സമരത്തിനിടയിലും തലസ്ഥാനത്ത്​ സ്വകാര്യബസുകൾ ഓടുന്നതെന്തുകൊണ്ട്​ ?

കോട്ടയം: നിരക്കുവർധനയാവശ്യപ്പെട്ട്​ സംസ്ഥാനത്ത്​ സ്വകാര്യ ബസ്​സമരം കൊടുമ്പിരികൊള്ളുമ്പോളും തിരുവനന്തപുരം നഗരത്തിൽ സ്വകാര്യ ബസുകൾ നിരത്തിലിറങ്ങുന്നുണ്ട്​. സമരത്തോട്​ ആഭിമുഖ്യമില്ലാത്തതിനാലല്ല പണിമുടക്ക്​ സമരം നടത്താൻ കഴിയാത്ത നിസഹായാവസ്ഥയിലാണ്​ ഉടമകൾ എന്നതാണ്​ കാരണം. നിയമം അനുസരിച്ച്​ പെർമിറ്റ്​ കൈവശം വെച്ച്​ സമരം നടത്താൻ സംസ്ഥാനത്തെ സ്വകാര്യ ബസുടമകൾക്ക്​ കഴിയില്ല.

അങ്ങനെ ചെയ്താൽ ആ പെർമിററുകൾ പിടിച്ചെടുക്കാൻ സർക്കാരിന്​ അധികാരമുണ്ട്​. ഇക്കാര്യം ഹൈക്കോടതിയും ശരിവച്ചിട്ടുണ്ട്​. ബസ്​ നിരക്ക്​ വർധിപ്പിക്കണമെന്ന അവകാശവാദമുന്നയിക്കാൻ സ്വകാര്യ ബസ്​ ഉടമകൾക്ക്​ കഴിയില്ലെന്ന്​ ഹൈക്കോടതി ജഡ്ജി കെ.എ. അബ്​ദുൽ ഗഫൂർ 1997 സെപ്​റ്റംബർ 30 ന്​ വിധിച്ചിരുന്നു. പെർമിറ്റുകൾ കൈവശം വെച്ച്​ സമരം ചെയ്യാൻ സ്വകാര്യബസുടമകൾക്ക്​ അവകാശമില്ല. നഷ്ടമാണെന്ന്​ തോന്നുന്ന ഉടമകൾ പെർമിറ്റ്​ സർക്കാരിന്​ മടക്കി നൽകണം. സർവീസ്​ നടത്താൻ മറ്റാരെങ്കിലും മുന്നോട്ടുവന്നാൽ അവർക്ക്​ സർക്കാർ അവർക്ക്​ പെർമിറ്റ്​ നൽകണമെന്നും വിധിയിലുണ്ട്​.

നിലവിലുള്ള നിയമങ്ങൾ പര്യാപ്​തമല്ലെങ്കിൽ ഓർഡിസൻസ്​ അടക്കം ഇറക്കി ജനങ്ങളുടെ ബുദ്ധിമുട്ട്​ പരിഹരിക്കണമെന്നും സെന്‍റർ ഫോർ കൺസ്യൂമർ എജുക്കേഷൻ നൽകിയ ഹരജിയിൽ ഹൈക്കോടതി നിർദേശിച്ചിരുന്നു. ഈ വിധിയുടെ അടിസ്ഥാനത്തിൽ നായനാർ സർക്കാരിന്‍റെ കാലത്ത്​ സ്വകാര്യ ബസ്​ സമരം നേരിടാൻ പെർമിറ്റ്​ പിടിച്ചെടുക്കൽ അടക്കമുള്ള നടപടികൾക്ക്​ സർക്കാർ തുടക്കമിട്ടിരുന്നു. അതോടെ സമ​രം അവസാനിക്കുകയും ചെയ്തു.

നേരത്തെ തിരുവനന്തപുരം നഗരത്തിൽ കെ.എസ്​.ആർ.ടി.സി. ബസുകൾ മാത്രമാണ്​ സർവീസ്​ നടത്തിയിരുന്നത്​. കെ. കരുണാകരൻ മുഖ്യമന്ത്രിയായിരിക്കെ കെ.എസ്​.ആർ.ടി.സി ജീവനക്കാർ നടത്തിയ സമരം നേരിടാനാണ്​ സ്വകാര്യ ബസുകൾക്ക്​ ഇവിടെ ​ പെർമിറ്റ്​ അനുവദിച്ചത്​. നഗരത്തിലെ യാത്രക്കാർ ഒന്നടങ്കം ആവശ്യപ്പെട്ടതോടെയാണ്​ 100 ബസുകൾക്ക് അനുമതി നൽകിയത്​. കെ.എസ്​.ആർ.ടി.സി ജീവനക്കാർ യാത്രക്കാരെ കഷ്ടപ്പെടുത്തിയാൽ ബദൽ യാ​ത്രാമാർഗം എന്നനിലയിലേക്ക്​ തലസ്ഥാന നഗരത്തിൽ സ്വകാര്യബസുകൾ മാറി. ഈ സ്വകാര്യബസുകൾ പണിമുടക്കിയാൽ പെർമിറ്റുകൾ തിരിച്ചെടുത്ത്​ കെ.എസ്​.ആർ.ടി.സിക്ക്​ നൽകാൻ സർക്കാരിന്​ കഴിയും.

തിരുവനന്തപുരം നഗരത്തിലെ 100 സ്വകാര്യബസുകൾക്ക്​ പകരം ബസുകൾ ഓടിക്കാൻ കെ.എസ്​.ആർ.ടി.സിക്ക്​ കഴിയുമെന്നിരിക്കെ പണിമുടക്കാൻ സ്വകാര്യ ബസുകൾ ധൈര്യപ്പെടില്ല. സംസ്ഥാനത്ത്​ മുഴുവൻ ഇൗ അവസരമുണ്ടെങ്കിലും ആകെയുള്ള 6418 ബസുകളിൽ 3626 ബസുകൾ മാ​ത്രം ഓടിക്കാൻ കഷ്ടപ്പെടുന്ന കെ.എസ്​.ആർ.ടി.സിക്ക്​ സ്വകാര്യ ബസുകൾക്ക്​ പകരം നിൽക്കാനാവില്ല. ഈ സാഹചര്യത്തിലാണ്​ തിരുവനന്തപുരം നഗരത്തിലൊഴികെ സ്വകാര്യബസ്​ സമരം നടത്താൻ ഉടമകൾക്ക്​ കഴിയുന്നത്​.