മുഹമ്മദി​​ന്‍റെ മരുന്നിന്​ കേന്ദ്രം നികുതിയിളവ്​ നൽകണമെന്ന്​ വെൽഫെയർ പാർട്ടി

തിരുവനന്തപുരം: അപൂര്‍വ ജനിതക രോഗമായ സ്‌പൈനല്‍ മസ്‌കുലാര്‍ അട്രോഫി (എസ്.എം.എ) ബാധിച്ച മുഹമ്മദിന്‍റെ ചികിൽസക്ക് വാങ്ങുന്ന സോൾജെൻസ്​മ മരുന്നിന് കേന്ദ്രം ഈടാക്കിയ നികുതി ഒഴിവാക്കണമെന്ന്​ വെൽഫെയർ പാർട്ടി. 18 കോടി രൂപയുടെ മരുന്നിന്​ ​ആറ്​ കോടി രൂപയാണ്​ കേന്ദ്ര സർക്കാർ നികുതിയായി ഈടാക്കിയത്​. ഇത് ഒഴിവാക്കി കൊടുക്കാൻ കേന്ദ്ര സർക്കാർ തയാറാകണമെന്ന്​ ജനറൽ സെക്രട്ടറി കെ.എ ഷെഫീഖ്​ പറഞ്ഞു.

ഒരു കുഞ്ഞു ജീവന്‍റെ രക്ഷക്ക് കേരളം ഒരുമിച്ച് ചേർന്ന് സമാഹരിച്ച ആ പതിനെട്ട് കോടിക്ക് പതിനായിരം കോടിയുടെ മൂല്യം ഉണ്ട്. ഇന്ധന നികുതി കൊള്ള നടത്തി തടിച്ചു കൊഴുത്ത കേന്ദ്ര സർക്കാർ ജീവന്‍റെ വിലയിൽ നിന്ന് അപഹരിക്കാൻ നിൽക്കരുത്.

ജൂൺ ഒമ്പതിന് സെക്കന്തരാബാദിലെ അയാൻഷ് ഗുപ്​ത എന്ന മൂന്ന് വയസുകാരനും ഫെബ്രുവരിയിൽ മുംബൈയിലെ ടീരാ കമ്മത്ത് എന്ന കുട്ടിക്കും ഇതേ മരുന്നു നൽകിയപ്പോൾ കേന്ദ്ര സർക്കാർ നികുതിയിളവ് നൽകിയിരുന്നു. അത് പ്രധാനമന്ത്രി തന്നെ വലിയ വായിൽ വിളിച്ചു പറയുകയും ചെയ്തിരുന്നു.

ആ ആനുകൂല്യം മുഹമ്മദിനും നൽകണം. നികുതിയിളവായി ലഭിക്കുന്ന തുക അനേകം കുഞ്ഞുങ്ങളുടെ ജീവ സുരക്ഷക്ക് ഉപയോഗിക്കാൻ പറ്റും. കേരള സർക്കാർ ഈ ആവശ്യം ഉന്നയിക്കണം. എന്തെങ്കിലും നികുതി സംസ്ഥാനം ഈടാക്കുന്നുണ്ടെങ്കിൽ അതും ഒഴിവാക്കി കൊടുക്കണമെന്നും അദ്ദേഹം ആവശ്യപ്പെട്ടു.