സാക്ഷിയെ പ്രതിയാക്കുന്ന പൊലീസ്​ രീതി എക്സൈസും പഠിച്ചോയെന്ന് ഹൈകോടതി

കൊച്ചി: സാക്ഷികളെ പ്രതിയാക്കുന്ന കേരള പൊലീസി​​​െൻറ രീതി എക്സൈസും പഠിച്ചോയെന്ന് ഹൈകോടതി. നീതിയും നിയമവും നോക്കാതെ തോന്നുംപോലെയാണോ എക്സൈസ് ഒാരോന്ന്​ ചെയ്യുന്നതെന്നും സിംഗിൾബെഞ്ച്​ ആരാഞ്ഞു. വയോധികയെ അബ്​കാരി കേസിൽ കുടുക്കിയതുമായി ബന്ധപ്പെട്ട ഹരജിയിൽ ​േകാടതി നിർദേശ പ്രകാരം നേരിട്ട്​ ഹാജരായ കായംകുളം റേഞ്ച് എക്സൈസ് ഇൻസ്പെക്ടർ എസ്. പ്രമോദിനോടായിരുന്നു കോടതിയുടെ ചോദ്യങ്ങൾ.

ഒന്നാം പ്രതിയുടെ വ്യക്​തി ​വൈരാഗ്യം തീർക്കാൻ തന്നെക്കൂടി കേസിൽ പ്രതിയാക്കി മനപ്പൂർവം ഉൾപ്പെടുത്തിയെന്ന്​ ചൂണ്ടിക്കാട്ടി കായംകുളം കീരിക്കാട്​ സ്വദേശിനി രാധാമണി(62) നൽകിയ ഹരജിയാണ്​ കോടതിയുടെ പരിഗണനയിലുള്ളത്​. കേസ്​ റദ്ദാക്കണമെന്നാവശ്യപ്പെട്ടാണ്​ ഹരജി. കുടുംബ വഴക്കിനെത്തുടർന്ന് അയൽവാസി തന്നെ കള്ളക്കേസിൽ കുടുക്കിയതാണെന്ന ഇവരുടെ വാദം എക്സൈസും മുഖവിലയ്ക്കെടുത്തിരുന്നു. കുറ്റപത്രത്തിൽ ഇവരെ കുടുക്കിയതാണെന്ന് പറയുന്നുണ്ടെങ്കിലും പരമാവധി ശിക്ഷ നൽകാനും നിർദേശിക്കുന്നുണ്ട്​. പരസ്പര വിരുദ്ധമായ ഈ കുറ്റപത്രം പരിഗണിച്ചാണ്​ എക്സൈസ് ഇൻസ്പെക്ടറോട്​ നേരിട്ട്​ ഹാജരാകാൻ ജൂലൈ 24 ന് കോടതി നിർദേശിച്ചത്.

തെറ്റുപറ്റിയതാണെന്നും ഇനി ആവർത്തിക്കില്ലെന്നും ബുധനാഴ്​ച ഹാജരായ ഉദ്യോഗസ്​ഥൻ കോടതിക്ക്​ ഉറപ്പുനൽകി. എന്നാൽ, കുറ്റപത്രത്തിന് അംഗീകാരം നൽകിയ ഉദ്യോഗസ്ഥനാരെന്ന് കോടതി ആരാഞ്ഞു. വാക്കാലുള്ള അംഗീകാരമാണ്​ ലഭിച്ചതെന്ന്​ ഉദ്യോഗസ്​ഥൻ പറഞ്ഞു. ആരാണ് ഇതിനുപിന്നിലെന്ന് കണ്ടുപിടിക്കേണ്ടതുണ്ടെന്നും ഇത്തരം ഉദ്യോഗസ്ഥർ സർവിസിൽ തുടരരുതെന്നും കോടതി വാക്കാൽ ചൂണ്ടിക്കാട്ടി.

തുടർന്ന് കുറ്റപത്രം അംഗീകരിച്ചതാരാണെന്ന് വാക്കാലോ രേഖാമൂലമോ വ്യക്തമാക്കാൻ ഇൻസ്പെക്ടറോട്​ കോടതി നിർദേശിച്ചു. അതിന്​ സമയവും അനുവദിച്ചു. കുറ്റപത്രം പരിശോധിച്ച് ഹരജിക്കാരി കുറ്റക്കാരിയാണോ എന്നു വിലയിരുത്തി അറിയിക്കാൻ സർക്കാർ അഭിഭാഷകനോട്​ ആവശ്യപ്പെട്ട കോടതി  ഹരജി ആഗസ്​റ്റ്​ 20ലേക്ക്​ മാറ്റി.