വയനാട്​ പുനരധിവാസം: എം.പിമാരുടെ ചർച്ചയിൽ ലീഗിനെ കുറ്റപ്പെടുത്തി മുഖ്യമന്ത്രി; മറുപടി നൽകി ഇ.ടി. മുഹമ്മദ്​ ബഷീർ

തിരുവനന്തപുരം: വയനാട്​ പുനരധിവാസത്തിൽ മുസ്​ലിം ലീഗ്​ സ്വീകരിച്ച നിലപാടിനെ എം.പിമാരുടെ യോഗത്തിൽ കുറ്റപ്പെടുത്തി മുഖ്യമന്ത്രി പിണറായി വിജയൻ. പുനരധിവാസ പ്രവർത്തനങ്ങളിൽ ഒറ്റ​ക്കെട്ടായി നിൽക്കേണ്ട സമയത്ത്​ ഒരു പാർട്ടി മാത്രം അവരുടേതായ നിലയിൽ മു​ന്നോട്ട്​ പോയത്​ ശരിയായ പ്രവണതയല്ലെന്നായിരുന്നു മുഖ്യമന്ത്രിയുടെ വിമർശനം.

എന്നാൽ, മുഖ്യമന്ത്രിയുടെ വിമർശനത്തിന്​ യോഗത്തിൽ പ​ങ്കെടുത്ത ഇ.ടി. മുഹമ്മദ്​ ബഷീർ മറുപടി നൽകി.

ഭവന നിർമാണ പദ്ധതിക്കായി ധനസമാഹരണം നടത്തി കാത്തിരുന്നിട്ടും സർക്കാർതലത്തിൽ നടപടികൾ വൈകിയ സാഹചര്യത്തിലാണ്​ ലീഗ് രംഗത്തിറങ്ങിയതെന്ന്​ ഇ.ടി വിശദീകരിച്ചു. സർക്കാർ ലിസ്റ്റിൽ നിന്നുള്ളവരെയാണ്​ ഇതിനായി തെരഞ്ഞെടുത്തതെന്നും അദ്ദേഹം വ്യക്തമാക്കി. മേപ്പാടിയിൽ 11 ഏക്കറോളം ഭൂമിയിൽ 105 കുടുംബങ്ങൾക്ക് എട്ട് സെന്റിൽ 1000 സ്‌ക്വയർ ഫീറ്റ് വീടുകൾ നിർമിച്ചുനൽകാനാണ്​ ലീഗ് ​തീരുമാനം.

ആശ വർക്കർമാരുടെ സമരം എം.പിമാർ യോഗത്തിലുന്നയിച്ചെങ്കിലും ഇക്കാര്യത്തിൽ സംസ്ഥാനത്തിന്​ ഒന്നും ചെയ്യാനി​​​ല്ലെന്ന്​ മുഖ്യമന്ത്രി വ്യക്തമാക്കി. ആശ വർക്കർമാർക്ക്​ സാധ്യമായ എല്ലാ സഹായവും അനൂകൂല്യവും സംസ്ഥാനം നൽകുന്നുണ്ട്​. ഇക്കാര്യങ്ങൾ എല്ലാവർക്കും അറിയാവുന്നതാണ്​. കേ​ന്ദ്ര സർക്കാറാണ്​ ഇനി എന്തെങ്കിലും ചെയ്യേണ്ടത്​. അതിനായി കേന്ദ്രത്തിൽ സമ്മർദം ചെലുത്തുകയാണ്​ എം.പിമാർ ചെയ്യേണ്ടതെന്നും മുഖ്യമന്ത്രി നിർദേശിച്ചു.