‘വന്യമൃഗ ആക്രമണത്തിൽ മരിക്കുന്ന മനുഷ്യർക്കൊപ്പമാണ് നിൽക്കേണ്ടത്’; മന്ത്രി എ.കെ. ശശീന്ദ്രനെതിരെ യൂത്ത് ഫ്രണ്ട് എം

കോട്ടയം: സംസ്ഥാനത്ത് തുടരുന്ന വന്യമൃഗ ആക്രമണത്തിൽ വനം മന്ത്രി എ.കെ. ശശീന്ദ്രനെതിരെ രൂക്ഷ വിമർശനവുമായി യൂത്ത് ഫ്രണ്ട്-എം. വന്യജീവി ആക്രമണങ്ങളിൽ മന്ത്രി എ.കെ. ശശീന്ദ്രന്‍റെ നിലപാട് നിരുത്തരവാദപരമാണെന്ന് യൂത്ത് ​ഫ്രണ്ട്​ സംസ്ഥാന കമ്മിറ്റി കുറ്റപ്പെടുത്തി.

കോട്ടയത്ത് സംഘടിപ്പിച്ച ‘മാണിസം’ യൂത്ത് കോൺക്ലേവിൽ അവതരിപ്പിച്ച പ്രമേയത്തിലായിരുന്നു വനം മന്ത്രിക്കെതിരായ വിമർശനം. എൽ.ഡി.എഫ്​ ഘടകകക്ഷിയായ കേരള കോൺ​ഗ്രസ്​-എമ്മിന്‍റെ യുവജനവിഭാഗമാണ് യൂത്ത് ഫ്രണ്ട്-എം.

വന്യമൃഗങ്ങളുടെ ആക്രമണത്തിൽ മനുഷ്യർ മരിക്കുമ്പോൾ അവർക്കൊപ്പമാണ് നിൽക്കേണ്ടത്. എന്നാൽ, അവരെ കുറ്റപ്പെടുത്തുന്ന സമീപനമാണ് മന്ത്രി സ്വീകരിച്ചതെന്നും യൂത്ത് ഫ്രണ്ട്-എം കുറ്റപ്പെടുത്തി.