'വാട്ട്സ്ആപ്പ് നിരോധിക്കണം'; പൊതു താൽപര്യ ഹർജി ഹൈകോടതി ഇന്ന്​ പരിഗണിക്കും

കൊച്ചി: ജനപ്രിയ മെസേജിങ്​ ആപ്പായ വാട്ട്സ്ആപ്പ് നിരോധിക്കണമെന്നാവശ്യപ്പെട്ട് കുമളി സ്വദേശി നൽകിയ പൊതു താൽപര്യ ഹരജി ഹൈകോടതി ഇന്ന്​ പരിഗണിക്കും. കേന്ദ്ര ഐ.ടി ചട്ടങ്ങൾ പാലിച്ചില്ലെങ്കിൽ ആപ്പ്​ നിരോധിക്കണമെന്നാവശ്യപ്പെട്ടാണ്​​ കുമളി സ്വദേശിയായ ഓമനക്കുട്ടൻ ജൂൺ 23ന്​ ഹൈകോടതിയെ സമീപിച്ചത്​.

ചീഫ്​ ജസ്​റ്റിസ്​ അധ്യക്ഷനായ ബെഞ്ചാണ്​ ഇന്ന്​ കേസ്​ പരിഗണിക്കുന്നത്​. കേസിൽ നേരത്തെ കോടതി കേന്ദ്ര- സംസ്ഥാന സർക്കാരുകളുടെയും പൊലീസ് മേധാവിയുടെയും നിലപാട് തേടിയിരുന്നു.

അപ്ലിക്കേഷൻ ഉപഭോക്താക്കളുടെ സ്വകാര്യതയിലേക്ക് കടന്നു കയറുന്നതായും ഡേറ്റയിൽ കൃത്രിമം നടക്കാനുള്ള സാധ്യത​യുണ്ടെന്നും ഹരജിക്കാരൻ പറയുന്നു. ഈ സാഹചര്യത്തിൽ വാട്സ്ആപ്പ് ഡേറ്റ കേസുകളിൽ തെളിവായി സ്വീകരിക്കരുതെന്നും ഹർജിയിൽ ആവശ്യപ്പെടുന്നുണ്ട്​.