വയനാട്​, പാലക്കാട്​, ചേലക്കര വോട്ടെണ്ണൽ തുടങ്ങി​; നെഞ്ചിടിപ്പോടെ മുന്നണികൾ

കൽപറ്റ/പാലക്കാട്/ ചേലക്കര: വയനാട്​ ലോക്സഭ മണ്ഡലത്തിലേക്കും പാലക്കാട്​, ചേലക്കര നിയമസഭ മണ്ഡലങ്ങളിലേക്കും നടന്ന ഉപതെരഞ്ഞെടുപ്പിന്‍റെ വോട്ടെണ്ണൽ തുടങ്ങി. ആദ്യം പോസ്റ്റൽ, ഹോം വോട്ടുകളാണ് എണ്ണുന്നത്. തുടർന്ന് മെഷീൻ വോട്ടുകളുടെ എണ്ണൽ തുടങ്ങും. പോളിങ്ങിലെ ഏറ്റക്കുറച്ചിൽ പ്രവചനം അസാധ്യമാക്കുന്നു. പാലക്കാട്ടെ ഫലമാണ്​ എല്ലാവരും ഉറ്റുനോക്കുന്നത്​. ഫലമെന്തായാലും സംസ്ഥാന രാഷ്ട്രീയത്തിൽ തുടർചലനങ്ങൾ സൃഷ്ടിക്കുമെന്നുറപ്പ്​.

സിറ്റിങ്​​ സീറ്റ്​ നിലനിർത്താനായില്ലെങ്കിൽ കോൺഗ്രസിന്​ വലിയ ക്ഷീണമാകും. രണ്ടാംസ്ഥാനത്തുള്ള ബി.ജെ.പി ജയിച്ചാൽ, ലോക്സഭ തെരഞ്ഞെടുപ്പിൽ നേടിയ മൂൻതൂക്കം നഷ്ടപ്പെടുമെന്ന്​ മാത്രമല്ല, ബി.ജെ.പിക്ക്​ നിയസഭയിലേക്ക്​ വഴിതുറന്നതിന്‍റെ പഴിയും കോൺഗ്രസ്​ കേൾക്കേണ്ടിവരും.

അതേസമയം, സീറ്റ്​ നിലനിർത്തുമെന്ന്​ യു.ഡി.എഫ്​ തീർത്തുപറയുന്നു. കഴിഞ്ഞ തെരഞ്ഞെടുപ്പിലെ മൂന്നാം സ്ഥാനത്തുനിന്ന്​ ഡോ. പി. സരിനിലൂടെ ഒന്നാം സ്ഥാനത്തെത്തുമെന്നാണ്​ സി.പി.എമ്മിന്‍റെ അവകാശവാദം. പാലക്കാട്ട്​​ തോറ്റാലും സി.പി.എമ്മിന്​ വലിയ പരിക്കില്ല. എന്നാൽ, ചേലക്കരയിൽ വിജയം അനിവാര്യമാണ്​.

സി.പി.എമ്മിന്‍റെ സിറ്റിങ്​ സീറ്റ്​ കോൺഗ്രസ്​ പിടിച്ചെടുത്താൽ പിണറായി സർക്കാർ കടുത്ത പ്രതിരോധത്തിലാകും. ഭരണവിരുദ്ധവികാരം ശക്തമാണെന്ന നിലയിൽ പാർട്ടിയിലും മുന്നണിയിലും പിണറായി വിജയന്‍റെ അപ്രമാദിത്തം ചോദ്യംചെയ്യപ്പെടുന്നതിന്‍റെ തുടക്കമാകുമത്​.

ചേലക്കരയിൽ ജയിക്കാനായാൽ യു.ഡി.എഫിന്​ അത് വരാനിരിക്കുന്ന നിയമസഭ തെരഞ്ഞെടുപ്പിനെകൂടി സ്വാധീനിച്ചേക്കാവുന്ന രാഷ്ട്രീയ വിജയമാകും​. ചേലക്കര കോട്ട ഭദ്രമെന്ന ഉറപ്പിലാണ്​ സി.പി.എം. നേരിയ ഭൂരിപക്ഷത്തിന്​ ജയിക്കുമെന്ന്​​ യു.ഡി.എഫ് പ്രതീക്ഷിക്കുന്നു​.

വയനാട്ടിലെ ഫലത്തിൽ ആർക്കും സംശയമില്ല. രാഹുൽ ഗാന്ധി നേടിയ ഭൂരിപക്ഷം പ്രിയങ്കക്ക്​ നേടാനാകുമോയെന്നാണ്​ എല്ലാവരും ഉറ്റുനോക്കുന്നത്​. പോളിങ്​ കുറഞ്ഞത്​ ഭൂരിപക്ഷം ഉയരുമെന്ന കോൺഗ്രസ്​ പ്രതീക്ഷക്ക്​ മങ്ങലേൽപിച്ചിട്ടുണ്ട്​.

മൂന്നിൽ മൂന്നുമെന്ന നേട്ടമാണ്​ കോൺഗ്രസുകാരുടെ പ്രതീക്ഷ. ചേലക്കര നിലനിർത്തിയാൽ പരിക്കില്ലാതെ പിടിച്ചുനിൽക്കാമെന്ന്​ സി.പി.എം കണക്കുകൂട്ടുന്നു. തൃശൂരിന്‍റെ തുടർച്ചയിൽ പാലക്കാട്ട്​ താമര വിരിയിച്ച്​ നിയമസഭയിലും സാന്നിധ്യമാകാമെന്നാണ്​ ബി.ജെ.പി സ്വപ്നം.