റിപ്പബ്ലിക്​ ദിനത്തിലെ പച്ചക്കൊടി, പച്ചയായ യാഥാർഥ്യമെന്ത്​...?

‘‘ഇക്കഴിഞ്ഞ റിപ്പബ്ലിക്​ ദിനത്തിൽ ഇന്ത്യൻ ദേശീയ പതാക ഉയർത്തുന്നതിനു പകരം, കേരളത്തിലെ മുസ്​ലിം വിദ്യാർത്ഥികൾ ഉയർത്തിയത്​ പച്ചക്കൊടി. അതും വെള്ളനിറത്തിൽ ചന്ദ്രക്കലയും നക്ഷത്രവും ആലേഖനം ചെയ്​ത മുസ്​ലിം ലീഗിന്‍െറ പച്ചക്കൊടി...’’

കേരളത്തെക്കുറിച്ച്​ വടക്കേയിന്ത്യയിലെ സോഷ്യൽ മീഡിയകളിൽ ആസൂത്രിതമായി നുണ പ്രചരിപ്പിക്കുന്ന സംഘ്​പരിവാരങ്ങൾ പുറത്തിറക്കിയ ഏറ്റവും പുതിയ നുണയാണിത്​. സംഘ്​പരിവാരങ്ങൾ നടത്തുന്ന ‘നുണയുദ്ധങ്ങളുടെ’ വാസ്​തവം നിരന്തരം വെളിച്ചത്തുകൊണ്ടുവരുന്ന ‘ആൾട്ട്​ന്യൂസ്​.കോം’ ആണ്​ ‘റിപ്പബ്ലിക്​ ദിനത്തിലെ പച്ചക്കൊടി’യുടെ പച്ച തെളിയിച്ചത്​.

റിപ്പബ്ലിക്ക്​ ദിനം ബഹിഷ്​കരിച്ച്​ പച്ചക്കൊടി ഉയർത്തി എന്ന നുണ സംഘ്​പരിവാരം നടത്തുന്ന സോഷ്യൽമീഡിയ പ്രചാരണം

‘റിപ്പബ്ലിക്​ ദിനം ബഹിഷ്​കരിച്ച്​ കേരളത്തിലെ മുസ്​ലിം വിദ്യാർത്ഥികൾ സ്​കൂളുകളിൽ ഇസ്​ലാമിക്​ പതാക ഉയർത്തി’ എന്ന തലക്കെട്ടിൽ സഞ്​ജയ്​ ഗുപ്​ത എന്നയാൾ ട്വിറ്ററിൽ ചിത്രം സഹിതമാണ്​ വ്യാജ വാർത്ത പ്രചരിപ്പിച്ചു തുടങ്ങിയത്​.

സഞ്​ജയ്​ ഗപേ്​തയുടെ ട്വീറ്റ്​

സാധാരഗതിയിൽ അന്തവും കുന്തവുമില്ലാതെ കൈയിൽ കിട്ടുന്നതൊക്കെ ഫോർവേഡ്​ ചെയ്യുന്ന സംഘ്​പരിവാരത്തിനു പോലും സംശയമായി..
കൂടെ കിടക്കുന്നവനല്ലേ പനിച്ചൂടറിയൂ...!
നിരന്തരം നുണ പ്രചരിപ്പിക്കുന്നവരായതു കൊണ്ട്​ ബി.ജെ.പിയുടെ വക്​താവ്​ വൈഭവ്​ അഗർവാളിനെ തന്നെ സംശയം പിടികൂടി. ഇത്തരം കള്ളത്തരങ്ങൾ കൈയോടെ പിടികൂടി പരിചയമുള്ള ആൾട്ട്​ ന്യൂസ്​.കോമിനെത്തന്നെയാണ്​ വാസ്​തവമറിയാൻ വൈഭവ്​ അഗർവാൾ ട്വിറ്ററിലൂ​ടെ സമീപിച്ചത്​.

