കൗമാരക്കാരുടെ ആത്മഹത്യ: മരണഗ്രൂപ്പുകളെ കുറിച്ച് കൂടുതൽ വിവരങ്ങൾ

കൽപറ്റ: സംസ്ഥാനത്ത് അതിവേഗംവളരുന്ന ഓൺലൈൻ ആത്മഹത്യ ശൃംഖലയെക്കുറിച്ച് കൂടുതൽ വിവരങ്ങൾ പൊലീസിന് ലഭിച്ചതായി വിവരം. സുഹൃത്തുക്കളായ വിദ്യാർഥികൾ ചെറിയ ഇടവേളയിൽ ജീവനൊടുക്കിയതിനു​ പിന്നിൽ സമൂഹമാധ്യമത്തിലെ മരണ ഗ്രൂപ്പുകളാണെന്ന സംശയം ബലപ്പെടുന്നതിനിടെ, പ്രത്യേക അന്വേഷണസംഘം വയനാട്ടിലെത്തി തെളിവെടുത്തു. സ്പെഷൽ ബ്രാഞ്ച് ക്രിമിനൽ ഇൻറലിജൻസ് വിഭാഗം കോഴിക്കോട് റേഞ്ച് എസ്.പി എം.എൽ. സുനിലി​​െൻറ നേതൃത്വത്തിലുള്ള സംഘമാണ് തിങ്കളാഴ്ച കമ്പളക്കാട് പൊലീസ് സ്​റ്റേഷനിലെത്തി വിവരങ്ങൾ ശേഖരിച്ചത്.

ആത്മഹത്യ ചെയ്ത കുട്ടികളുടെ സുഹൃത്തുക്കളായ രണ്ടുപേരെയും രക്ഷിതാക്കളെയും സ്​റ്റേഷനിലേക്ക് വിളിച്ചുവരുത്തി എസ്.പി വിവരങ്ങൾ ശേഖരിച്ചു. ജില്ലയിൽ അന്വേഷണ ചുമതലയുള്ള ഡിവൈ.എസ്.പി പ്രിൻസ് അബ്രഹാമുമായി പുരോഗതി വിലയിരുത്തി. കുട്ടികളുമായി ബന്ധപ്പെട്ട ഏതാനും മൊബൈൽ ഫോണുകളും നമ്പറുകളും വിശദ പരിശോധനക്ക്​ സൈബർ സെല്ലിന്​ കൈമാറിയിട്ടുണ്ട്. വിഷയത്തി​​െൻറ ഗൗരവം കണക്കിലെടുത്ത് സംസ്​ഥാന പൊലീസ്​ മേധാവി ലോക്നാഥ് ബെഹ്റയുടെ നേരിട്ടുള്ള നിയന്ത്രണത്തിലാണ് അന്വേഷണം.

ഐ.ജി റാങ്കിലുള്ള പൊലീസ്​ ഉദ്യോഗസ്​ഥരെ ചേർത്ത് സമഗ്ര അന്വേഷണത്തിന് കോർ ടീമും രൂപവത്​കരിച്ചു. കണ്ണൂർ ഐ.ജി ബൽറാം കുമാർ ഉപാധ്യായയാണ് ടീമിനെ ഏകോപിപ്പിച്ച് റിപ്പോർട്ട് സംസ്​ഥാന പൊലീസിന് കൈമാറുക. സമാന കേസുകൾ മറ്റു ജില്ലകളിൽ റിപ്പോർട്ട് ചെയ്തതിനാൽ ജില്ലതലങ്ങളിലും പ്രത്യേക അന്വേഷണം നടക്കുന്നുണ്ട്.

ഇൻസ്​റ്റഗ്രാമിലെ ‘സൈക്കോ ചെക്കൻ’ എന്ന മരണഗ്രൂപ്പ്​​ വിദ്യാർഥികൾ പിന്തുടർന്നിരുന്നു. വിഷാദത്തിലേക്കും ഏകാന്തതയിലേക്കും ആത്മഹത്യയിലേക്കും തള്ളിവിടുന്ന ഉള്ളടക്കങ്ങളാണ് ഈ പേജുകളിലുള്ളത്. കുട്ടികളുടെ മനോനിലയിൽ വലിയ സ്വാധീനമുണ്ടാക്കി മരണത്തിലേക്ക് തള്ളിവിടുകയാണ് ഇത്തരം ഗ്രൂപ്പുകൾ ചെയ്തിരുന്നത്. സംസ്ഥാനത്തെ നിരവധി കുട്ടികൾ ഈ പേജുകൾ പിന്തുടരുന്നതായി അന്വേഷണത്തിൽ കണ്ടെത്തി. നിലവിൽ, ഇത്തരം കുട്ടികൾക്ക് ആവശ്യമായ ബോധവത്കരണം നൽകുന്നതിനാണ് പൊലീസി​​​െൻറ മുൻഗണന. ഇതി​​െൻറ ഭാഗമായി വരുംദിവസങ്ങളിൽ കൂടുതൽ ബോധവത്കരണ പരിപാടികൾ സംഘടിപ്പിക്കും.