു ഡ്രൈവറുടെ പെരുമാറ്റം. ഇതാണ്​ പ്രകോപനത്തിന്​ കാരണം. തന്‍റെ ഭാഗത്ത്​​ തെറ്റു​ സംഭവിച്ചതായി​ സമ്മതിക്കുന്നു. ബസ്​ ഡ്രൈവർക്കെതിരെ സ്ത്രീത്വത്തെ അപമാനിച്ചതിന്​ കേസ്​ നൽകുമെന്നും സുലു മാധ്യമപ്രവർത്തകരോട്​ പറഞ്ഞു.

ചൊവ്വാഴ്ച ഉച്ചക്കായിരുന്നു സംഭവം. സുലു സഞ്ചരിച്ചിരുന്ന കാറിന്‍റെ ഗ്ലാസിൽ കെ.എസ്.ആർ.ടി.സി സൂപ്പർ ഫാസ്റ്റ്​ ബസ് തട്ടി. ഇതേച്ചൊല്ലി ഡ്രൈവറും ഇവരും തമ്മിൽ തർക്കമുണ്ടായി. ഇതിനിടെ, കാറിന്‍റെ ഡിക്കിയിൽനിന്ന്​ ജാക്കി ലിവർ എടുത്ത് ബസിന്‍റെ ഹെഡ് ലൈറ്റുകൾ ഇവർ അടിച്ചുപൊട്ടിക്കുകയായിരുന്നു. സംഭവത്തിൽ ചിങ്ങവനം പൊലീസ് കേസെടുത്ത് അന്വേഷണം നടത്തുന്നതിനിടെ യുവതി പൊലീസ് സ്റ്റേഷനിൽ ഹാജരായി. കോടതി നിർദേശപ്രകാരമാണ്​ 46,000 രൂപ കെട്ടിവെച്ചത്​.