പച്ചക്കൊടി വാർത്തയുടെ യാഥാർത്ഥ്യം അറിയാൻ ബി.ജെ.പി വക്​താവ്​ വൈഭവ്​ അഗർവാൾ ആൾട്ട്​ന്യുസ്​.കോമിനോട്​ ആവശ്യപ്പെടുന്ന പോസ്​റ്റ്​

‘ആൾട്ട്​ന്യുസ്​’ നടത്തിയ അന്വേഷണത്തിൽ കണ്ടെത്തിയ വസ്​തുത ബഹു കോമഡിയാണ്​. ഇതേ തലക്കെട്ടിൽ ഇതേ വാർത്ത 2014ലും 2017 ലും സംഘ്​പരിവാരം സോഷ്യൽ മീഡിയയിൽ പ്രചരിപ്പിച്ചിട്ടുണ്ട്​ എന്ന്​ അവർ കണ്ടെത്തി. ‘ശംഖ്​നാദ്​’ എന്ന അക്കൗണ്ടിൽ നിന്നാണ്​ 2014ൽ ഇൗ വ്യാജം പ്രചരിച്ചിരുന്നത്​. കേശവ്​ മിശ്ര എന്നയാളിന്‍െറ ട്വിറ്റർ അക്കൗണ്ടിൽ നിന്നാണ്​ 2017ൽ പ്രചരിച്ചത്​.

2014ൽ ശംഖ്​നാദ്​ പ്രചരിപ്പിച്ച നുണയാണ്​ ഇപ്പോൾ ആവർത്തിച്ചിരിക്കുന്നത്​

വാസ്​തവമാണ്​ അതിലേറെ രസകരമായത്​....
Iuml - Voice of Indian Muslims എന്ന ഫേസ്​ബുക്ക്​ പേജിൽ ‘ഇന്ത്യൻ യൂണിയൻ മുസ്​ലിം ലീഗിന്‍െറ ഭാവി തലമുറ’ എന്ന കുറിപ്പോടെ 2013 മേയ്​ 17ന്​ പോസ്​റ്റ്​ ചെയ്​തതാണ്​ ഇൗ ചിത്രം. മുസ്​ലിം ലീഗിന്‍െറ കൊടിയും പിടിച്ച്​ പ്രകടനമായി കുട്ടികൾ പോകുന്ന ഇൗ ചിത്രത്തിൽ അരികിലൂടെ കടന്നുപോകുന്ന പച്ച നിറമുള്ള ബസും പിന്നിൽ മഞ്ഞ നിറമടിച്ച വാനും കാണാം. വ്യാജനെ പടച്ചപ്പോൾ ഇൗ ബസും വാന​ുമൊന്നും നീക്കം ചെയ്യാതെ കൈയിൽ കിട്ടിയ അതേപടി ‘റിപ്പബ്ലിക്​ ദിനം ബഹിഷ്​കരിച്ചു’ എന്ന തലക്കെട്ടിൽ അങ്ങ്​ പ്രചരിപ്പിക്കുകയായിരുന്നു.

2017ൽ കേശശവ്​ മിശ്രയെന്നയാൾ പ്രചരിപ്പിച്ചതും ഇതേ നുണ

ആയിരക്കണക്കിന്​ പേർ ഷെയർ ചെയ്യുന്ന ഇത്തരം വ്യാജങ്ങളുടെ സത്യാവസ്​ഥ വളരെ കുറച്ചുപേരേ അന്വേഷിക്കൂ എന്നതും ബഹുഭൂരിപക്ഷം ഇത്​ വിശ്വസിക്കുമെന്നതുമാണ്​ നിരന്തരം നുണകൾ പ്രചരിപ്പിക്കാൻ സംഘ്​പരിവാരത്തിന്​ ആത്​മവിശ്വാസം നൽകുന്നത്​.

Iuml - Voice of Indian Muslims എന്ന ഫേസ്​ബുക്ക്​ പേജിൽ ‘ഇന്ത്യൻ യൂണിയൻ മുസ്​ലിം ലീഗി​​​​​​െൻറ ഭാവി തലമുറ’ എന്ന കുറിപ്പോടെ 2013 മേയ്​ 17ന്​ പോസ്​റ്റ്​ ചെയ്​തതാണ്​ ഇൗ ചിത്രം

പ്രളയകാലവും ശബരിമല മണ്ഡലകാവുമായിരുന്നു മുമ്പ്​ ഉത്തരേന്ത്യൻ സംഘ്​പരിവാരത്തിന്‍െറ സൈബർ യോദ്ധാക്കളുടെ നുണയുദ്ധഭൂമി. കേരളത്തെ ആവുന്നത്ര താറടിച്ചുകാണിക്കാൻ നുണകളുടെ പ്രളയംതന്നെ സോഷ്യൽ മുഡിയകളിൽഅവർ ഒഴുക്കി. അതിപ്പോഴും തുടരുന്നുമുണ്ട്​.

ലോക്​സഭ തെരഞ്ഞെടുപ്പിന്​ കളമൊരുങ്ങുന്നതോടെ ഇൗ നുണകാമ്പയിനുകൾ ശക്​തമാകുമെന്നുറപ്പ്​.